Apocalipsis 20 - Táurinakene máechejiriruwa’i ema Viya tikaijare

Eta máita'airayare ema Wínaraji

¹ Níma'awarepa ema émana ángele mási'apa'i eta te anuma, mámapa'i eta ichapepi cadena, étapa eta llave, takaerataiyayare eta táupenakene pusu.

² Taka'e, ema ángele makaratakapa eta táiñe'ikene ichape kichare, eta tikaetemarereka'i akane, émaichu'i ema Wínaraji tási'a émapa ema Ereana, tási'a, maitiakapa taye'e eta ichapepi cadena, mil añuyare eta makaiti'airayare'i.

³ Taka'e, ema ángele mákijikapa te táupenakene'i máwaku pusu etapa maeratasi'a, manakapa eta taikutiara, te tapaja apaesa waipa makuwayaka namutu eta awasareana, tiamainukawa te taetavikawapa eta mil añu, te táekenepasera eta mil añu, tiúchujikainawarepa eta tikaetemarekainawarepa, ánipinesera.

⁴ Níma'warepa eta trono, tejakana'i taye'e, ena tijachapana'i eta natupara'ana juéseanaipa'i. Níma'awarepa eta nachanewana ena achaneana, ena táimikaparuana'i eta náe'isira'i ema Jesús, étaipa eta nakametarairuira'i eta máechejiriruwa ema Viya. Ena nani, wa'i náepuyumiraucha'ini eta útsutsure, wá'iware natsiuka'ini eta máima'i nasiñaraji'i ena apamuriana achaneana, wá'iware náwara'a'ini nanaka eta naikutiara eta te nana'u étapa te nawa'u. Níma'awarepa eta nachavirapa titarekana, tási'a tiapechawanainapa katupara'ana, nakáchanenapa ema Viya, mil añu eta nakatupara'airayare.

⁵ Énasera ena apamuriana náepenakeneanapa masuapajiraira'anaini'i, wicha'a téchepukanaima'i. Tiámainukawa te táekenenapa eta mil añu, napaenumawainapa téchepukanayare.

⁶ ¡Tiúrikakareanayare ena nani tiápechawanayare títarekana puiti juka masantuchainapa ema Viya! Waipa tiápechawanaima'i tépenana, tiyujarakara'ianaya maye'e ema Viya, étapa me Cristo. Taicha ema Cristo máijarakainapa eta mil añu eta nakatupara'airayare.

⁷ Te táekenenapa eta mil añu, tiúchukainawarepa ema Wínaraji taye'e eta makaerataiya'i,

⁸ tási'a tiuchukainapa, tépanawainapa tikaetemarerekayare naye'e ena achaneana te tamutu awasareana. Étaipa eta apinakene awasare tikaijare Gog étapa eta Magog, makaetemaresi'ayare. Tási'a, tikurujikakanainapa ena naye'eana ejército. Tétavikawainapa eta nasimutuwayare takutiyare eta tawaparu te ichapeama une.

⁹ Taka'e tiyananapa, ichapekuekeanapaine eta nayanine, taicha eta nasimutuwa'i. Nakapayakayare'i eta nachayasirayare eta awasare máemunaruini'i ema Viya, návi'a'i ena machanerana. Émasera, enewanepa máitaekene'awaka'i, tiúkupaikapa eta yuku tiási'a te anuma, táijuchawakapa namutu.

¹⁰ Tási'a ema Wínaraji, ema tiwayuarekaini'i, nakaratakapa náepujukichapa taye'e eta táijurekene yuku, táetiraraisina eta tamuruira, étaipa eta mávi'a'i ema útsutsure, émapa ema Falso Profeta. Tájina nanarasiraima'i, tamutu sacheana yátiana, máichekuarakireya eta nakatajiwairaya.

Tiáma'aviyare eta víchakeneana'i taye'e eta viávi'ayare

¹¹ Níma'awarepa eta ichapekene trono tijapu, tási'a téjaka'i ema Viya taye'e. Eta nímararasira'i ema, nukamitiakapa. Waipa necha távi'apuka návi'a'i té'epuka anuma, té'epuka apake'e.

¹² Tási'a níma'awarepa namutu ena náepenakeneanaini, ena amaperuana, énapa ena ichanaruana, namutu titupi'ana'i te mamira'u ema Viya téjaka'i te trono, tási'a tatiari'i eta libro tiama eta najukunana ena náitareruanaya. Tatiari'iware eta apamuriana libro takajuiya'i eta náichawakenewana'i ena achaneana.

¹³ Ena naeriruana'i te ichape une, téchepukanapa namutu eta nachanewana, kayesesere'ianainapa te mamira'u Viya, tamutu eta naichakeneana'i tamaurikeneana te achaneanaicha'a'i, etapa najachapi'ayare eta náikuñayare.

¹⁴ Eta nakaikuñaiya'i eta táijurekene yuku, táetiraraisina eta tamuruira. Tamutu eta juka maitawakakainapa eta náepeniraya.

¹⁵ Tasi'a etapa ánaki, nakakijiya'i ena tájina'i takaju'ini eta náijarena, taye'e eta Ajureka máitawakaka.