Apocalipsis 7 - Táurinakene máechejiriruwa’i ema Viya tikaijare

Ema Viya makatiuchawakayare ena manerejiruana

¹ Taka'e, níma'apa ena panakeneana ángeleana, titupi'ana'i te táina'u eta juka apake'e, náichejimiraurusira'i tamutu eta tékatikawana, apaesa takuija eta tékatikawa te apake'e, étaipa te ichape une, étawanerekaina'ipukaini eta yukukiana.

² Éneichuware níma'awarepa ema apana ángele tiási'a'i te táuchusine'i eta sache, makarataka'i eta maye'e sello ema yátupikene Viya Vikaiyakene. Ema maka ángele máechejikawakapa muraka ena kuatrukeneana ángeleana tikawana'iana'i naikuñaka eta apake'e étapa eta ichape une:

³ “¡Wicha'a ekukamirika eta táikuñayare eta apake'e, eta ichape une, étapa eta yukukiana, tapaenumawaya te vinakapa eta maye'e sello te nana'uana ena mawanarana ema Viya!”

⁴ Tási'a, te tamutupa eta nasellaresira'i, nusamapa eta natupa ena 144,000 eta nasimutuwa. Nási'akeneana'i naye'e ena dósemurikeneana israelítana.

⁵ Doce mil ena tikasellana'i machichanavékeneana ema Judá, doce mílware ena machichanavékeneana ema Rubén. Duce mílware ena machichanavékeneana ema Gad,

⁶ doce mílware ena tikasellana'i ena machichanavékeneana ema Aser, duce mílware ena machichanavékeneana ema Neftalí, doce mílware ena machichanavékeneana ema Manasés,

⁷ duce mílware tikasellana'i ena machichanavékeneana ema Simeón, doce mílware ena machichanavékeneana ema Leví, duce mílware ena machichanavékeneana ema Isacar,

⁸ doce mílware tikasellana'i ena machichanavékeneana ema Zabulón, duce mílware ena machichanavékeneana ema José, doce mílware ena machichanavékeneana ema Benjamín.

⁹ Taka'e, níma'awarepa ena kamurikeneana achaneana tiási'ana te tamutu awasareana, apaechejiriruwakeneana. Waipa titupachakareana eta nasimutuwa'i. Titupi'ana'i ena te tamira'u eta trono, mávi'a'i ema Cordero, tijapumuiri'awaka eta namuiri'ana, tási'a nakarataka'i te nawa'uana eta káchipaka.

¹⁰ Namutupa tipiarakana'i muraka: “¡Pítipa pikuchuku'a'aviya, piti Tata Vikaiyakene piti pejaka'a'i te piye'e trono, émapa ema Cordero!”

¹¹ Táis'a, namutu ena ángeleana titupi'ana'i te tachakayaka'i eta trono, tási'a nachayaka'iware ena kuatrukeneana ekutiarareana'i, énapa ena víyakara'ana. Tási'a, tépuyukanapa te tamira'u eta trono, tétipaimuri'anapa, natsiukapa ema Viya

¹² naka'epa: “¡Eta vika'eyare! Maitawakakayare eta vitsiusiraviyare, taicha tétavikawapa eta pikunachakarewa'i, tetavikawaware eta pimatiekene'aira'i tamutu, étapa eta pipikauchakarewa, étapa eta pitumewa pikarichu piti pécha'avi'i. Ichape eta vi'asulupayachiravi'i, ¡Eta vika'eyare!”

¹³ Taka'e, ema émana víyakara'a tiyaserekanupa: “¿Nája'asika ena nani tijapuiri'ana'i, tási'a tavi'aware nási'a?”

¹⁴ “Piti pecha'i Tata”, nujikapapa. Tási'a ema máichanuwarepa: “Ena nani énara ena nakatajiwakeneana'i, tiúchuku'anaipasera, tikasipaipa puiti eta náchanewana taye'e eta máitine ema Cordero, puiti tikamuiri'anapa eta tijapu.

¹⁵ “Eta taka'e, titupi'ana'i te tamira'u eta trono mávi'a'i ema Viya, tási'a tamutu sácheana yátiana naitati'i te maye'e'i templo. Ema tejaka'i te trono ema majaneakawaka'i.

¹⁶ Ena nani waipa tikatajiwanaima'i eta namaunewa, wáipaware taijuchaima'i eta táijurewa eta sache, etainapukaini eta tijuru'i takaeñamaka'ini,

¹⁷ Taicha ema Cordero, ema tiávi'a'i te enumu'u eta trono, émainapa ema eye'eyare pastor tási'a emainapa tiama'eyare, eta te une tiuriama tikaitarera'i, tási'a ema Viya makamitiasinayare eta náiyaira.”