Efesios 4 - Táurinakene máechejiriruwa’i ema Viya tikaijare

Vimiyanawa vikurujikaka naye'e ena vichamuriana

¹ Yátupi nuti témeratakanu'i puiti táichavene'i eta né'isira'i ema Viákenu, eta taka'e, nutuparaka'eya, takuija íchirawaina eta ítaresira te mamira'u ema Viya, taicha eti máichu'akene'eichu'i ema, mawaraira'i machanera'eyare.

² Yátupina eta emansuwaina, étapa eta émunaraiwaina, ekamichayare tamutu, ímikatakaka eta émunasirakakaina eta etijikakairaina.

³ Ámetachucha icha eta iúrujisirawaina wa'i ekuinajikawa, apaesa wa'i ekukamitiaka eta ejakapira'i ema Machanewa Viya.

⁴ Émanaichuware ema tiáwa'aka'e, émaipa ema Machanewa Viya, etanaichuwa eta viake'e takuija íchirawaina eta iúrujisirawa'i, etanainaichu'i eta epanereruana, taicha ema Viya tíchu'a'e'i, puiti ekuchapa'i eta iápechirawayare ítareka.

⁵ Émanaichu'i ema Viákenu, etanaichuware eta vikasiñawaira me Viya, etanaichu'iware eta vikaikachasira eta viúrujiasira ema.

⁶ Émanaichu'iware ema Viya, Vikaiyakene'i vimutu, ema Tata técha'avi'i vimutu, tikaemataneaka'avi'i vimutu, émaware tijaneaka'avi'i vimutu.

⁷ Éneichuware ema Cristo, tíjaraka'avi'i eta vítukakeneyarepachu, jákani mawara'akene'i.

⁸ Taicha eta Takapika'ukene Ajureka, ani taka'e'i: “Te tiárapa ema te anuma, mámamuri'apaipa ena makuchureana'i, máijarakasichawakapa eta náitupujijiasirawaya ena machanerana.”

⁹ ¿Epanerechaya puiti eta takayemakene'i eta “máraira'i”? Eta juka tawara'a vikaikutiara eta máukupaisira'i tatiwa te juka apake'e.

¹⁰ Ema tiukupaucha'avi'i émaparakaichu'i ema tiárapa tichawapa te anuke'epana máwasa anuma, tichawawarepa eta émairayare técha tamutu.

¹¹ Maichuware tinaka'i ena apústuleana'i ena apamuriana Profetana'iware, tási'a ena apamuriana kametarairura'iana eta maechejiriruwa ema Viya, ena apamuriana Maíjarakapa eta najaneasiraya ena machanerana, ena apamuriana Maíjarakapa eta naitusirayare eta naimituresirayare.

¹² Taicha ema, mawara'a'i máetupirikayare'i tamutu te etaraku eti machanerana, mawara'a'iware vitiari'iyare viti vítatijirika'eyare eti vichamuriana, vikajurusira'eyare'i eta é'isira'i ema

¹³ apaesa yátupina wákuti wámutu eta máuriwa'i ema Machicha ema Viya; táitekapawanewareni eta sache eta viúrujisirawaya, tájinapa ta'apapika'avima'i eta vé'isira'i; vítamuturukaripa'ini tamutu eta vítukakeneana'i tási'akeneana'i me Cristo. Wákutipaini ema tamutu eta máitupajijiasirawa'i.

¹⁴ Mawara'a'iware vimutuyare vímatiekene'a, waipa wákutima'i ena amuyana, témunanasirikawanaicha'a ena, tísapajirikawanaicha'a nawayuaka taye'e eta apana náimiturapiana ena títuruekene'ana tiwayuarekana, napamisirawaka'i namutu náe'ika eta tamaurikeneana.

¹⁵ Eta taka'e, vétumechawayare eta vé'isira'i eta máimiturapiana yátupikeneana, yátupinaware eta vémunaraiwa'i, vikajuruakayare'iware eta viúriwa, vikutiyare ema Viákenu Jesucristo, taicha éma'i ema técha'avi'i.

