2 Timoteo 2 - Táurinakene máechejiriruwa’i ema Viya tikaijare

Yátupina eta vé'isiraya ema Jesucristo

¹ Pítisera némunarukene nuchicha Timoteo, nuwara'a yátupina máetumechavini ema Viákenu Jesucristo.

² Píti pímatirichu'i tamutu eta nímiturapiana, taicha pisama'i eta nímitusirawaka'i ena vichamuriana te awasareana, puiti pitanukaya ena apamuriana vichamuriana nákani pímitureana títaura'iana'i, pituparakaya ena tauri eta náimitusiraina ena apamuriana vichamurianayarewa, tákutirichu eta nímitusiravi'i nuti.

³ Nutuparakavi pikamichayare piti tamutu eta pikatajiwairana, yátupina eta masuntaruravina ema Jesucristo.

⁴ Pikutiyare eta máuriwa ema suntaru, takarichu máechapajirika'i eta mawanairipiana ema makapitara, wa'i máemitisikaima'i eta mawana'iana, ta'apapika'ipukaini jákani tájiparakana, ene pika'eyare piti eta pítauchirayare eta mawanairipiana ema Viákenu.

⁵ Eta juka takuti'i ena tijunapanayare chururiranayare, te wa'i naimitunawacha eta nake'e eta najunapirayare waipaine'i kachurirekanaima'i eta najunapiraya.

⁶ Píti pipamikawaya muraka eta pítauchiraya eta pitupara'ana, pikutiya eta mapamisirawa mákani isanitireru eta makaematanera te máesane, mawaraira'i tiúchuku'ayare eta máematane.

⁷ Pipanerecha yátupina eta juka numetaruviana'i, németeaka tímikatakaviyare ema Viákenu eta pikaikutiarairayare tamutu.

⁸ Wa'i pikuemitisika eta juka nímiturapiana'i maye'e ema Jesús, eta émaira'i yátupikene Cristo, mámariekeneni'i ema rey David. Ema, máepenakeneni'i. Makaechepuka'isera ema Viya.

⁹ Eta tímikaviuchanu'i eta juka, puíticha nukatajiwa'i ichape taicha eta nukametarairuira'i, étara témeratakanu'i puiti, tikuti'ine'i nukaviurewa'ini. Etasera eta maechejiriruwa ema Viya wa'i takaerata'ini vimiyanawayare'i eta vikametarairuira.

¹⁰ Nukamicha'isera tamutu eta náichiranu'i, nuwaraira'i nasuapa'ini nákani máichu'akeneánayarepa'i ema Viákenu Jesucristo, apaesa náuchuku'a'ini ena apanawa, náitujikawa'ini nasiapa taye'e eta táurikakarekene máwasa, máichekuarakirenapa eta vikachaneraya ema.

¹¹ Jé'esare, yátupikene'i eta juka vé'iru'i vimutu: Te vépenaka'ipuka ema, kaitareka'avinapa ema Viákenu,

¹² te vetumechawa eta vikatajiwaira, visiapayere te mawasa ema Viakenu; te'esera te vitsiri'aka ema Viya ema apanaware titsiri'aka'aviyare ema;

¹³ Te vínajikawa'ipuka eta vé'isira'i ema, émasera wa'i máinajika'avi'ini, Manasi'ichucha tikuchapa'avi'i te viápechawayarepuka vichawayare maye'e.

Yátupiyare eta náuriwaya ena mawanarana ema Viya

¹⁴ Pémechawaka ena pímitureana tamutu eta júkana. Pékatiakaicha muraka te máijare ema Viákenu. Wa'i nakuewataemajirikáka te jákani náechejirisirawana. Taicha tájina táijarakaima'i, machu étaina ta'apapika eta napanereruana'i ena vichamuriana eta nasámararasiraina'i.

¹⁵ Yátupina tauri picha eta pikaematanera'i ema Viya. Tájinasarepa piáwamira'uima'i taicha tamutu'i tiuri eta pémataneana. Tatupiruwayare'i eta pímituresira'i eta yátupikeneana'i máechejiriruwa ema Viya.

¹⁶ Té'esera natiari'inapuka ena téchejisi'ana'i eta tájiparakana tékatikawana, wa'i pikujikapajirikawaka ena. Pérajikawa naye'e, taicha ena nani navetijiyarepaichucha eta náichira eta tamaurikeneana

¹⁷ Tíñe'ikeneana'i eta náechejirisirawana taicha eta tawayuarasirawa'i, tikauyayakare'i na'apapika ena vichamuriana. Ene taka'e'i eta náejekapirawana'i ema Himeneo, émapa ema Fileto,

¹⁸ péchapawayare naye'e ena nani, taicha nakaerajiruwaipa'i taye'e eta yátupikeneana vímiturapiana. Taicha ena nani tépiyaekene'ana'i eta táetavisirawaipa'iji eta náechepusiraipa'iji ena náepenakeneana. Jé'esare, natiari'ipa'i ena náemejekapawaruanapaipa'i.

¹⁹ Vitiari'isera viti vímiyanawa'i vé'ika'i ema Viya. Taicha muraka eta vikasiñawaira'i, ema tímati'avi'i eta machaneraira'avi'i. Yátupiware visuapa eta juka máechejiriruwa, ani taka'e'i: “Náinajikayare'i eta tamaurikeneana namutu ena tiámana'i eta máijare ema Nuchicha Jesucristo.”

²⁰ Te mapena ema achane rícu simutuyereruwa'i makaye'e'i eta táurinakeneana'i naye'eana jarra uru, nakurujana plata. Wa'i náimipananajikaima'i. Wa'i náimikutichaima'i eta apamuriana nayereruwana yukukisiana, eta raveta, eta yuwaraki, étapa eta nakasuelana mátejisiana.

²¹ Eta taka'e víti, ichape eta vijaneasirawayare taye'e eta tamaurikeneana. Yátupiyare'i eta vikamunukarewaina maye'e ema Viya, vítauchirayare'i eta vikaemataneasira ema. Jé'esare, ichapenapa eta vimunawayare'i maye'e.

²² Wa'i pikue'ika eta natu'usiwana ena amaperukijiana. Tamutu'i najamuracha ena, nakarawa'u'i jákani tamaurikeneana'i. Pítisera pímiyanawa eta táuriwa'i eta pítaresira'i. Pétupirikayarewa eta náichawakenewa ena achaneana. Énaina pitanuka pákachanewaka nákani pichamurianaichu tiúripanereruana'i, taicha ena nakasamure'i ema Viákenu.

²³ Éneichuware wa'i pikujikapajirikawaka nákani nawara'a'i tiyaserekaviana. Taicha pímatipa'i ena nani eta naka'irana, étachucha natanuka eta semanereana.

²⁴ Ena mawanarana ema Viya, wa'i taiúri'a naímisiaparakawa'ini taye'e eta semanereana. Táitsiwasera naétaviuchayare'i eta náuriwayare naye'e namutu ena achaneana. Nakamichayarewa tamutu

²⁵ enaipa ena viánarana'i, tiúriyare eta véchejirisirayare. Vikuchapayare eta táetupirisirawaina eta napanereruana, máijaraka'ini ema Viya nasuapiraina eta máechejiriruwa,

²⁶ apaesa nakuchuku'awa'ini eta náchanewana eta takaerataira'i maicha ema Wínaraji. Taicha eta máiturusirawaka'i ema, mawara'a'i náitauchaya eta mawara'akeneana'i ema.