2 Juan 1 - Táurinakene máechejiriruwa’i ema Viya tikaijare

Eta taechejirapi

¹ Nuti víyara'anupa, nukatupara'akene'i naye'e ena vichamuriana nukajurevi eta juka nechejiriruwana emutu eti nuparapenaveana, manerejiru'e ema Viya, namutu ena echamuriana. Yatupi eta nemunasira'e'i, wa'isera nakarichu'i nemunaka'e'ini eneichuware ena vichamuriana timatiana eta yatupikene temunaka'eana'iware.

² Viti vémunaka'e taicha vikutikaka'i eta visuapira eta yátupikene máechejiriruwa ema Viya. Máichekuarakirenapa eta visuapiraya.

³ Nuwara'a makatajika'e'ini ichape ema Tata Vikaiyakene, émapa ema Jesucristo, Machicha ema Viya, májapanu'e'ini, náijaraka'e'ini eta táuriwaina eta epanereruana, taicha yátupikene'i eta náemunasira'e'i.

Yatupi eta maemunasira'avi'i

⁴ Núrisamureine'i eta néchira'i, eta nanerejisirawa'i ena pichichanaveana, tiúri'i eta náe'isira'i, yátupikeneana'i, tímiyanawanaware eta nasuapira'i eta mawanairipiana eta viye'e ema Tata Vikaiyakene, taicha ene vika'eyare'i.

⁵ Tiuri puiti, eti, nukajure'e, taicha nuwara'a némecha'e eta juka mawanairipi ema Viya, étaichu'i eta vémunasirakakayare vimutu. Te tépanawainapa eta vikasiñaira'i ema Viya, tiwaneka'avi'ipa'i eta vémunasirakakayare.

⁶ Ema yatupikene temunara'i je'eware suapajira'i taye'e eta mawanairipi ema Viya, eta esamiraipa'i eta mawanairipi eti te taepanirapa, etara taka'e vemunakakayare.

Eta yatupikene vikasiñawaira eta me Viakenu Jesucristo

⁷ Narari'i te juka apake'e te viávi'a'i ena nawara'a'i tikaetema'eanaya, ena nani, wa'i náwara'a'ini náimikaecheracha'ini eta máuchusira'i yátupikenera'i achane ema Jesucristo. Ena nani, tiwayuara'iana'i, tikatianakana'iware ema Cristo emapa ema anticristo.

⁸ Tási'a, ekaunewayare taye'e eta nawayuarapiana, échapawachucha eti, machu nakamitisika'e taye'e eta íkuchi'i ématanewacha'i, nuwara'a ejakapayare tamutu.

⁹ Viti visuapa'i eta máimiturapiana ema Cristo, viti viáwa'aka'i ema Tata Vikaiyakene émapa ema Machicha, wá'isera náwa'akaima'i ema Viya nákani wa'i náwara'a'ini nasuapa eta máimiturapiana ema Cristo. Tasapi'apa, náimituka'i eta naye'echirawaihu eta napanereruana.

¹⁰ Te natiari'inapuka naitekapaucha'e eti te iúrujisirarewa, te'esera esama apanaina eta naimiturapiana wa'i ekujakapa te epenana wa'iware ekuechejika;

¹¹ Taicha te íchapuka eta juka, tikutinapapuka eta éti'ichu'i nachamuriana ena tiwayuara'iana, wa'ira ekuimisiapawa naye'e, máchura étaina etapirawaina eta juka náichira'i ena eta tamaurikeneana.

Eta táichekuaraki eta majure ema Juan

¹² Tiuri, jukari'i apamuri eta numetaru'eanaya, wícha'asera numetaka'ema'i puiti te juka najure, taicha nukunewa'i eta nítesiraya eye'e apaesa véchejirikawainapa eta vímanajirisirakakayare, tási'a, viúrisamurenapa vimutu.

¹³ Téchejikaviana ena suchichanaveana esu péchavi, ésuichuware manerejiru'i ema Viya.