Hebreo 6 - Táurinakene máechejiriruwa’i ema Viya tikaijare

¹ Taka'e vímiyanawa eta vikajurusiraya eta véchemaraiwa'i taye'e eta juka vé'iru'i, apaesa chanaru'enapa eta itusira, enakikapa eta tainapureana naimiturapiana'i maye'e'i ema Cristo. Waipa vikuchawaikene'awa taye'e eta tajina taechejiriruwaina, vinakikapa eta tamaurikeneana, ve'ikapa ema Cristo, waipa vikukicha eta pekatu eta timikuñaka'aviyarae'i, wakasiñawapa ema Viya,

² eti ímatipa eta táichararakawa'i te ekaikachasinapa, étapa eta táichararakawa'i te nanakapa eta nawa'u te echuti, ímatiwarepa tamutu eta vímiturapiana taye'e eta náechepusirayare ena náepenakeneana, étapa eta ekuñaraki máitawakakayare.

³ Tási'a puiti, nímituka'eyare eta apamuri, te máijarakanuricha'apukaini ema Viya eta nítupajijiasirawaya, étapa eta ekarawa'uiraya.

⁴ Taicha ena etaipa eta najachapa'i eta majaraiwa, nimatipa'i eta maitupajijiasirawa ema Viya, taicha ema mawa'akaipa ema Machanewa Viya,

⁵ taicha ena naimatipa eta turinawa eta maechejiriruwa ema Viya étapa eta maitupajijiasirawa taye'e te juka apake'e taitekapakeneya,

⁶ Te'esera te nachawa nakipaikawa, waipa warata'a vimichawa maye'e ema Viya taicha enapa tiapecha naemetataka'i ema machicha ema Viya tási'a nakaeka'ipa'i tamutu eta naichararakawa'i.

⁷ Nímikutichayare, eta makamirisira'i ema Viya eta tikiwa, táerapaisirawane'i tamutu eta apake'e: Jarari'i eta apake'e, tiúrinasarepa eta tasukukureruwana, taka'e ema achane kamuripa eta tinikakare makaye'e, ema Viya maijarkapa eta mauruwayare.

⁸ Jarari'iware eta apana apake'e, tájina tasukukureruwaina, itapepairechucha, ejareware, ema Viya máijarakayare'i eta táikuñayare, tíjuinapa te yuku táikuchi'i.

⁹ Taka'e eta juka numetasira'e'i, nútisera nukasiñawa'i eta eye'e eta wa'i ínajikawaima'i, eti némunaruana'i nuparapenaveana'i, nukasiñawa'i eta máijarasira'eya ema Viya eta iúrikakarewayare te makuchuku'a'avipa.

¹⁰ Ema Viya tétavikawa'i eta máitauraiwa'i, wáipaine'i máemitisikaima'i eta ekaemataneasirana'i, étapa tímereucha'e'i eta émunasirawaka'i ímikatasirawaka'iware ena echamuriana'i taye'e eta juka vé'iru'i, máima'a'i eta ímiyanawaira'i ekaemataneaka.

¹¹ Nuwara'aware ímiyanawa'ini eta ewapinawairawaka ámutu eti eta ekaemataneasira'i, yátupina ekasiñawa maye'e ema Viákenu, ekuchapaya eta machaviraya.

¹² Wá'isera nuwara'a plúju'ena, ímiyanawa'i é'ika ákuti ena echamurianaini yátupikene'i eta nakasiñawaira'i me Viya, nakamicha'i tamutu, apaesa ekutikakapa eta ejakapiraya eta íkuchi'i maye'e ema Viya.

¹³ Taka'e te makaejakapa ema Viya eta maechejiriruwa'i maye'e ema Abraham, emajiwapa tijarakawa, taicha najina apanaina'ini mapajupanawa'ini maye'e ema eta émajiwaina'ini maijarakawa'ini;

¹⁴ Ánipa máicha: “Yátupiyare eta níjarasiraviyare eta piúrikakarewayare, tási'a, níjarakaviyarewa eta náichapemuriwaya ena piámariekeneana.”

¹⁵ Ema Abraham, ichapemuri'i eta makuchapira'i akamichira'i, eta taka'e majachapapa me Viya eta maikure'i. Makasiñawaira'i me Viya, eta makuchapira'i eta máijararuwana'i ema Viya.

¹⁶ Takuti'i mákani achane, tijarakawa maitauchaya eta maechejiriruwa, te mamira'u ema Viya, mawara'a ema Viya mapamikayare'i eta máitauchiraina, mákani achane manakapa eta maechejiriruwa eta maitauchirayare wa'ipa táeñamawakare'ini.

¹⁷ Eta taka'e ema Viya, mawara'apa maimerekayare'i nakaechera yatupina ena tijachapanayare eta maunaru'i naikuchi'i taicha ema maijararuwa'i maitaitauchayare'i eta maechejiriruwa, waipaine'i maitsiwachaima'i. Eta taka'e ema tikapawa'i tijarakawa'i eta maitauchirayare'i eta maechejiruruwa.

¹⁸ Tímatikare'i eta máuriwa'i ema Viya waipaina'i maitsiwachaima'i eta maijarasirawa'i eta maitauchirayare'i eta maechejiriruwa wa'iware tiwayuaraka'avima'i, taicha tijaraka'avi'i eta vitumewayare'i etapa eta makurisamurechira'aviyara'i viti vitanukana eta makatiuchira'aviyare'i ema Viya etapa eta vikasiñawaira vikuchapirayare eta maichakene'i.

¹⁹ Eta juka vikuchapakene'i, étara tétumecha'avi'i muraka te viáchanewana, takuti'i eta tajitakarewa eta tikarataka eta pakure. Tétavikawayare'i eta vikasiñawaira eta vipauchirayare ema Viya, taicha marari'iyare ema tímisiapa'aviyare te mávi'a'i ema Maiya,

²⁰ taicha ema Jesús tínapumirauchayarepa'i eta viyanirayare'i, taicha makarichu'i ema tikatupara'a'i eta mayaseuchira'aviyare, makuti'i ema víyara'aini Melquisedec.