Hebreo 4 - Táurinakene máechejiriruwa’i ema Viya tikaijare

¹ Taka'e puiti, vikasiñawayare me Viya apaesa vítujikawa vinaraka maye'e. Tikamunukare'isera eta ejaneasirawayare muraka machu émepururekawa eti, tijurikati wa'i ekuitujikawa esiapa.

² Taicha víti vikametakasi'iware eta Arairu maechejiriruwa ema Viya, takuti'i eta nakametakasira'i ena. Tamapuruji'isera eta nakametakasira'i eta náuchukuirayare'ini, wá'ikenesera nasuapa'ini.

³ Yátupisera jarari'i eta vinarasi'ayare'i, taicha ánipa maka'e ema Viya: “Tétavikawa'i eta náimiyusemasiranu'i ena nani wá'ikene siapanaima'i tinarakanaima'i eta nuye'e.” Émaichu'isera ema Viya máetupirikaipa'i eta vinarasi'aya, taicha tinarakapa ema, te táekenepa eta máitauchira'i tamutu eta juka apake'e.

⁴ Taicha eta Takapika'ukene Ajureka, ánipa taka'e siete sache: “Ema Viya tinarakapa tamutu eta makaematanera'i eta siétekenepa sache.”

⁵ Tiapechawaware taechejisi'a eta Ajureka: “Wá'ikene nasiapaima'i tinarakanaima'i eta nuye'e.”

⁶ Taka'e puiti, máwakuicha'a'i eta nanarasi'ayare'ini ena tínapukana'i tisamana'i eta nauchukuirayare, táichavene'i eta namasuapajiraiwa'i, étainapasera viávi'ayare viti vékenereruana visuapajira'ianayare.

⁷ Eta taka'e ema Viya mapecha'i maimikutiaracha'i etana sache, etana arairu “puiti”, taka'e maitaucha'i maicha techejika'avi'i taye'e eta, kapeni juka taetaviurewa'i te taekenapa, ema David maka'epa taye'e eta Takapika'ukene Ajureka eta vechakenepa'i: “Te'esera te esama puiti eti eta makayemakene ema Viya, wa'isera ekuemurakacha eta esamureana.”

⁸ Yátupi'i ema víyara'aini Josué makaitekapawaka'i ena nani achaneana taye'e eta apake'e natupara'a'i, wá'isera étaina'ini eta nanarasi'ayare mawara'akene'i ema Viya. Eta taka'e, eta máechejisi'apa eta apana sácheyare visiapiraya víti.

⁹ Taka'e, jarari'icha'a eta juka takapika'ukene'i vinarasi'ayare, táikuchi'i eta viáchanewa viye'e viti machanerana'i ema Viya;

¹⁰ Eta visiapirayare vinarakaya eta maye'e ema Viya, yátupi máitawakakayare eta vinarasiraya, waipa vikaematanéma'i, vikutiyare ema Viya eta manarasira'i taye'e eta máemataneana'i.

¹¹ Eta taka'e, tawara'a'i vétumechawayare'i taye'e eta visuapiraina ema, apaesa vítujikawa visiapa taye'e eta vinarasi'aya, machu vémepurureka eta víkuchi'i, machu wákuti ena masuapajiraira'ana'i.

¹² Taicha eta máechajiriruwa ema Viya, tétavikawa'i eta táitupajijiasirawa'i. Máicha, tamutu'i tarata'a, takachurika'i eta takasiriwa eta espada, takapayakayare'i te ama'e taye'e eta viáchanewana viti achaneana, tímecha'avi eta tamauriwa'i eta visamureana, tasiapaware eta vipanereruana, tímituka'aviware eta vétupirisirapaipa'i eta vítaresirana.

¹³ Ema Viya máimararaka'i tamutu, tájina wa'i virata'aima'i viyumuruka eta víchakeneana'i. Tamutuyare'i tiúchujika te mamira'u ema te máichu'a'avipa eta vimetauresirawayare maye'e.

Ema Jesús makarichu ema tiyaseura'i eta viye'e

¹⁴ Ema Jesús, yátupikene'i Machicha ema Viya, makarichu'iware ema tiyaseura'i eta viye'e taicha masiapakene'i te anuma. Eta taka'e ve'ikayare'i yatupi vetumechawa eta vikasiñawaira me Viya yatupina eta vikaratasirawaina muraka maye'e ema.

¹⁵ Ema, yátupi'i tiyaseura'ikene'i eta viye'e, taicha tímati'avi eta vimatumewa'i. Tijapanu'avisera, taicha ema éneichuware tikatajiwa'i tamutu'i makaitsamaraji ema winaraji, takuti eta makaitsamarajira'avi'i víti. Emasera wa'i makapekatura'ini ema Jesús.

¹⁶ Eta taka'e, yatupina vemeña'awa eta vikasiñairaina te mawasa ema Viya témunara'ikene, apaesa ema majapanu'avi viti, taicha ema tétavikawa'i eta majapanuraiwa táichavene'i eta máemunasira'avi'i, ema, yátupi'i eta máimikatasira'avi taye'e tamutu eta vikamunuirawana.