Hebreo 3 - Táurinakene máechejiriruwa’i ema Viya tikaijare

Ema Cristo tiápajukawa'i maye'e ema Moisés

¹ Nuwara'a numetaka'eya eta apana, eti nuparapenaveana máepachiaruana'i ema Viya, máichu'akeneana'iware eta esiapiraya eta máwasa. Nuwara'a epanerecha apaesa ákaikutiara eta táetaviuchira'i eta máitupajijiasirawa'i ema Jesús. Ema yátupi'i mawaneru'i ema Viya eta máimitusira'aviyare'i eta juka vé'iru'i. Makarichu'i ema tiyaseucha'aviparaka'i eta vikasiñawaira'i me Viya.

² Ema Jesús, tétavikawa'i eta máitauchira'i tamutu eta mawana'iana matuparakasiwana'i me Viya, masuapa'i eta mawana'i'i, énerichuware ema Moisés, títaura'iware eta mawana'i, máimitusirawa'i ena machanerana ema Viya.

³ Émasera ema Jesucristo, ema tiápajukawapana'i eta makunachakarewa, makachurika'i ema Moisés, takuti'i ema achane tepiyarekara'i eta peti kunachakarepana'i ema, taye'e eta peti.

⁴ Eta takaepiyaira'i tamutu eta petiana, taicha matiar'i ema achane títuka tépiyareka eta peti. Emasera ema Viya tamutu eta juka vima'akeneana, ema makarichu tepiyaka'i.

⁵ Emasera ema Moisés, ema mawanara'i, emasera matupiruwa'i eta masuapajiraiwa'i eta mawana'i'i me Viya, eta maematane'i eta'i eta titametakakayar'i tamutu eta mawara'akeneana ema Viya.

⁶ Émasera ema Viakenu Jesucristo, ema machicha'i, matupiruwa'i eta maitauchira'i tamutu eta mawana'i'i me Viya, te vímiyanawa eta juka vé'isira'i ema, vikasiñawaira eta maye'e, viúrisamure eta vikuchapira'i eta viúchukuiraya te jena sácheyare.

Ema Viya tíkucha'avi'i eta vinarasi'ayare viti machanerana'i

⁷ Eta taka'e, nuwara'a ejaneakawa, ema Machanewa Viya, ani maka'e'i eta máechejiriruwa'i taye'e eta Takapika'ukene Ajureka: “Puiti te esamapuka eti, eta maechejiriruwa ema Viya

⁸ Takuija eta tamurakawaina eta esamureana wa'i ekukuti ena achaneana masuapajiraira'ana'i nakaitsamarajipa ema Viya ánaki te mawapa'i wama'i.

⁹ Ánaki te mawapa'i wama'i tikaitsamarajianuana'i ena iachukanaveanaini eti Cuarenta añuipa'ineni eta nímechirawaka'i eta tiáramikareana níchakeneana'i, wá'isera nasuapanu'ini.

¹⁰ Eta taka'e, te táekenepa, nusemapa naye'e ena nani achaneana, taicha ena, táetaviucha'i eta táejekapirawa'i eta nasamureana. Taka'e nuka'epa: ‘Wa'i tetupikawa eta napanereruana te namamureana, wa'i náwara'a'ini náimati'ini eta táurinakene achene, nuwanairipiana nuti.’

¹¹ Tétavikawa'isera eta náimiyusemasiranu'i, tási'a, nuka'epa núti ena nánitataji wá'ikene nasiapaima'i tinarakanaima'i eta nuye'e”

¹² Eta taka'e, nuparapenaveana, nuwara'a ejaneakawayare yátupina, machu é'ika eta napanereru ena masuapajiraira'ana, machu emutsera'awa íminajikawa eta é'isira'i ema yátupikene'i Viya Vikaiyakene.

¹³ Étumechakakayaresera naye'e ena apamuriana echamuriana támutu'i sácheana, tayerewaina eta juka “puiti” eta taechejiruruwa eta Takapika'ukene Ajureka, apaesa nakuija nakuwayuaka'e eti taichavenena eta pekatu te esamureana machu échawa etupiara'i wínaraji'ena.

¹⁴ Taicha viti machamuri'aviana'i ema Cristo, vijakapainasarepa eta víkuchi'i maye'e ema, te vímiyanawa'i eta vikasiñairawa maye'e, vétumechirawaina eta vé'isira'i takutichu te tepanawapa.

¹⁵ Eta Takapika'ukene Ajurekanápe ani taka'e: “Puiti jena sache, esamayare esuapayare eti eta mametarapiana ema Viya, wa'i ekuemurakacha eta esamureana machu ákuti ena achaneana titupiara'iana'i.”

¹⁶ ¿Naja'asika ena achaneana titupiara'iana'i masuapajiraira'ana'i te taekenapa eta nasamira'i eta maechejiriruwa'i ema Viya? Enara ena makuchureana'i ema Moisés tiasi'ana'i taye'e eta awasare Egipto.

¹⁷ ¿Naja'asika ena timiyusemakana'i ema Viya eta tayerewa'i eta sacheana cuarenta añu'i? Enara ena tikapekaturana'i, namutu tiakipaikawana tepenarakana'i taye'e eta mawapa'i wama'i.

¹⁸ ¿Naja'asika ena majurachakene'i ema Viya eta namasiapirayare'i nanaraka'i maye'e? Enara ena masuapajiraira'ana'i.

¹⁹ Yatupi eta juka, táichavene'i eta namasuapajiraiwa'i, puiti víma'aipa'i eta namaitujisirawa'i tisiapana taye'e eta máwasa ema Viya.