Colosenses 3 - Táurinakene máechejiriruwa’i ema Viya tikaijare

¹ Puítisera arairupa eta ítaresira maicha ema Cristo, étainapa ti'apasamurereka'eyare eta máuriwa'i ema étapa eta ítekapauchira ema taye'e eta anuma máejasi'a'i te mawaure ema Maiya.

² Epanerecha eta vichakeneanayare te anuma, waipa étaima'i ti'apasamureka'avima'i eta viye'erepianaini'i tamaurikeneana'i te juka apake'e.

³ Taicha íjararuwaipa eta ínajisirayare eta júkana, puiti tikaitareka'eipa ema táichavene'i eta iáwa'asiraipa ema Jesucristo.

⁴ Té'esera te machawa ema Viákenu Jesucristo, máitsiwachainapa eta iáke'eanayare. Tási'a ekachanenapaipa ema, tétavikawaya eta viúrikakarewaya vimutu máicha.

Vínajikayare eta viye'erepini eta viásinekene

⁵ Tási'a puiti, ínajikainapa eta eye'erepianaini tamaurikeneana'i: nakuijapa nakuve'a esu apana esena, waipa ekupanerecha eta panererukana tamaurikeneana, waipa ti'apapirika'ema'i eta ekaima'akeneraina, taicha ena titanukana'i eta juka, nakuti'i nákani tikasiñarajiana.

⁶ Ena masuapajiraira'ana, náicha'i tamutu eta juka tamaurikeneana, étapa tímikuñakayare'i ena, taicha táimiyusemakaichucha ema Viya.

⁷ Eti apanaware etainaichu'iware iáwaku'aini'i kape juka iásinekene'i,

⁸ Puítisera ínajika tamutu eta júkana: esemarajiwana, ekatianaraiwana, ewínarajiwana, iúme'araiwana, étapa eta táiñema'ikeneana eta échejiriruwana.

⁹ Wa'i ekuépiyaekene'akaka, ímereuchawa yátupina eta ínajisira'i tamutu eta eye'erepianaini kape juka ítaresiraini'i,

¹⁰ puíticha, amairi'apa arairupa eta juka ítaresira'i machicha'eipa ema Viya: tajurukapaipaini eta ekutirayare ema eta masantuwa'i étapa eta máuriwa'i ema.

¹¹ Tayanapane apawasananaji'avi'i viti vé'ikana'i ema Viákenu, émasera ti'etamuricha'avipa viti israelítana, étipa eti apawasanana, énapa ena máikachasianana, te mamira'u ema Cristo, waipa apawasananaji'avina'ini, étanainepa eta víma'i maicha ema, tayanapane tájina ikutiaraina te iáke'eana, wá'isera tikachuriaka'eanaima'i ena tinakana'i eta naikutiarana te nake'e, tayanapaneware ekakenu'ipuka, wá'iwaresera vikachuriaka'ema'i viti wa'i musu'avina, ema Cristo tiáwa'aka'avi'i vimutu.

¹² Ema Viya tétavikawa'i eta máemunasira'e'i, eta taka'e, tinerejika'e'i eti machaneranayare'i ema, ekutipaipa ema, eta masantuwa'i. Eta taka'e, puiti étijiwainapa ekarawa'uyare eta táuriwayare eta ítaresirayare, étaviuchayare eta ejapanuraiwaya, émunara'iyarewa, ímerekaya eta emansuwayare, ekamicha tamutu.

¹³ Te tatiari'inapuka eta náejekapirawaina ena echamuriana eta eye'e, wa'i ekukaticha, ekamicha. Ejapanuyare, ekutiyare ema Cristo eta majapanuira'e'i eti.

¹⁴ Tamutu eta juka numetaru'eana'i, ítauchayare, énerichuware tiápajukawayare eta émunaraiwayare, taicha te vémunajirikaka'i, tétavikawayare'i eta viúrikakarewaya eta viúrujiasirakaka'i.

¹⁵ Ísapawaware maye'e ema Cristo makanaraka'e tamutu eta epanereruana, taicha taka'e'i eta máichuira'e'i, mawara'a'i etanayaréichu'i eta epanereruana eta iúrujiasirakaka'i. E'asulupayacha'iwaréni tamutu sácheana.

¹⁶ Étaviucha'ini eta iúnasiraina te esamureana eta máechejiriruwana ema Cristo. Étumechakaka'ini eta ímitusirakakaya eta échemaraiwayare, ewapinawa'ini te esamureana eta ejiraira te iúrujisirawana, ejirayare eta majiria'uana ema Viya, eta e'asulupayachirayare'i ema.

¹⁷ Tamutu jákani ekaematanerana, échejirisirawana, ímereuchawa eta machanera'eira'i ema Viákenu Jesucristo, iámirapaipa eta máijare, te tamutu eta jákani íchararakawana, e'asulupayachayare'i ema Tata Vikaiyakene.

Vímerekayare eta viúriwa naye'e ena vichamuriana

¹⁸ Éti'ipa eti esenana ekaimakeneanaripa'i, epikauchayare'i ena ímanaveana, esuapajira'iyare eta naye'e, taicha etupara'a'i eta é'isira'i ema Viákenu.

¹⁹ Eti apanaware eti náimanaveana'i, émunakayare ena eyenana, wa'i ekuímipananajika ena.

²⁰ Eti apanawa eti amaperuana, esuapayare ena tikachicha'eana, esamararasinawaya te jákani náechejisira'eana, te ítaucha eta juka, ekurisamurechayare ema Viya.

²¹ Éneichuwa eti náiyana, wa'i ekuimiyusémaraka ena echichanaveana apaesa wa'i nakupuñakawa eta eye'e.

²² Éti'ipa eti ekakenurekana'i, esuapajira'iyare naye'e ena iákenuana'i, ítauchayare eta nawanairipiana'i, tátupiruwa te esamureana eta ekaematanerana, wa'i tákarichuima'i ítaura'iyare te natiari'i te echakaya ena iákenuana'i, te nájina'ipuka, takutiyareichu eta ekaematanerayare, taicha ema Viya tímararaka'e'i, ema epikauchayare'i.

²³ Ewapinawayare icha eta ewanekasiwana'i naye'e ena iákenuana, táimikutijirikawa'i émaina'ini ekaemataneaka ema Viákenu.

²⁴ Taicha eti mamusura'e'iware ema Cristo, ema tiápajukawa'i iákenupana'i, échaichu'i eti eta tatiari'ira'i eta íkuchi'i íjarakasiyare'i eta maye'e.

²⁵ Énasera ena téjekapawanapuka, máimararaka'i ema Viya eta náejekapirawana'i, etainapa tímikuñakayare'i, nájina mamunanekeneanaima'i.