2 Pedro 2 - Táurinakene máechejiriruwa’i ema Viya tikaijare

Natiari'iyare ena tépiya'ira'ianaya tímijachawanayare pastoreana

¹ Akane natiari'i'i ena tépiya'ira'iana tímijachawana'i profetana te namuri ena náchukanaveanaini israelítana. Natiari'iyarewa ena tépiya'ira'ianaya, tépiyakawanaya pastoreana eye'e, ena típichasika'eanayare, témejekapawacha'eanaya, apanaya eta náimiturapiana, wa'i émaima'i náechejisi'a ema Viákenu, énajiwa'i tíchawana'i natanuka'i eta náikuñayare, táija'uchirawayare'i eta náemitiekene'airayare.

² Kamurianayare ena náemejekapawaruanayare, náe'ikainapa eta naye'erepi, táetaviuchira'i eta natu'usiwa'i, náichavene'i ena, téchejikanainapa ena apamuriana achaneana, nakaeka'inapa eta juka vé'iru'i táurinakene'i achene.

³ Ena nani, tímituka'eanaya eta náimiturapiana náepiya'iraiwana'i, taicha nawara'a'i títukawana tivereaka'eanainapa eti, taicha tétavikawa'i eta najamurarasira'i eta plata, tájinasera náipuinayare, wa'i táevejuakaima'i eta náikuñayare, taicha akanewakaipa eta takaecheraira'i eta náikuñayare.

⁴ Nakutiyare ena ángeleana téjekapawana'i, tájina wa'i majapanuwakaima'i ema Viya, makijikawakapa taye'e eta táiñe'ikene yuku távi'a'i eta tamapikukene, tikaiti'ana'i puiti te cadena, te táitekapapa eta ekuñaraki, tiápajukawanainapa eta náikuñayare ena.

⁵ Nuwara'a némecha'e naye'e ena machamurianaini ema víyara'aini Noé eta akane, wá'iware májapanuwaka'ini ema Viya táichavene'i eta namasuapajiraiwa'i, makamirikapa eta ichape tikiwa náikuña'i, térikana'i namutu ena nani achaneana, taicha náepuru'i eta máichuirawaka'i ema Noé, táuriwayare'ini eta náitaresirana, ákarichu'i tiúchuku'ana'i ema Noé, esu mayena, énapa ena sáisikeneana machichanaveana.

⁶ Nuwara'a némecha'eware naye'e ena tikawasanaini'i te awasare Sodoma, étapa te Gomorra, wá'iware majapanuwaka'ini ema Viya, makamirika'i eta yuku, náikuña'i ena, táija'uchawakapa takamitiekene'awaka namutu, títawanapa, amairi'anecha tsimapa eta náitavira'i, ema Viya máimereka'i eta juka, naye'e ena najurureanapa te juka apake'e puiti, mawaraira'i máemechawaka ena achaneana wíinarajipanereruana'i te napikayarepuka.

⁷ Té'esera te nataraku, matiari'i ema víyara'aini tikaijare Lot, ema, tamutu'i sácheana tikatisamurewa'i taicha máimairawaka'i ena achaneana náichira'i eta tamaurikeneana, masamira'iware eta náechajisi'aira'i eta titsiri'akareana'i.

⁸ Ema maka achane maurikene makachanewaka'i ena, téñamawa'iware te masamure ema eta máimairawaka'i eta naichira eta tamaurikeneana, tamutu'i sacheana maimararaka'i masamararakawaka'i.

⁹ Eta taka'e, ema Viya tétavikawa'i eta makatiuchira'avi puiti, tikuchuku'a'avi eta viatajiwana viti vé'ikana'i ema, taye'e eta viátajiwana, énerichuware yátupi'i matsekaipa eta náikuñayare nákani achaneana masuapajiraira'ana'i.

¹⁰ Ema Viya, máikuñakawakayare namutu ena tiwayuchana'i eta náechipejisira'i eta náke'eana, taicha tétavikawa'i eta tawayuasirawaka'i eta natu'usiwana, énapa ena tépuruana'i ema Viákenu, eta émaira'i téchawaka'i, ena nani mapikauraira'ana, nájina náwamira'ukenena eta náume'araiwa. Nasapi'a nakaeka'iware ena ángeleana;

¹¹ apanasika ena ángeleana tiáviana'i te mamira'u ema Viákenu, wa'i náijarakawa'ini nakajachareka'ini ena wínarajiana, tétavikawa'ineni eta natumewa.

