Apocalipsis 4 - Táurinakene máechejiriruwa’i ema Viya tikaijare

Ema Juan máima'a eta natsiuresira te anuma

¹ Te táekenepa eta juka, níma'awarepa téjiaka'i eta anuma; nusamawarepa eta ma'u ema, émaichu'i ema tínapuka'i téchejikanu'i. Tirure'ucha eta ma'u. Tíchu'anupa, ánipa maka'e: “Yare, piápana. Nuwara'a nímechaviyare eta táicharakawayare puiti juka vikaiju'eyare.”

² Taka'e, eta nusamira'i, ema Machanewa Viya tíjarakanupa eta nukaikutiarairayare tamutu eta níma'akeneanayare'i. Níma'apa ema Viya, téjaka'i te maye'e trono te anuma.

³ Tiáramikare'i eta máima'i, tétavikawa'i eta máurinawa'i, takuti'i eta tajanunusira eta márija'i jaspe étapa eta rubí. Tétavikawa eta tajaraiwa'i takutiyaréni táima'i eta a'e eta táurinawa, tachayaka'i eta trono;

⁴ Te távi'a'i eta ichape trono, tavikuaka'iware eta véinticuatru trono. Natiari'iware ena véintikuatruanaware téjakana'i taye'e, víyara'ana tuparairukana: tijapu amairi'a eta namuiri'ana. Namutu tikaye'eana'i corona te nachutiana, amairi'a'i uru.

⁵ Tási'a téramemeka, tási'akene'i taye'e eta trono. Nusamaware tirure'uchana'i. Tási'a, tatiari'i'i te tamira'u eta trono eta sipi tijara'iwaka takutiyaréni tanene eta yuku. Ena'i ena sipikeneana arcángeleana maye'eana ema Viya.

⁶ Tijararakaware te tamira'u eta trono takutipa eta tajara'iwa'i eta ichape une. Natiari'iware ena kuatrukeneana tijanearekana'i te machakaya ema Viya. Ena, ekutiarareana eta máitupajijiasirawa. Takutima'i tikauki'awaka'i te namira'u té'epa nachepa. Tikauki'awaka'i amairi'a'i eta te nake'eana.

⁷ Ema tínapuka'i mawasima'iyaréni eta sárare táñe'ikene itiare. Ema apana mawasima'iyaréni eta turu'e. Ema apana makutima'iyaréni achanemira. Ema apana makutima'iyaréni eta ichape'i máti'i tiárarairika'i.

⁸ Taka'e, ena nani kuatrukeneana, saisi eta napawana. Tikauki'awakaware amairi'a eta napawana. Ena nani, wa'i táechuki'a'ini eta nakunachira'i ema Viya, ema akanewakakene eta máitaresira'i. Tamutu'i sácheana, yátiana naka'e'i: “Santu, Santu, Santu, tétavikawa'i eta pisantuwa, piti Tata, tétavikawa'iware eta pítupajijiasirawa'i, Puiti vi'asulupayachavi'i eta pichaviraya”

⁹ Ena ekutiarareana na'asulupayacha'i. Puiti pinasi'ichuware eta viye'e. Píti'ichuware pinasiyare te táitawapa tamutu. Piti pitiari'ikene'i te tépanawainapa eta apake'e.

¹⁰ Énawarepa ena véintikuatrukeneana víyara'ana tuparairukana tépuyukana'i te mamira'u ema Viya, mávi'a'i te maye'e trono. Nakamawa'upa eta naye'eana corona. Titsiurekanaware. Ánipa naka'e:

¹¹ “¡Tata Víyakene, piti Viákenuvi'i! ¡Tétavikawa'i eta piúriwa'i! Ichapekene'i eta vikunachiravi'i. Taicha píti pépiyaka'i akane tamutu eta juka víma'akeneana'i puiti. Píti'ichuware pécha'i puiti tamutu eta pépiyaruana'i.”