Apocalipsis 21 - Táurinakene máechejiriruwa’i ema Viya tikaijare

¹ Níma'awarepa eta anuma arairu, eta apake'e arairu, taicha eta tainapureanuma eta apake'e temitiakaipa etapa eta ichape une.

Eta arairu Jerusalén

² Tási'a, níma'awarepa eta tiúrina awasare, tikaijare'i Arairu Jerusalén, tétavikawa'i eta tasantuwa, taicha tási'apa'i te anuma te mávi'a'i ema Viya. Tiúrinapa'i eta takaetupiri'ira'i, takuti'i te tikaetupiri'i esu araimayare.

³ Nusamawarepa muraka eta ma'u ema ángele, tiási'a'i te anuma. Ánipa maka'e: “Puiti, ema Viya makukupaikapa eta mapena te juka apake'e, áninapa mavi'ayare viye'e viti achaneana. Tiáwa'aka'enapa eti achaneana, yátupikenenapa Ekaiyakeneya ema.

⁴ Taka'e, ema Viya makamitiasina'eyare eta íyairana, wáipaware épenaima'i, wáipaware ekatisamurewaima'i, tájinapa tikaiyaka'ema'i, wáipaware ekatajiwaima'i taicha tájinapa tiviucha'ema'i.”

⁵ Taka'e, nusamawarepa eta ma'u ema Viya te maye'e trono ánipa maka'e: “Puiti tépanawapa arairu, tamutupa tikaitsiwa nicha nuti.” Tási'a, ániware maka'e: “Piájuchayare puiti eta juka, taicha yátupikeneya eta táichararakawaya, tamutuyare títauchawa, je'eware eta tisuapakareana.”

⁶ Ániwarepa maichanu: “Títauchawapa puiti tamutu eta nupanereruana, nútira nécha'i tamutu eta táepanirawa'i eta apake'e, núti'ichuware nécha'i eta táimiyanirawa'i tiuri, puiti nuti nítauchapa tamutu. Eti emáune'i, nuti níjaraka'eyare eta máitawakaka une tikaitarekara'i, tájina wa'i ewacharekaima'i.

⁷ Takutikene, eti ekamichana'i, ímiyanawa'i eta é'isiranu'i, níjaraka'eyare tamutu eta júkana íkuchianayare'i, nuti ekaiyakeneya, tási'a eti nuchicha'enapa.

⁸ Tikaikuñanayaresera namutu ena tipiturijiana, ena masuapajiraira'ana, ena máeperajiana, ena tikapa'iana, ena tú'usiana, ena iápemareana, ena tikasiñarajiana eta achanemirana, énapa ena tépiya'ira'iana, tikakijianayare namutu ena taye'e eta náikuchi táijurekene táetiraraisina yuku, máitawakaka eta tamuruira, wá'ikene tiúchukanaima'i taye'e.”

⁹ Taka'e, tipauchanupa ema émana ángele nasietene'i ena tikaratakana'i eta siétekene escudilla tiámapa'i eta siétekene ekuñarakiana táiñe'ikeneana, tási'a, máichanupa: “Yare, nímechaviyare eta awasare, návi'a'i ena machanerana ema Cordero. Tímikutijirikawa'i esu araima sukaetupiri'ikene'i eta suítauchirawayare.”

¹⁰ Tási'a, ema Machanewa Viya tímima'anu'i eta mawara'akene tímechanuya, ema ángele tiámanupa eta te tápusi eta ichapekene mari anuke'ekene, tímechanupa eta táukupaisira'i te anuma eta awasare Arairu Jerusalén. Tétavikawa'i eta tasantuwa taicha tási'a'i te mamira'u ema Viya.

¹¹ Eta juka awasare, tétavikawa'i eta tajaraiwapa'i taicha tiáma'i eta majaraiwa'i ema Viya, eta táima'i eta tajaraiwa'i takutiyareni eta tajanunusira eta márija'i tijararaka'i.

