2 Timoteo 1 - Táurinakene máechejiriruwa’i ema Viya tikaijare

Maechejirapi

¹ Nuti Pablo maye'enu apústule ema Jesucristo, ema Viya tiwanekanu'i eta nukametarairuirayare eta máechejiriruwa, taicha makaechejiriruwa'i eta máijarasira'aviya vikuchi'i víti eta vítaresiraya táichavene'i eta máwa'asira'avi'i ema Machicha Jesucristo,

² puiti nápechawaware nukajurevi eta piye'e piti nuchicha Timoteo némunarukene. Nuwara'a makatajikavini majapanuvini ema Tata Vikaiyakene, émapa ema Viákenu Jesucristo. Náijarakavini eta táuriwaina eta pipanereruana.

Ema Pablo máetumecha'i ema Timoteo

³ Nuti nécharairikavi'i te sácheana yátiana te nuyujarasirana, nuyaseuchavi'i me Viya. Nu'asulupayacha'i ema eta piúriwa'i máicha. Ema nukasiña'i nuti, takuti'i eta nakasiñaira'i ena viáchukanaveanaini.

⁴ Tétavikawa'i eta nuwaraira'i nápechawa'ini níma'avi. Wa'i némitisikawa'ini eta píyaira'i. Nuwara'a'i píja'uchawa'ini pítekapauchanu'ini, núrisamurepaini.

⁵ Taicha némechawa'i yátupi'i eta pímiyanirawa'i pisuapa ema Viákenu. Pikápayayarakawakaine'i eta susuapira'i yátupi esu piátse Loida ésupa esu pena Eunice. Ichapeine'i pémechanu'i eta naye'e ena. Eta taka'e puiti, wa'i néñamawa'ini eta piye'e.

Wa'i ekutsiri'a eta maechejiriruwa ema Viya

⁶ Puiti nutuparakavicha muraka, wa'i pikukaema'a eta péchemaraiwa'i maicha ema Viya. Pímiyanawachucha, wa'i takumapuruji eta nunasira'i eta nuwa'uana te piápusi.

⁷ Taicha ema Machanewa ema Viya, tíjaraka'avi'i eta vitumesamurewana, eta vikatupara'aira'i. Ema tímituka'avi'i eta vémunaraiwaya. Tíjaraka'aviware eta vikaratasirawayare yátupi eta vítaresira.

⁸ Eta taka'e, wa'i pikutsiri'a eta pikametarairuiraya eta máechajiriruwana ema Viákenu. Wá'iware pikutsiri'a eta táemeratasiranu'i, taichavene'i eta nukametarairuira'i nuti apana. Yátupina pikamicha eta pikatajiwairaya. Taicha ema Viya, ema tíjarakaviya eta pitumewaya eta pímiyanirawaya pikametarairu.

⁹ Ema Viya tiámawa'i eta máemunasira'avi'i akane te tépanawainapa tamutu. Tijapanu'avi'i máichavene'i ema Machicha Jesucristo. Eta taka'e máichuira'aviyare vimutu viti vé'ikanayare ema Machicha, mawaraira'i tikuchuku'a'aviyare, wá'ineni viámawa'ini viúri'ini eta vítaresira'i. Puítisera ema Viya mawara'a mapekaturare'aviya te mamira'u.

¹⁰ Puíticha, eta majapanuira'avi'i ema Viya, máewatasina'avi'i ema Machicha Jesucristo tikatiucha'aviyare'i. Ema, máechepure'i te máekari. Puiti manakika'i eta Arairu máechejiriruwa'i, eta makaitaresira'aviya, máepenakaka'avinapa.

¹¹ Ema Viya tituparakanu'i nukametarairuyare eta juka Arairu maechejiriruwa. Ema tinakanu'i apústulenu'i, nímitukayare'i ena apawasana.

¹² Eta tímikaviuchanu'i eta juka, puíticha nukatajiwa'i ichape, taicha eta nítauchira'i eta nutuparakasiwa'i. Wá'isera nutsiri'a eta né'isira'i, taicha nímati'i nuti eta yátupira'i eta makasiñakaréwa'i ema nukasiñakene'i. Nécha'iware eta majakapira'i tamutu eta nématanerepiana. Nukunewainapa eta jena sácheyare eta máijarasiranuyare eta níkuchi'i maye'e.

¹³ Píti apana, eta pé'ikayare eta juka yátupikeneana nímiturapiana'i piye'e, tájina wa'i pi'apapikaima'i. Yátupina pisuapa, yátupina eta pémunaraiwaina taicha tiáwa'akavipa ema Jesucristo.

¹⁴ Piúnakaicha yátupina eta juka máechejiriruwana ema Viákenu, te natiari'ipuka náwara'a na'apapika eta vímiturapiana, wa'i pikuisapawa, máima'avinesera ema Machanewa Viya, ema tiáwa'aka'avi'i, ema tímikatakaviyare.

¹⁵ Títekapa, péchaichu'i píti eta namáimikatasiranu'i ena náiyara'ana'i ena vichamuriana tikawasana'i te Asia, émaipa ema Fijelo emapa ema Hermójenes tijunijikanuapa énawanerekaina'ini naimikatakanu'ini.

¹⁶ Nuyaseaka'isera ema Viya majapanuiraina ena machichanaveana ema Onesíforo, ticha ema ichape eta maitatiranu'i makurisamurechiranu'i, wa'i maimitsiri'a'ini eta taichavenena'ini eta navi'aira'i te juka nukaerataiya'i.

¹⁷ Emasera maitekapinaichu te Roma enewanepa titanukanu'i wa'i manaraka'ini eta matanusirani tiamainukawa te tichimawanupa tiurisamurepa.

¹⁸ Pechaichu'i píti apana eta máimikatasira'avi'i te viávi'aicha'a te Éfeso, eta taka'e, nuyaseaka'i ema Viya makatajika'ini máimikataka'ini ema, énapa ena machichanaveana. Majapanu'ini te jena sácheyare vítekapauchiraya ema Viya.