¹² Ena nani tépiyakawana'i pastoreana, nakaekai'isera eta té'ikakareana namaituruekeneruana'i. Ena, nakuti'i eta táitaresira eta sárare, tájina nakaikutiarakenena. Najurupairuchucha te apake'e. Ena, táuriawasa'i eta justicia, máeje'a'i náerataka táimikapakawaneyare. Tépenanayare'i nakuti eta táepenira eta sárare,

¹³ ena, náimikatajiwacha'i nákani apamuriana achaneana. Páureanasami, ena tiápajukawanaya eta nakatajiwairayare. Ena nani, tétupikawana'i eta náimairawa'i, tiúrisamurereakawana'i eta nakawa'aira'i te sácheana. Táitaurewakene tétavikawa'i eta natsiri'akarewa eta namaetupikushiwana'i, eta nakasirikira'e'i te jákani énisirakakana ena echamuriana. Tikamapurawana'i tikurisamurechawana, nawaraira'i náituruka jákani najamurachakeneana.

¹⁴ Namutuchucha najamuracha nákani esenana. Tájina náipuina eta náesenamarewana, náechema'a eta náiturusiraya súkani esena máejerare'i. Náimitukaware ena ajairana tájina náituruekene'a, nakutiyare ena eta náesenamarewana'i. Tájina tivechuki'aima'i eta nakapekaturaira'i. Ekuñarakisera eta náikuchi'i ena.

¹⁵ Témunasirikawana'i ena, taicha namaimatira'i eta achene nakaiju'eya eta táurikene'i. Nakutipa'i eta maye'erepini ema maka achane Balaam, machichaini ema Bosor. Ema, tétavikawa'i eta majamurachira'i eta plata, mawachayare eta máichirayare eta tamaurikeneana

¹⁶ ema Viya máima'a'i eta tamauriwa'i eta mapanereru'i ema Balaam. Eta taka'e, eta burriku makaperakene'i ema Balaam téchejikapa, takajacha'i ema. Enewanepa témitiaka'i eta mapanereru'i tamaurikeneni'i.

¹⁷ Ena nánitataji achaneana nakuti'i eta tiájiku eke, nakutiware eta úkaji támarairiru'i eta tékatikawa, ena, jarari'ipa eta náikuchi náikuñayare taye'e eta táetaviure eta tamapikuwa.

¹⁸ Ena téchejisiawanapa tikunachawanapa eta náichakeneana napekaturana'i náiturureana'i, náiminajikapaipa nákani náiturewanapa'i eta táuriwaini'ipa'i eta náe'isira'i eta táurikeneana, tichawanapaipa taye'e eta tamaeperajiwana'i eta náitaresira.

¹⁹ Ena tijarakawana eta naijarasirayare eta nauriwayare nauchukuirayare, éna'ineni natiwawaika'i tamusurana'i eta tamaurikeneana; taicha namutu achaneana tamusura'i eta tamaurikeneana eta tawayuasira'i eta taiñema'ikeneana.

²⁰ Takutikene nákani tínajikawana'i eta náe'isira'i ema Viákenu Jesucristo, tichawanapa taye'e eta tamaeperajiwa'i eta náitaresirana te juka apake'e, ena, tiápajupanawanapa eta nakaikuñairayare, taicha eta naviurewa'i.

²¹ Tiúripanaichu'ipukaini wa'i nakuimati'ini eta táurinakene vé'iru'i, wáchupa náimati'ipa'i eta tiúrina achene, tási'a tínajikawanaicha'aware taye'e eta táurinakene wanairipi najakapakeneni'i.

²² Etasera titauchawa'i naye'e eta yatupikene eta juka taechejiriruwa'i naye'erepi: “Te tiá'ika eta tamuku, táimichawayare'i tanika eta tá'iru'a”, étapa eta “Kuchi, tamapuruji víkacha'ini eta, taicha tékarajikawayare'i te tiúraji.”