Hebreo 12 - Táurinakene máechejiriruwa’i ema Viya tikaijare

Eta vikatajiwaira etapa eta vikasiñawaira me Viya

¹ Puíticha víti apanaware vikamichayare tamutu eta vikatajiwairana, wákutiwaka eta nakamichira ena nani náinapureana'i té'ikana'i ema Viya, taicha puiti ena tímararaka'aviana'i víti tája'apuka táicharakawa'i eta vipaisira'i víti, eta taka'e, tituparaka'avi vínajikayare'i eta táitiasira'avi'i eta tájiparakana, tiámaparaura'iana taye'e eta pekatuana, taka'e, vikamichayare tamutu, táuriwaya eta vikaemataneasira'i ema Viya, apaesa vijakapa eta víkuchi'i.

² Vikutiyarewa ema Viákenu Jesús, taicha eta tási'a maye'e eta vikasiñawaira'i me Viya émaichuware timitupirucha'avi. Ema, Jesús marata'a'i eta matajiwa te crusu wa'i masuapa'ini eta tatsiri'akarewa eta maepenira'i te crusu, taicha maecha'i te taekenepa matajiwa titekapayarepa eta maurisamurewayare'i. Tejakayarepa te mawaure ema Viya.

³ Puíticha eta, epanerekene'ayare e'ikayarewa eta makamichira'i ema Jesús tamutu eta makatajiwaira'i naicha ena tikatianakana'i, ene eka'eyare eti, wa'i ekuyakuji'ini, étumechawayaresera eta é'isira'i ema.

⁴ Táitaurewakene eti, tájinaicha'a íma'a'ini ekatajiwa'ini táimikapaka'e'ipukaini eta ínajiasiraipa eta tájiparakana te juka apake'e pekatupaire,

⁵ eti émitisikaipa eta maechjiriruwa ema Viya, eti yátupikeneana'i machicha. Ani taka'e eta Takapika'ukene Ajureka: “Wa'i ekuepuru, eti nuchichanaveana, eta maechejiriruwa ema Viya, wa'iware pikuinajikawa eta te timenekapaviana eta pichaira eta tamaurikeneana.

⁶ Taicha ema Viya, máemecharekayare'i nákani máemunaruana'i machichanaveana'i.”

⁷ Taka'e, ekamichayare eti jákani máemecharesira'eyare ema Viya táichavene'i eta máemunasira'e'i eti machichanaveana. ¿Émaipa mákani amaperu wa'ipuka maemechreka ema maiya eta mawaraira máetupirikayare eta mapanereruana?

⁸ Taicha ema Viya te wa'i makuemechareka'e eti machichanaveana'i, eta mawarairaina'i tauri eta itaresira, waipapuka yatupina machicha'ema'i.

⁹ Takuti'i eta vijurusira'i víti te amuya'avicha'a, témechareka'avi'i ena tikachicha'aviana, visuapawakapa táicha, tási'a, tavetijipa eta visuapirayare'i ema Tata Vikaiyakene'i apaesa ema tíjaraka'aviyare'i eta táuriwayare'i eta vítaresiraya.

¹⁰ Ena tikachicha'aviana, ánipichu eta náimitusira'avi'i jákani eta nawaraira'i ena viúriyare'i naye'e ena achaneana, emasera ema Viya, tiúripana'i eta vímitukasiwa'i maye'e, eta tiápajukawa tiúricha'aviyare, tépachinacha'aviyare'iware eta, mawara'a'i vikutiyare'i eta masantuwa'i ema.

¹¹ Jé'eware, te tatiari'ipuka eta vikaemechara'irana, wa'i viúrisamurema'i táicha, tikati'i visama, té'esera te vipanerecha eta taichararakawa'i tetupirika'aviyare, tétavikawayare'i eta viúrikakarewaya te visamureana taicha tatupiru'i eta vítaresira.

¹² Taka'e, étumechakaka etumewa eta ewa'uana tavitakeneana, étapa eta epuyusina, ímikatakaka eta etupi'aira muraka eta é'isira'i,

¹³ éneichuware etanukayare eta achene tatupirupana, eyani'ayare eta me Viya, wa'i ekuepiñuñuika, machu naevejuka ena matumera'ana ena té'ika'eana'i te ékene, táuri eta iámirakakaina.

Tétavikawa tawara'akarewa eta máechejiriruwa ema Viya

¹⁴ Takuijaware ekuichirawaina'i naye'e namutu ena achaneana. Yátupina eta epáchinawaina te esamureana étapa eta iúriwa eta ítaresirana. Taicha te wa'i tiúri'i eta ítaresirana, wa'i ítekapauchaima'i ema Viákenu.

