2 Timoteo 3 - Táurinakene máechejiriruwa’i ema Viya tikaijare

Ena achaneana tiwínarajichawanainapaipa

¹ Éneichuware nuwara'a péchayare eta juka apana. Puiti juka vikaiju'eyare tavetijinapaipa eta táejerawayare.

² Taicha tiwayuchawainapa eta náichirayare eta najamuraraiwana. Tawayuakainapa eta plata. Tipanarara'ianayare. Éneichuware, masuápajiraira'anainapa naye'e ena tikachichana. Wáipaware napikauchaima'i ema Viya, nasapi'ayarechucha nakaeka'iyare ema.

³ Nájinainapa náemunaruima'i, nájinawarepa najapanukenema'i. Técheji'ianainapa. Waipa téchejikakareanaima'i, titupiara'ianainapa. Nakatichainapa eta táurikeneana.

⁴ Mapikauruira'anainapa, tikasiñawawáikanainapa. Náurikainapa náicha eta nawara'akeneana naicha, tasapi'ainapa napauchayare, waipa émaima'i napauchaima'i ema Viya.

⁵ Narari'iyare ena tímijachawanaya yátupina'ini nakaiju'e ema Viya, wá'isera náunakaima'i eta máechejiriruwana, naepuruyarechucha eta taitupajijiasirawa eta maechejiriruwa. Pérajikawa eta naye'e ena nani, wa'i pikuimisiapawa naye'e.

⁶ Taicha narari'i ena achaneana tiyurura'iana tépiyakawanapaipa tipaipikana te pétiana, nayurukawakapaipa nákani esenana máecharaireana, ena nani esenana tisipekaturana'i, tawayuaruana'i eta tájiparakana,

⁷ nametainipa tikarawa'uana'i, tájinasera wa'i nakaikutiaraima'i eta yátupikeneana.

⁸ Takuti'i akane ena iápemareana ema Janes émapa ema Jambrés tiákapaemachana'i ema víyara'aini Moiséini, tímatikareana'isera eta namaimatira'i eta yátupikeneana. Ena achaneana mauripanereruana taicha wa'i nawara'a'i nakasiñawa'ini me Viya.

⁹ Wá'isera timiyanawanaima'icha, taicha ena achaneana náimatiakawaneyare'i eta náepiya'iraiwana súnsurupiana'i eta, takutiyare'i eta náimatiasirawaka'i akane ena achaneana ena nani apina iápemareana tiákapaemachanaini'i ema Moiséini.

Eta maekati'a ema Timoteo maye'e ema Pablo

¹⁰ Pítisera pé'ika'i yátupi eta nímiturapiana, pikutinu'i eta núriwa'i naye'e namutu achaneana, étaipa eta nupamisirawa'i eta né'isira'i ema Jesús, nukasiñawa'i yátupi maye'e, pikutinu'iware eta nukamichirawa, étaipa eta némunaraiwa'i, étaipa eta nurata'aira tamutu,

¹¹ pécha'iware eta náichiranu'i ena achaneana, eta nukatajiwaira'i náicha, ichapemuri'i eta napanajirisiranu'i eta te awasareana Antioquía Ichipichu, te Iconio, étapa te Listra, émasera ema Viya tikatiuchanu'i taye'e eta juka náichiranuana'i.

¹² Yatupisera namutu nákani, tiwara'anaya tiuri eta naitaresira, eta nawa'asira ema Viakenu Jesucristo katajiwanayare taichavene eta napanajirisiraya.

¹³ Énerichuware, ena achaneana wínarajikeneana tiápajukawainapa eta nawínarajiwanaya, éneichuware ena tikaetemara'iana, tiápajukawainapa eta nakaetemaraiwaya, énajikakainapa tikaetemakakanayare.

¹⁴ Pítisera pímiyanawa'i eta pé'isira'i eta juka pímitukasiwana'i, yátupi'i pímereka'i eta pisuapira'i, piti pímatichu'i ena tímitukaviana'i.

¹⁵ Piámawa'i te amuyavicha'a pímati'i eta Takapika'ukene Ajureka, eta tímitukavi'i taye'e eta piúchukuiraya te apana vítaresira, táichavene'i eta pisuapira'i yátupi ema Jesucristo.

¹⁶ Taicha tamutu eta Takapika'ukene Ajureka tási'akeneana'i maye'e ema Viya, jé'ewarekene eta tikamunukare eta viviyi'ayare eta tikarawa'ukareana, eta vímitusi'aya viminekaperaya etapa eta véchejisi'ayare ena achaneana, vímitupiruchi'awakaya taye'e eta táuriwayare eta náitaresirana,

¹⁷ Taka'e, ena vichamuriana máwa'aruana ema Viya téchemara'ianayare'i, yátupi náitukayare'i tamutu eta náichiraya eta táurikeneana.