Colosenses 2 - Táurinakene máechejiriruwa’i ema Viya tikaijare

¹ Nuti ichapemuri'i eta néñamirawa'i eye'e eti numaimatikeneanaicha'a, énapa ena apamuriana vichamuriana'iware tikawasana'i te Laodicea.

² Nuwara'a'i ámutu'ini étumechawa'ini te esamureana, ewapinawa'ini te iúrujisirawana taicha eta émunasirakaka'i, nuwara'a yátupina ímati ema Cristo, éma'i araenuma'i wanairuka'i me Viya, nuwara'a'iware ímatiekene'ayare eta mapanereruana ema Viya apaesa ichapena'ini eta ekasiñairawaina'ini eta maye'e.

³ Nájina mákuti ema Cristo, ema tíjaraka'avi'i tamutu eta vítupajijiasirawana'i, véchemara'iwaka'i máicha.

⁴ Eta taka'e, nutuparaka'echa, wa'i ekuisapawa na'apapika'e ena tiyurura'iana.

⁵ Tayanapane viyere'ikaka'i, wa'i víma'akaka'ini, núrisamure'isera tikuti'ine'i étaina'ini návi'a'ini eta ara eye'e, néchira'i eta tamajinaira'i íchirawaina'ini, yátupi'i esuapa eta é'isira'i ema Cristo.

Eta arairu vitaresira maye'e ema Jesucristo

⁶ Taka'e puiti eta e'isira'i ema Viakenu Jesucristo émaipa'i iákenu'i, tawara'asera itauchayare eta mawanairipiana takaechera eta é'isira,

⁷ etupi'ayare muraka maye'e ema Cristo, apaesa tápajukawapaipa eta ekasiñawaira me Viya, yatupina esuapa eta naimitusira'ae'i, wa'iware ekukainajiruwa eta e'asulupayachiraya ema Viya.

⁸ Échapawayaresera: taicha narari'i ena nawara'ayare tiyuruka'eana, nawarairaya é'ika eta napanereruana, etapa eta naimiturapiana namaurikeneana, taicha ena wa'i nakasiña'ini ema Cristo, etachucha nae'ika eta naye'erepiana ena achaneana, enapa ena machanera ema techa'i eta juka apake'e.

⁹ Ema Viákenu Jesucristo, jé'eware ema, yátupikene'i santu, taicha tikutikakana'i ema Tata Vikaiyakene eta nasantuwana'i ena, tikutikakana'iware eta náuriwa'i, étapa eta náitupajijiasirawa'i,

¹⁰ puiti eta iáwa'asiraipa ema Cristo, tisantucha'ewakaipa'i ema. Tájinapa ákamunu'ini puiti eta iuchukuirapa, taicha ema Viákenu, ema túmepana'i.

¹¹ Ema Cristo, manakaipa eta maikutiara te iáchanewana puiti eta iáwa'asiraipa ema. Jé'ewarekene, eta íkutiara'i eti, ekachurika'i eta naimikutiarachakenewa'i ena israelítana náechatisira'i eta náke'e.

¹² Te ekaikachasipa eti maye'e ema Cristo, taka'e eti eneichuware échawapa itareka maye'e ema Cristo taichavene eta esuapira'i eta maitupajijiasirawa'i ema Viya, ema timichawa'i tikaitareka'e'i.

¹³ Kape te tinapukapa, eti takuti'i eta épenakenena'ini, taichavene eta ekapekaturaira'i, wicha'aware ejachapa'ini eta ikutiarana, puitisera ema Viya tijaraka'epa eta arairu itaresira ekachanepa ema Cristo, etavene eta makaepa'airapa eta epekaturanaini.

¹⁴ Ema Viya, makaepa'apa eta vitapirawanaini, eta tiviucha'avini'i viti, eta tapamisira'avini'i vicha eta taye'erepiana. Makaepa'apasera tamutu eta maepenira'i te crusu, eta vipekaturanaini timikuñaka'aviyare'ini.

¹⁵ Eta máepenira'i ema Jesús taye'e eta crusu, máita'akawakaipa ema wínaraji énapa ena machanerana éreanana, tájinane'i natumewaina'ini eta maye'e, puiti tákijikawaka'i ena, te vipiaraka te máijare ema Jesús, waipa tipaucha'avima'i.

¹⁶ Puítisera, nakuija nakupanararacha'e eti eta enikakeneana, étapa eta érakeneana, étaipa eta íchira eta epiestara, te aracheruana kaje, étaipa eta sache sáwarumu'uana.

¹⁷ Tamutu eta júkana takunachucha eta taiteruyare, étasera eta juka yátupikene éma'i ema Cristo.

¹⁸ Eta taka'e, wa'i ekusuapa ena nákani nawara'a típikarareka'eana, te náicha'epuka, wa'i tiuri eta juka é'iru'i, wá'isera ekusuapawaka, te tikamesajirika'eana'ipuka éstakawa, étapa eta ejirauchirainaji ena ángeleana, timijachawana'i tiuriana, tímijachawanapa máechejikawaka ema Viya, naepiya'iraiwachuchasera, etachucha napanerecha eta nakasiñawawaisira, etapa eta tamaurikeneana.

¹⁹ Ena wa'i naurujika'ini ema Cristo, ema techa'i eta tajurusirayare'i eta nake'eana eta maenisirayare etapa eta makurujisirayare eta apánapanenejiana nake'eana emasera techa'i eta mapanereru'i.

²⁰ Etisera épenaipa'i maye'e ema Cristo waipa etaina'ini esuapa'ini eta tajiparakana taye'e te juka apake'e. ¿Taja'a takayema icha eta tamaurikeneana takutipa ena maecharaireanate juka apake'e.

²¹ Takayema: “Wa'i pikuemamaka eta jara, wa'i pikúnika eta jena, wa'i pikuve'a te piwa'uana”?

²² Tamutu etajuka wanairipiana vima'akeneana naye'erepiana tamutu titawayare, taicha etachucha naye'erepi'i ena achaneana.

²³ Eta juka naye'erepiana kútirine'i yátupikenena'ini tási'akenena'ini eta me Viya. Tási'asera wa'i táimanaka, ichape tayere'i eta máechejiriruwana, ena nani, tímijachawana'i nakurisamurecha'i ema Viya, tépiyakawanapa mánsuana'i eta náichira'i eta muraka natajiwa, téstakawanapa náijararekapa eta naeche taye'e eta takatikene, tamapuruji'isera eta náichira'i, náviraichu'i náicha'i eta tajamuraraiwa'i eta náke'eana.