¹⁶ Ema viákenu Jesucristo ema'i ema tikurujika'i ena vichamuriana, nímikuticha'e'i eta viáke'e, kamuri' eta táunawa'i eta viáke'e; étanaichu'isera, tatiari'isera taematanepachu, tiuri'isera eta takaematanera, ene taka'e'i eta vikaemataneasirayare, taye'e eta maijararu'avi'i vitukakenepachu.

Eta arairu vitaresira maye'e ema Cristo

¹⁷ Eta juka numetarapiana eye'e, nutuparaka'eicha, taicha matupararunu'i ema Viya: waipa ekuapecha ekukicha eta náichakeneana'i ena máimatira'ana'i ema Viya, náicha'i ena eta náitaresira'i jákani tawara'akeneana'i eta napanereruana

¹⁸ tétavikawa'i eta tamapikuwa'i. Máecharaireana'i ena, táichavene'i eta tamurakawa'i eta nasamureana. Wá'ikene nawara'aima'i napaucha ema Viya apaesa makanarakawaka'ini ena.

¹⁹ Tájinapa apaesaina'ini náimati'ini eta titsiri'akare. Tíjarakawanapa taye'e tamutu eta najamuraraiwana. Tétavikawa'i eta nawapinaira'i náicha'i eta tamaurikeneana tájiparakana.

²⁰ Étisera wa'i takuka'e eta ítaresiraya puiti eta é'isira'i ema Cristo.

²¹ Taicha németeaka yátupi'i esamararaka'i eta maímitusira'e'i. Ímatipa'i eta táurikeneana'i yátupikeneana'i tási'akeneana'i maye'e ema Jesucristo.

²² Tási'a puiti, waipa ekuesacha echáwaucha eta ítaresiraini'i akane echipejirikawa'i taicha tiwayuaka'e eta ejamurachira'i eta tamaurikeneana.

²³ Puiti eti, ísapaya ema Machanewa Viya máwa'aka'e, máitsiwachirayare eta epanereruana étapa eta ejamurachirana te iáchanewana,

²⁴ Tási'a, apanainapa eta ítaresiraya. Yátupi eta ekake'eraina ema Viya, ákutini ema eta máuriwa'i.

Étupirikayare tamutu eta ítaresirana

²⁵ Tási'a puiti, waipa épiya'ira'ima'i. Etupiruwayare tamutu eta échejirisirawaya naye'e ena echamuriana eparaepiyana, taicha étanaichu'i eta echamurirakakaira'i, émanaichu'iware ema Viúrujiaru'i.

²⁶ Te tatiari'ipuka eta táimiyusemaka'e, ejaneakawaicha machu ekapekatura; te esemapuka, wa'i takunasi eye'e. Énewanena ajapanu.

²⁷ Ekaunewayare, machu máituruka'e ema wínaraji, táichavenena'i eta esemanewa'i.

²⁸ Mákani tiámera'ini'i, waipa makuapechawa makuamereka. Mákaematane apaesa makunachakare, apaesaware eta jákani máematanewachayare eta maviyi'ayare eta makajirayare ena tikamunuwana'i.

²⁹ Wá'isera ekunakajakachawa eta tájiparakana echéjirirukawana tamaurikeneana. Tátupiruwa eta échejirisirawaina, apaesa étaina eyuchusi'a eta nasuapiraina nákani tisama'eanayare, eta tétupirikayare eta nasamureana ena.

³⁰ Wa'i ekuisapawa ícha jákani tamaurikeneana, machu ímipanerereka ema Machanewa Viya. Eta máwa'asira'e'i tímikutijirikawaipa'i eta manasira'ini eta maikutiara eta eye'e, taicha ímatikareipa'i, te taítekapapa jena sácheyare viúchukuirayare.

³¹ Wáipa ekunaka eta semanereana, waipaware ekatianara'ima'i, wáipaware ekusemarairi'i, wá'iware ekuijajachawa ekapiarakawa, wa'i ekuichanareka. Ínajikaya eti tamutu eta júkana tamaurikeneana.

³² Táitsiwa étaviuchayare eta iúriwayare naye'e nákani apamuriana, ejapanura'iyare. Te tatiari'ipuka eta náejekapirawa, ejapanukakayare, taicha ene maka'e'i ema Viya eta majapanuira'e'i máichavene'i ema Cristo.