Filemón 1 - Táurinakene máechejiriruwa’i ema Viya tikaijare

¹ Nuti Pablo nukaerata'i taicha eta né'isira'i ema Jesucristo, puiti nukachane ema Timoteo eta vikajureravira'i piti Filemón, vichamurivi'i vémunaruvikene'i taye'e eta vématanerepiana'i

² vémechejisi'aware namutu ena vichamuriana'i tiúrujikawara'iana'i te pipena, péchejisina'aviware esu vichamuri Apia, émapa ema Arquipo, vichamuri'i muraka taye'e eta vématanerepiana'i.

³ Nakatajika'e'ini ichape ema Tata Vikaiyakene, émapa ema Viákenu Jesucristo náijaraka'e'ini táuriwaina eta epanereruana.

Eta máuriwa'i ema Filemón

⁴ Néchaviparaka te nuyujarasirana, nu'asulupayacha'i ema Viya,

⁵ Taicha nusamairika'i eta pímiyanirawa'i pémunaka ema Viákenu Jesús, pé'ika'i yátupi, pémunaka'iware namutu ena machanerana ema Viya.

⁶ Nuyaseuchavi'i me Viya eta pimiyanirawaina pisuapa yátupi, apaesa pimatiekene'a tamutu eta táurikeneana apaesa warata'a vicha eta vemunasiraina ema Cristo.

⁷ Ichape eta núrisamurewa'i picha piti nuparape, tijara'ine'i picha te nusamure eta nusamairika eta pímiyanirawa'i pémunakawaka yátupi ena vichamuriana, étapa eta pikurisamurechirawaka'i ichape ena te'ikana ema Viya.

Náechejiucha ema Onésimo

⁸ Taka'e tayanapane eta maijare ema Cristo nurata'aneni nuwanekavi eta pemataneya,

⁹ tiuripana nuyaseakavi eta pemunaraiwa. Nuti, Pablo ichasinupa, nuti presunu'i maichavene ema Cristo Jesús,

¹⁰ tiuri puiti, nuwara'a néchejiucha ema Onésimo. Puiti ema, nuchicha'i némunarukene'i te juka nukaerataiya'i.

¹¹ Ema Onésimo, kape juka másinekene'i, pikamusuraira'i. Puítisera ema, ichapeine'i eta máitátiranu'i nuti takutiyare eta máitatiraviyarewa piti apana.

¹² Puiti néwatakayare ema, eta ara piye'e: Pijakapinanuyare táimikutijirikawa nútinayare'i nítekapauchavi piye'e.

¹³ Nuwara'a'ineni mánasi'ini eta ani nuye'e, émaina'ini pítsiwaina'ini eta piwaraira'i píteka pítatinu eta návi'aira'i te juka nukaerataiya'i, táichavene'i eta nukametarairuira'i eta Arairu échejiriruwa.

¹⁴ Nuwara'a'ineni níminasicha ema, nukuchapa'isera tája'apuka pikayemayare piti. Wá'isera nuwara'a nupamikavi eta juka pikatajisiranuya, nukuchapayare eta pijikapiranuyare.

¹⁵ Táitaurewakene tijunijikavi'i ánipi ema Onésimo. Puítisera márajapainapa tichawayare eta ara piye'e, apajara'inapa eta máitatiraviya,

¹⁶ waipa tákutima'i kape juka másinekene'i: puiti píma'ainapa eta máuriwayare makamunukarewayare eta piye'e. Nuti, némunaka muraka ema, énenapa pika'eyare piti apanawa, eta pémunasiraya ema maka.

¹⁷ Te yátupina pémunakanu eta nuchamurivíra'i, pijakapinanuyare ema, tímikutijirikawa nútina'ini pijakapa.

¹⁸ Te tatiari'inapuka eta máejekapirawa'i piye'e, tikanteve'ipuka, nútinaine nimichavinavi.

¹⁹ Nuti Pablo, nútikene'i nájucha'i te nuwa'u eta juka puiti. Nuwara'a'inéni némechavi piti apana eta pinteve'i nuye'e eta nukatiuchiravi'i.

²⁰ Tiuri nuparape, pikatajikanucha'a pikurisamurechanu eta juka nuyasearuvi'i eta maemunasira'avi ema Viákenu Cristo.

²¹ Nukajurevi'i puiti, taicha necha'iware eta wa'i tákarichuima'i pítauchaya eta juka nuyasearuviana'i. Tatiari'iyare jákani apanayare píjararuwanayare piti tási'akeneyare te pisamure.

²² Éneichuware nuwara'a pétupirisinanuya eta nítekapi'aya. Étanecha nukuchapa'i eta tasamakarewaina eta eyujarakasana me Viya eta nítujisirawaina nítekapaucha'e.

Eta táichekuaraki eta máechejiriruwa ema Pablo

²³ Téchejikavi ema Epafras, ema nuchamuri te juka nukaerataiya'i, tapresuchakene'iware ema apana eta vé'isira'i ema Jesucristo.

²⁴ Éneichuware téchejika'eana ena apamuriana vichamuriana taye'e eta vématanerepiana'i, ema Marcos, ema Aristarco, ema Demas, tási'a émapa ema Lucas.

²⁵ Nuyaseuchaparaka ema Viákenu Jesucristo, eta iúrikakarewaya máicha tamutupa.