Apocalipsis 17 - Táurinakene máechejiriruwa’i ema Viya tikaijare

Eta máima'akene eta taitekapirayare eta ekuñaraki

¹ Tási'a, tipauchanupa ema émana ángele nasietene'i ena tikaratakana'i eta escudillana. Máichanupa: “Yare, nímechaviyare eta suíkuñayare esu esena tú'usi, tawayurewa'i eta supekaturana, esu, tejaka'i te tachausi eta ichape une.

² Ena akenukana te juka apake'e namutu'i suíturukawaka sukachanewaka ena, suíchu'aware ena suwara'akeneana'i suíturukawaka taye'e tamutu eta tájiparakana tamaurikeneana, maichanupa.”

³ Taka'e, ema Machanewa Viya tímima'anu'i eta mawara'akeneana tímechanuya ema ángele, ema ángele tiámanupa taye'e eta máwapa'i apake'e. Ánaki níma'apa esu esena téjaka'i te táina'u eta táiñe'ikene sárare, machanewa'i ema Útsutsure, titsi eta táima'i, te táke'e, amairi'a eta ajureka táimijarechawa'i, tímijachawa'i Víyaina'ini, siete eta tachutiana, diez eta taji'uana.

Esu esena tejaka'i te taina'u eta Útsutsure

⁴ Esu suka esena, eta táima'i eta sumuiri'a mularume étapa eta titsi, tétavikawa'i táurinawawaka'i eta suyereruwana, amairi'a uru, étapa eta táurinakeneana márija'ichichana, étapa eta tiurinana perla. Tási'a, te suwa'u sukarataka'i eta ichape suéreresi uru, tiáma'i eta tájiparakana pekatuana táiñema'ikeneana suíchakeneana'i eta suítaresira'i sutu'usiwa'i,

⁵ te suchuti, tatiari'i'i eta ajureka eta suíjaru'i, tayumururewachuchasera eta takayemakene'i: “Eta ichapekene awasare Babilonia, naena ena tú'usiana, tákenuyare eta tájiparakana táiñema'ikeneana.”

⁶ Nukaikutiarapasera eta suícharakawa'i esu esena tikawa'a'i esu, táekawa'acha'i taicha eta suérira'i eta náitineamaini ena machanerana ema Viya, ena suímikaparuana'i taicha eta náechejisi'aira'i ema Jesús. Eta nímaira'i, eta juka, ichaperine'i eta náramesira'i.

⁷ Taka'e, máichanupa ema ángele: “¿Tája'a takayema piárameka? Numetakaviyare puiti eta takayemakene eta juka píma'akene'i suye'e esu suka esena, étapa eta sárare Útsutsure supera'i, eta siétekene'i tachuti, eta diéskene'i taji'uana.

⁸ Eta juka sárare píma'akene'i, tanasikeneipa'ineni akane, tájinaipa'isera puiti, tiúchujikayarewaresera tási'aya taye'e eta táupenakene pusu, te tane'ipa eta takaikuñairayare pajarainapa. Ena achaneana tikawasana'i te juka apake'e, namutu ena tájina'i eta nakaju'ini taye'e eta Ajureka te tepanawainapa eta apake'e, ichape eta náramesirayare, te naima'apa eta Útsutsure, tanasikeneni'i akane, puitisera tajinaipa'i, tichawayaresera titareka.

⁹ “Puitisera tikaecherainapa ena yatupikeneana techemara'ina: Eta juka siétekene tachuti eta sárare takuna'i eta siétekene mawapa'i wama'i eta suejasi'a'i esu esena, etaichuwasera takuna'i ena sietekeneana akenukana.

¹⁰ Takutikene eta juka siétekene tachuti eta sárare náikutiarana'i ena siétekeneana akenukana. Sínkuanapasera ena nájinaipa puiti, matiari'isera ema émana akenukaicha'a puiti, ema apana wicha'a títekapa'i, té'esera te máitekapapa ema tékene'ayare, waipa tiyerema'i.

¹¹ Étaichuware eta sárare útsutsure táitareruini'i akane, tájinaripa'isera puiti, eta, makuna'i ema na'uchune ena siétekeneana akenukana, émaichu'ineni ema nachamuri'i ena sietekeneana, te máuchujikapa, majakapayare eta máwakureyare, tíja'uchawayasera eta máitaviraya.

¹² “Eta píma'akene'i diéskene taji'uana nakuna'i ena apamuriana diéskeneana akenukanayare, wícha'asera tikatuparakasiana, najakapayaresera eta natupara'anaya ena akenukanaya nakachaneyare eta Útsutsure. Ánipichusera naka'eyare.

¹³ Ena nani diéskeneana akenukana tínunana eta napanereru, náimikatakaya eta útsutsure eta akenukairana'i te náwasana.

¹⁴ Taka'e, ena nani nakanarainapa ema Cordero, wá'isera nárata'aima'i, máita'akawakayare'i ema Cordero. Taicha ema, yátupikene'i Rey, Akenuka'iware, mawaneka'i ena reyeana énapa ena akenukana, natiari'iyarewa ena makachanekeneanayare ema, nakanerejikene'i eta máichuira'i ema Viya, taicha, yátupi'i eta náe'isira'i ema.”

¹⁵ Tási'a, máichanuwarepa ema ángele: “Esu esena tú'usi píma'akene'i tejaka'i te une, takuna'i eta ichapekene awasare, achaneana, apaechejiriruwana, taye'e te juka ichape awasareana.

¹⁶ Eta diéskene'i taji'uana eta útsutsure píma'akene'i takuna'i ena diéskeneana akenukana, ena, nakatichayare esu tú'usi, té'esera te táekenepa eta juka, náitarakainapa esu eta sukaye'ekeneanaini, náepachiakainapa, nákipaikayare tamutu eta supenana. Tási'a, eta náemachayare náijuchainapa te yuku.

¹⁷ Eta nakutikakairaya, nawara'a náimikataka eta útsutsure, étapa eta nakamitiekene'aya esu tú'usi, wa'i tási'a'ini eta napanereruana ena, émaichu'i ema Viya tíjarakawaka'i eta napanereruanayare'i, náichirayare eta mawara'akene'i ema.

¹⁸ Esu esena pima'akene'i esu takuna'i eta ichape awasare esu tiakipairika'i ena akenukana taye'e tamutu awasareana.”