Colosenses 4 - Táurinakene máechejiriruwa’i ema Viya tikaijare

¹ Eti apanaware eti nákenuana'i ena músuana, tiúriyarewa eta ekawanairipiraya, wa'i ekuimipananajikawaka. Échawayare eti apanaware eta máimararasira'e'i ema Viya, éma'i Iákenukene'i te anuma.

Eta matuparasira'avi'i ema Pablo viti vé'ikana'i ema Viákenu

² Puiti emutu eti, étumechawachucha eta eyujarasira'i. Éneichuware e'asulupayachaparakayare tamutu me Viya.

³ Éneichuware ímikataka'avi eyujaraucha'avi, apaesa vítujikawapaini viúchuku'a, vímiyanawapaini vímimaticha'ini ena achaneana eta juka tayumururewaini'i maye'e ema Cristo. Étavene'i puiti nukaerataira'i táicha.

⁴ Nékatiaka'echa ímikatakanu eyujarauchanu apaesa nítujikawa nukametarairu, taicha nutupara'aichu'i me Viya.

⁵ Táuri eta ítaresiraina naye'e ena máe'ikara'anaicha'a ema Jesús. Ekamapurawacha'a puiti juka sácheana eta ímitusirawaka'i.

⁶ Táuriware eta ejikapiraina te natiari'inapuka nákani tiyasereka'eanayare. Tátupiruwa tauri eta échejirisirawana, tapikauchakare'i.

Eta táichekuaraki eta máechejiriruwa ema Pablo

⁷ Máima'a'einesera ema vémunarukene'i vichamuri Tíquico. Ema, títametaka'eyare tamutu eta níchararakawa'i nuti, taicha ema nukachane'i eta te juka návi'a'i. Tétavikawa'i eta máimikatasiranu'i eta vikaemataneasira'i me Viákenu.

⁸ Eta taka'e, néwataka'i máiteka eta ara eye'e. Ema timetaka'eyare eta víchararakawa'i. Éneichuware tétumecha'eyare eti apanawa.

⁹ Éneichu'iware néwataka'i ema Onésimo némunarukene'iware. Ema, tiási'a'i eta ara eye'e. Puiti émaichu'i vichamuri'i eta te juka. Ena nani, ena títametaka'eanayare eta víchararakawa'i víti te juka viávi'a'i.

¹⁰ Ema Aristarco, ema nukutikene'i eta nukaerataira'i. Téchejika'eware ema Marcos, ema macheji ema Bernabé. Eti échaipa eta máitesirayare eta ara eye'e ema Marcos. Te máitekapaucha'epa, tiúriyare eta ejakapirayare ema.

¹¹ Éneichuware téchejika'e ema Jesús, ema íchasare'i Justo. Nakarichu'i ena nani israelítana tímikatakanuana'i. Ichape eta náimikatasiranu'i eta vikametarairuira'i eta máechejiriruwana ema Viya. Ichape eta nakurisamurechiranu'i ena.

¹² Téchejika'eware ema Epafras, ema maka yátupikene'i mawanara ema Jesucristo. Tétavikawa'i eta máecharairisira'e'i eti te mayujarasirana, mawaraira'i ímiyanawa'ini étumechawa yátupina'ini ítaucha'ini eta mawara'akeneana ema Viya.

¹³ Ichapemuri'i eta nímararasira'i nuti ema Epafras eta máecharairisirá'e'i eti, énapa ena tikawasana'i te awasareana Laodicea étapa Hierápolis.

¹⁴ Éneichu'iware téchejika'e ema mériku Lucas, ema vémunarukene'iware. Téchejika'eware ema Demas.

¹⁵ Échejisinanuini ena apamuriana vichamuriana'i tikawasana'i te awasare Laodicea. Échejisinanuware ema Ninfas, énapa namutu ena tiúrujikawara'iana'i te mapena.

¹⁶ Te tamutupa eta échejikuirayare eta juka najure'i, ímiamarekayare naye'e ena vichamuriana, tikawasana'i te Laodicea. Apaesa ena naimamekawareni eta juka najure'i. Nímiamareka'iwasera eta najure naye'e namutu ena. Te táitekapaucha'e, échejiku'ayareware eti apanawa.

¹⁷ Emetakayare ema Arquipo: “Mameta maitaucha tamutu eta juka maématanerepiana'i, taicha eta matupara'a'i me Viákenu.”

¹⁸ Nuti Pablo, nútikene nájucha eta juka táichekuaraki'i eta najure taye'e eta némechejirisira'e'i. Eyaseasinanu eta núchukuirawanena te juka nukaerataiya'i. Nuyaseucha'eparaka me Viákenu, táetaviucha'ini eta iúrikakarewaya máicha.