Hechos 1 - Táurinakene máechejiriruwa’i ema Viya tikaijare

Ema Jesús mametaka eta máukupaisirayare ema Machanewa Viya

¹ Piti Teófilo, títekapauchavipa eta táinapure nájure taye'e eta máichawakenewa'i ema Jesús te títekapapa te juka apake'e, nájucha'i tamutu eta máichakeneana'i, étapa eta máimiturapiana'i te tepanawapa

² tási'a narari'i'i ena manerejiruana apústuleana. Émaipa ema Machanewa Viya, máimikataka'i eta matúparasirawaka'i ena, nájuchawarepa eta mayapira'i te anuma.

³ Tási'a te táekenepa eta máepenira'i, téchepukapa te máekari, tiápechawaware títareka'i, kuarentakene'i sache eta makáchanerawakaicha'a ena máimitureana. Máimitukawaka'i ena eta mawasa ema Viya akenuka te anuma.

⁴ Makáchanewakaicha'a'i ena apústuleana ema Jesús, mametakawakapa, eta wa'i nakújunika'ini eta Jerusalén. Máichawakapa: –Ekuchapayare eta táitauchirawayare eta máijararuwa'i ema Vikaiyakene. Étaipa eta juka numetarapiana'i.

⁵ Échawaichu, ema Juan, máikachasikawaka'i te une ena achaneana. Étisera, puiti juka sacheanayare, tiúkupaikayare ema Machanewa Viya, émainapa tíkachasika'eyare.

Eta mayapira ema Jesús te anuma

⁶ Ena tiúrujiakana'i ema Jesús nayaserekapa: –Tata, puítinaichu píjaraka'avi viti Israelitana ema viye'enaichu akenuka te juka viáwasa.

⁷ Ema Jesús májikapapa: –Wícha'a táechakare, wa'i tatuparaka étina'ini echa tája'apuka sachewayare, títauchawaya. Taicha ema Tata, makarichu ema máituruekene'a'i,

⁸ té'esera te maitekapapa ema Machanewa Viya, tiáwa'aka'eyare tímikataka'eyare. Taka'e, échejisianuinapa nuti, tamutuyare te awasareana eta epaisi'ayare te Jerusalén, te Judea, te Samaria, étapa te jákani tayere'ikeneana awasareana taye'e te juka apake'e.

⁹ Taka'e, te títawapa eta máechejirisirawa'i, ena máimitureana naimararakaicha'a'i, tíja'uchawapa ema Jesús tiyanapa te anuma, táepakuchapa eta úkaji, waipa makaechera'ini.

¹⁰ Eta mayanira'i ema Jesús te anuma, náimararakaicha'a'i ena máimitureana. Taka'e, tiáramikareanapa tímerekawana ena apinana ángeleana tijapumuiri'awaka'i ena

¹¹ tási'a, náichapawakapa: –Galileona ¿Tája'a ta ícha'i ímararaka'i eta anuma? Puiti enekaparareka'i ema Jesús eta mayanirapa te anuma. Te jákani sácheyare, tichawayare te juka apake'e, tiúkupaikayare takutiyareichu eta mayanira'i.

Nanerejikapa ema Matías, máitsiwayare'i ema Júlasi

¹² Eta návi'aira'i te anuke'e te masi'i tikaijare Ulivukiji, tichawanapa ena apústuleana taye'e eta Jerusalén: anipa'ichu'i eta napaisira'i, taicha jena sachekene'i sáwarumu'u'i.

¹³ Te títekapanapa te awasare, tisiapanapa te peti, eta náitekapi'a'i. Tiápananapa te tékene'a piso. Natiari'i'i ema Pedro, ema Juan, ema Santiago, ema Andrés, ema Felipe, ema Tomás, ema Bartolomé, ema Mateo, ema apana Santiago, machicha ema Alfeo, ema Simón naichasare Celote, tási'a émapa ema Judas machicha ema Santiago.

¹⁴ Namutu ena maparapenaveana ema Jesús, ésupa esu maena María, énapa ena apamuriana esenana tiurujikawana'i tamutu sacheana eta nayujarasira'i.

¹⁵ Te jena sácheana, ena náurujiruwana'i náetavika'i ciento veinte eta nasimutuwa'i ena máimitureana ema Jesús. Taka'e, téchepukapa ema Pedro te namuri, titupi'apa. Máichawakapa:

¹⁶ “Nuparapenaveana, titauchawayare'i eta tametarapi'i eta Machanewa Viya, mamétakasi'i ema David, eta taechejisi'akene'i eta Ajureka, eta matiari'iraya ema Júlasi, ema tínapumirauchaya ena suntaruana te nakaratakayapa ema Jesús.

¹⁷ Taicha ema Júlasi, émainichu'i vichamurini taye'e eta juka vématanerepi'i.

¹⁸ (Émasera tiyanapa tiwachareka'i eta apake'e eta mawachaini'i eta máijararesira'i ema Jesús. Te taekenepa, ema tikapakawapa, tinapusikapa eta maemirisira'i, tiuta'ekapa te apake'e, tiúchumuriapa eta maturupiana.

¹⁹ Te náechapa ena tikawasana te Jerusalén, nanakapa eta táijare'i Hacéldama. Eta tikaijare'i puiti: ‘Apake'e máitinewacha ema Jesús.’)

²⁰ Eta taechejiriruwa'i eta Salmo. Ani maka'e'i: ‘Tánasipa mawakuina eta mapena, tási'a nakuija nakusiapa eta mapena.’ Tási'a éneichuware ‘Tatuparaka'i masiapaya ema apana achane máitsiwaya te máwakureni'i.’

²¹ “Narari'i ani te vitaraku ena vichamuriana'i, te juka añuana'i, te matiari'icha'a ema Tata Jesús te vimuri,

²² ena tikachane'aviana'i te tikaikachasinapa ema Jesús me Juan, wa'i najunijika'avi'ini, natiari'ikene'i te tiyapapa ema Jesús te anuma. Takamunupa emanaina masiapa vichamurina, apaesa maimikataka'avi eta véchejisi'aira eta maechepusira'i ema Jesús.”

²³ Taka'e, tikanerejianapa ena apinana: ema tikaijare Matías, émapa ema apana tikaijare José Barsabás, éneichuware náimijarecha'i Justo.

²⁴ Tási'a tiyujarakanapa, ánipa naka'e'i: “Tata, piti pímati eta visamureana vimutu viti, pímecha'avi nája'apuka ema tiuripa naye'e ena nani apinawa vinerejiruana'i

²⁵ máitsiwayare ema máemitiaru'i, ema apústuleni Júlasi, táimikuñaru'i eta mapekatura.

²⁶ Taka'e, nasorte'achapa ena apinana, táetupiakapa eta suerte ema Matías, tási'a, natuparakapa eta máwakureyare nachamurirayare'i ena apamuriana apústuleana.