¹⁵ Ejaneakawaicha yátupina. Wa'i ekuimipananajikawa eta esemirana. Machu tapareakawaka ena echamuriana eta ewínarajiwana, takuti jákani sukureka máurira'ana, tapareakayare eta apana sukureka táurinakene'i, táimikapakapa.

¹⁶ Nakuijaware te etaraku nakuve'a esu apana esena. Nakuija nakuepuru jákani tipikauchakareana'i. Wa'i ekukuti ema Esaú, eta mawaraira'i tinika, máijararekapa eta máikuchini'i maye'eni'i, taicha ema, máechavi'i ema maparape.

¹⁷ Échaichu'i eti, te táekenepa, te mawara'ainipa majakapa eta mayujara'u ema maiya, waipa majakapakare'ini, mametainipa tíya'a'i. Waipa marata'a'ini makajimuyaka'ini ema maiya.

¹⁸ Eti wa'i émeña'awa'ini, ákuti'ini ena achaneana israelítana, akane te náitekapauchapa eta mari Sinaí. Eta jara, tatiari'i'i eta yuku timuru'i te tápusi. Éneichuware te távi'a'i eta timapikukene'i, távi'a'iware eta táiñe'ikene emarere;

¹⁹ wa'iware esama'ini eta machuja, etapa eta ma'u ema Viya, eta máechejisirawaka'i ena. Ichapekene'i eta napisira'i ena tisamana'i. Eta taka'e, tiyaseserekanapa waipa makuechejikawaka'ini,

²⁰ taicha muraka'i eta wanairipi, wa'i narata'a'ini nakamicha'ini, ani taka'e'i: “Ekapaka nákani achane, jákaniware sárare te tápanapuka te juka mari. Ekapakayare te márija'i, te wá'ipuka eyuwarayare te lanza.”

²¹ Tétavikawa'i eta táiñe'iwa'i, émaipa ema Moisés ani maka'e'i: “Nuyayakarenecha eta nupisira'i”

²² Étisera tachicha'eanapa puiti eta máwasa ema Viya Vikaiyakene, tikaijare Arairu Jerusalén, eta távi'a'i eta mari Sión te anuma, te náurujisi'awa'i ena kamurikeneana ángeleana eta najirauchira'i ema Viya,

²³ eti esiapapa eta nasimutuwa ena ekutikeneana'i machichanaveana'i ema Viya, ekajukunaware anaki te anuma. Makachakayaipa ema Viya, ema yatupikene akenuka'i naye'e namutu ena náchanewana ena machichanaveana náepenakeneana, ena maepachinaruana'i,

²⁴ matiari'iware ema Jesús ema tiyaseura'ikene eta viye'e, taye'e eta Arairu maechejiriruwa, émaipa máepusaikapa eta máitine tasipa'aka'aviyare'i, eta taka'e eta máitine tikunachakarepana'i taye'e eta máitine ema víyara'aini Abel.

²⁵ Eta taka'e, échapawaicha eti, wa'i ekuepuru eta máichuarapiana'i ema Jesucristo. Machu ákuti ena tépuruana'i eta mawanairipiana ema Viya, máimiturapiana'i ema Moisés, étapa tímikuñakawaka'i ena, vivetijinapapuka víti eta víkuñayare, te vikaepakekupuka eta máichuarapiana puiti ema Viákenu, taicha ema tiási'a'i te machakaya ema Viya te anuma.

²⁶ Taicha eta akane, eta ma'u ema Viya, tétavikawa eta tamurakawa, tiyayakare'i taicha eta apake'e, puítisera, ani maka'e'i ema: “Eta'eineyare tiyayakare nicha eta apake'e, wá'isera tákarichuima'i, éneyareichuware te anuma.”

²⁷ Eta juka máechejiriruwa'i, “eta'eineware”, tímatikareipa'i eta táitavirayare tamutu jákani tiyamurikana'i máepiyaruana'i ema Viya te juka apake'e, takarichu tanasiyare jákani máitawakakakeneana taicha mayamuriana'i.

²⁸ Étaipa eta máwasa ema Viya, mawara'akene'i máimiávi'a'avi'i, máitawakakakene'i eta. Eta taka'e, vi'asulupayachaparaka ema, vétaviuchainaware eta vipikauchiraya ema, tási'a, vikurisamurechaina ema eta viwapinawa ichape eta vijirauchira'i ema.

²⁹ Taicha ema Viákenu makuti'i eta yuku, marata'a'i mámainuka máitaekene'a.