Apocalipsis 14 - Táurinakene máechejiriruwa’i ema Viya tikaijare

Ema Cordero énapa ena té'ikana'i

¹ Níma'apa ema Cordero, titupi'a'i te tikaijare'i Sión. Te machakaya natiari'i'i ena 144 mil keneana ena achaneana ena té'ikana'i ema. Ena tatiari'i'i eta naikutiara'i te nana'uana eta máijare ema Cordero émapa ema Maiya.

² Tási'a nusamapa eta muraka tikaema'i te anuma, takutiyaréni eta muraka tirureka. Tási'a nusamawarepa tikapununeana'i eta kamurikeneana guitarrana.

³ Tási'a tijirana'i eta arapiru'i najirasa'i te tamira'u eta te trono, tási'a étapa te návi'a'i ena kuatruana ekutiarareana, énapa ena víyakara'ana. Nájina apanaina títukaina eta najirasa'i. Nakarichu títukana'i ena ciento cuarenta y cuatro mil. Ena nani náuchukureana'i te namuri ena tikawasana'i eta te juka apake'e.

⁴ Ena nakana matapirawareana'i ena te mamira'u ema Cordero. Tájinaware wa'i náechipejikawa'ini, naviraina'ini esu esena. Ena nani, ena náinapureana'i masantuchakeneana'i ema Viya émapa ema Cordero.

⁵ Tájina náimatiya'ini eta náepiya'ira'i'ini, tájinaware natapirawaina'ini te mamira'u ema Viya.

Eta nametarapi ena mapanana ángeleana

⁶ Níma'awarepa ema émana ángele tiárarairika'i, tikametarapi'i eta tékene'a mametarapi eta máichuaresira'i eta náeñauchirawaina ena achaneana tiáviana'i te tamutu awasareana, apaechejiriruwakeneana. Máitawakakainapa eta náitaresiraya nákani ena tisuapana'i.

⁷ Muraka eta máichuaresira'i, ánipa maka'e: “Epikauchayare ema Viya, taicha ema tépiyaka'i eta anuma, eta apake'e, eta ichapeama une, eta kákiureana. Émaina ejiraucha. Taicha járajapainapa puiti eta máikuñasiraya ena achaneana.”

⁸ Taka'e, ema apana ángele, ánipa maka'e: “¡Tájinapa táipuina takamitiaruinapa eta ichapekene awasare Babilonia, taicha tétavikawa'i eta tamutuira'i taicha eta tamaurikeneana. Tawayuaka'i tamutu eta apana awasareana táichiraya eta tamaurikeneana, takuti'i súkani esena suétaviurekene'i eta sutu'usiwa'i!”

⁹ Te títapirikapa, émapawawarepa téchejika ema émana ángele, ema namápanane'i. Ániware maka'e: “Tájinapa táipuina eta náikuñanayare ena tijirauchana'i ema útsutsure étapa eta máima'i náepiyaru'i nasiñaraji'i, énaipa ena tiámana'i eta naikutiarana te nana'uana étapa te nawa'uana,

¹⁰ muraka eta nakatajiwairaya taicha ichape eta náimiyusemasira'i ema Viya, tikaepujukichakasianainapa te murakakene yuku, te namira'u ema Cordero, énapa ena ángeleana.

¹¹ Máichekuarakireyare eta nakaikuñairayare, tájina tikaema'aima'i eta yuku, támutu sácheana, yátiana naka'eyare te yuku ena tijirauchana'i titsiukana'i eta Útsutsure, tiámana'iware eta taikutiara, takuna eta máijare'i eta nasiñaraji.”

¹² ¡Eta taka'e, ena machanerana'i ema Viya, ena tisuapana'i eta mawanairipiana, túmesamureanayare eta náe'isiraya ema Jesús, puiti nakamichayare'i tamutu!

¹³ Taka'e, nusamawarepa ema téchejikanu'i te anuma, ánipa maichanu: “Piájuchayare eta juka: Tétavikawa eta náurikakarewaya ena táimikaparuanayare puiti juka vikaiju'eyare eta náe'isira'i ema Viákenu.’ ” “Éneichuware– ema Machanewa Viya–, máichanupa jé'eware, najakapainapa eta náikuchi'i taicha eta nakaemataneasira'i ema Viákenu, tájinapa nákamunuima'i, tinarakanainapa.”

¹⁴ Te nésenikapa, níma'apa eta tijapu úkaji, matiari'i'i ema támakenepa'i, téjaka'i ema te úkaji, achane'i eta máima'i. Te machuti tatiari'i'i eta maye'e corona uru, etapa eta matumara takasirikene makarataka'i.

¹⁵ Tási'a, tiúchukapa ema émana ángele te taju'e te mapena ema Viya, mapiarakapa muraka ema téjaka'i taye'e eta úkaji, máichapa: “¡Puiti piyana. Pikurujika namutu ena achaneana manerejiruana'i ema Viya, taicha tiyuritikawapa eta natupara'a, piputuwa'u!”

¹⁶ Taka'e, ema téjaka'i te úkaji, tíja'uchawapa makurujikapa ena náekenereruana'i manerejiruana'i ema Viya, makuchukawakapa eta te juka apake'e.

¹⁷ Tási'a, tiúchukawarepa ema apana ángele te taju'e eta mapena ema Viya, te anuma, éneichu ema mamapa'i eta tumare takasirikene.

¹⁸ Éneichuware tiúchujikawarepa ema apana ángele eta te mesa tavirare eta námawa'uasana, tiáma'i eta mayukuneasa ema Viya, ema, técha'i eta yuku, taka'e, mapiarakapa muraka ema tiamapa'i eta tumare takasirikene, máichapa: “¡Puiti piyana piama eta pitumara, pive'ayare eta uwana eta tatiari'ikeneana te juka apake'e, taicha tiya'awakaipa'i!”

¹⁹ Taka'e tiyanapa ema ángele, makurujimuri'apa ena achaneana tíchana'i eta tamaurikeneana, tíñe'ikene'i eta náepenira'i taicha títekapapa eta táiñe'ikene ekuñaraki tiási'a'i me Viya, taicha eta náimiyusemasira'i ema, takajapapa'ekawaka'i ena.

²⁰ Te tachachaku eta viáwasa eta takajapapa'esi'a'i, tiúchukapa eta náitine, takuti eta kajakure, étana metro eta táupenawa, tresciento kilómetro eta táunawayare.