Efesios 3 - Táurinakene máechejiriruwa’i ema Viya tikaijare

Eta mawana'i ema Pablo

¹ Eta mawana'i ema Pablo naye'e ena machamuriana

² Taka'e eti échaipa eta matuparasiranu'i ema Viya eta nukametarairuiraya eye'e eta maechejiriruwa, asulupaya eta maemunasira'avi'i, tikuchuku'a'avipa.

³ Taicha ema Viya timetakanuipa'i te nuwapure eta tayumururewaini'i mapanereru'i tapaemunawa téchakare'i maunaru'i maye'e ema Viya, puiti eta juka najuchakene'i échejikure'i.

⁴ Eta échejikuirayare eta juka najure'i, échainapa eta nimatiekene'aira'i eta tayumururewaini'i mapanereru'i ema Viya maye'e ema Viakenu Jesucristo,

⁵ Eta juka tayumururewaini'i mapanereru'i ema Viya, nájina náimatiekene'a'ini kape juka tásinekene'i. Puítisera, ema Machanewa Viya tímecha'avipa viti maye'eana santu apústuleana énapa ena profetana.

⁶ Ani taka'e'i eta juka tayumururewanaini'i: Eti apawasana, eti apanaware ejákapakare'iware maye'e ema Viya maicha ema Jesucristo, iúchuku'ayare táichavene'i eta é'isirayare eta vimetarairuana, esiapamuri'a'aviyare viti machanerana ema Viya, etamuri'avipa, vikutikakainapa eta víkuchi'i viti israelítana.

⁷ Tétavikawa'i eta majapanuiranu'i ema Viya nútisamipa máichu'akene'i eta nukametarairuyare'i eye'e, tási'a ema, tétavikawa'iware eta máetumechiranu'i te tamutu eta nukametarairuira'i, eta maimeresira'i eta maitupajijiasirawa'i.

⁸ Wa'i németeakawa'ini nútinasami'ini manerejika, taicha narari'i'i ena títupajijiapanawana'i eta nuye'e, tijapanunu'isera ema Viya, nútisamipa manerejiru'i, mawaraira'i numetapana'e eta máichuira'e'i eti apana eti apawasana, eta ejakapiraya eta táurikakarekene víkuchi maicha ema Cristo, tétavikawaya eta viúrikakarewayare.

⁹ Taka'e'i eta mapanereru'i ema Viya eta viye'e akane te tépanawainapa maepiyakaya tamutu, wá'isera táija'uchawa'ini mametaka'avi'ini, tapaenumawa timetakanu'i nuti, matuparasiranu'i eta numetasira'eyare tamutu.

¹⁰ Taka'e puiti naye'e ena nuchamuriana, naechainapa ena ángeleana enapa ena akenukara'ana tiavi'ana'i te anuma naechainapa eta maitupajijiasirawa ema Viya.

¹¹ Taicha mawara'a'i natiari'iyare kamurianayare ena tisuapanayare yátupi. Eta táuriwayare eta náe'isira, tímereuchayare'i eta máetaviuchira'i eta máitupajijiasirawa'i ema Viya. Náramine'i ena akenukana'i tiávi'ana'i te anuma eta náimaira'i eta juka. Eta taka'e'i eta mámirapa'i ema Viákenu Jesucristo tamutu eta mapanereruana eta akane ema Maiya.

¹² Tási'a puiti, tájina táeñamawakareima'i eta vipauchira ema Viya. Vikasiñawa'i eta maye'e, taicha ema Jesucristo éma'i ema vikasiñasarekene'i.

¹³ Eta taka'e, nutuparaka'eya wa'i ekuinajikawa eta juka é'iru'i, wá'iware ekupika eta esamairisira'i eta nukaerataira'i táichavene'i eta nukametarairuira'i eye'e. Ewapinawasera eta nukamichira'i eta nátajiwana, taicha nuwara'a'i nímereka eta táetaviuchira'i eta némunasira'e'i.

Ema Pablo mayujaraucha ena machamuriana

¹⁴ Eta taka'e nuti népuyumiraucha'i ema Makaiyakene ema Viákenu Jesucristo, nukunachira'i ema Tata,

¹⁵ ema, táiyakene'i tamutu eta anuma. Émaichuware técha'i tamutu te juka apake'e.

¹⁶ Nuyaseaka ema máijaraka'eni eti, ichapena'ini eta ítupajijiasirawa étapa eta étumewaina'ini te iáchanewana, maicha ema Machanewa Viya. Taicha ema Viya, tétavikawa eta máitupajijiasirawa, wá'iware mayawanaima'i,

¹⁷ nuyaseakaware yátupina eta ekasiñairaya ema Cristo, yátupinaware eta é'isiraina eta máimiturapiana. Túme'eyare eta émunaraiwa'i. Tájina ti'apapika'eima'i eta é'isira'i.

¹⁸ Eta taka'e namutu ena machanerana ema Viya, narata'ainapa nakaikutiara ena eta maemunaraiwa ema viákenu Jesucristo etapa eta taichapewa eta maemunasira'avi ema Viákenu Jesucristo.

¹⁹ Nuyaseaka'i ema Viya eta erata'airaina ákaikutiaraina eta maemunasira'avi, ichapepana'i taye'e eta vimatiraipa taye'e eta vipanereruana, apaesa ejákapa tamutu eta maikure'avi' ema Viya.

²⁰ Tétavikawa'i eta nukunachira'i ema Viya, taicha máituruekene'a'i tíjaraka'avi tamutu, máemetavika'i eta viyasearuana'i, étapa eta vipanerechirana, tétavikawa eta máitupajijiasirawa ema Machanewa Viya eta máetupirisira'i eta visamureana.

²¹ ¡Vikunachaparaka'ini ema Viya wámutu viti vé'ikana'i ema Jesucristo máichekuarakirenapa eta vikunachira! Amén.