¹² Te tachachaku eta awasare, tatiari'i eta takuti yúchama timítutuche, anuke'e eta táichapewa, tatiari'i eta dósekene tapajakurana, távi'a'i eta ajureka náijare ena dúsekeneanaini náchukanaini ena israelítana, etiari'iware ena ángeleana taye'e eta tapajakurana.

¹³ Tatiari'i mapana tapajakura te tinapaika eta táuchusine eta sache, mapanaware tapajakura te tinapaika eta kaja'a, mapanaware tapajakura te tinapaika eta wana. Tási'a, eta mapanakeneware te tinapaika eta tasiapine eta sache.

¹⁴ Te apake'e eta yúchama, tatiari'i eta doce márimeana táeja'ameruana'i eta yúchama, táma'i eta dósekene náijareana ena apústuleana maye'eana'i ema Cordero.

¹⁵ Ema ángele ema téchejikanu'i makarataka'i eta máikutiriki úruki, máikutichi'ayare eta tapajakurana étapa eta yúchamana.

¹⁶ Eta awasare falaru eta táima'i, eta táunawa tikutikaka'i eta taju'e. Ema ángele maikutichapa te maikutiriki, dos mil doscientos kilómetro eta táichapewa eta awasare, tikutikaka'i eta táunawa, eta tánukewa, étapa eta taju'e.

¹⁷ Taka'e máikutichaware eta yúchama: Sesenta y sinku metro eta tánukewa, taye'e eta naikutiriki ena achaneana, eta maikutichi'a'i ema ángele.

¹⁸ Eta yúchama amairi'a mari jaspe timájumeana. Eta awasare amairi'a eta yátupikene uru. Tijanunuka'i takuti eta cristale eta tajara'iwa'i.

¹⁹ Eta márimeana tachunusipéwana'i eta yúchama, tatiari'i'i eta táurinakeneana mari. Eta tínapuka takaye'e'i eta mari tikaijare jaspe. Eta apana takaye'e'i eta tikaijare zafiro. Eta apana takaye'e'i eta tikaijare ágata. Eta apana takaye'e'i eta tikaijare esmeralda,

²⁰ eta apana takaye'e'i eta tikaijare ónice. Eta apana takaye'e'i eta tikaijare rubí. Eta apana takaye'e'i eta tikaijare crisólito. Eta apana takaye'e'i eta tikaijare berilo. Eta apana takaye'e'i eta tikaijare topacio. Eta apana takaye'e'i eta tikaijare crisoprasa. Eta apana takaye'e'i eta tikaijare jacinto. Eta tékene'a takaye'e'i eta tikaijare amatista.

²¹ Eta dósekene tapajana takaye'e'i eta doce perla. Taye'epachu'i eta tapaja eta étana perla. Eta tínapuka calle, takaye'e eta yátupikene uru, tijanunuka'i takuti eta cristale eta tajara'iwa'i.

²² Te jena awasare, tájina níma'a'ini eta templo nayujarasiraréna'ini. Tájina tákamunu'ini eta nayujarasirareyare, taicha matiari'i'i ema Viya máitupajiji'akene máituruekene'aware tamutu, émapa ema Cordero.

²³ Takutikene, wa'i tákamunu'ini eta sache, étaipa eta kaje eta tamikauchiraina'ini eta awasare, taicha tamikaucha'i eta majaraiwa ema Viya, émapa ema Cordero.

²⁴ Éneichuware ena akenukana te awasareana, ichape eta námawa'uanayare me Viya te jena awasare mávi'a'i ema.

²⁵ Tájina táimatiyaima'i tikaerata eta tapajana, taicha tájina timapikuina taye'e, tájinaware yátina.

²⁶ Tisuapajira'ianayare'i taye'e eta wanairipiana tási'akeneana'i eta juka máwasa ema Viya.

²⁷ Tájina náimatiyaima'i tisiapana ena nachipejikeneana énaipa ena tíchara'iana eta tamaeperajiwakeneana, énaipa ena tikaetemara'iana. Nakarichu tatuparaka tisiapanayare ena tatiari'i eta náijareana taye'e eta libro makarataru ema Cordero, tiama eta nakunana ena náitareruanayare.