2 Corintios 8 - Táurinakene máechejiriruwa’i ema Viya tikaijare

Tatupiruwayare te visamure te viwara'a vikamawa'u

¹ Tiuri puiti, nuparapenaveana, viwara'a vimetaka'e eta nanakisirawa'i ichape ena apamuriana vichamuriana tikawasana'i te awasareana tinapaika te juka Macedonia ena, nasuapawanepa eta manakasamurechira'i ema Viya eta nakajirisirayare'i.

² Ichapemuri'inéni eta náichira'i ena tikatianakana'i náemepaurechawaka'i, wá'isera náinajikawa'ini, tiwapinawanaichucha, tatupiruwa'i te nasamureana eta náijarasira'i eta nanakiruwana, páureana'ineni, tímekawa'isera eta nanakiruwana, tikuti'ine ríkuanaina'ini.

³ Nuti nitametaka'i eta juka taicha nunekapaekene'a'i eta tápajusirawa'i eta nanakiruwana, wa'i náeñama'ini, náijaraka'i jákani nakaye'ekene, wa'i vipamikawaka'ini víti

⁴ énasera, ichapemuri'iware eta nayaseasira'avi'i vísapa'ini tinakikawana ena apanawa, nawaraira'i nakajiyare ena vichamuriana tikawasana'i te Jerusalén.

⁵ Ena, náetaviucha'i eta nawapinairawa'i, tínapukapa tinakikawana'i eta nakaemataneasira'i ema Viya, nawaraira'i nakurisamurecha ema, tási'a, étapa eta náikure'i ena vichamuriana.

⁶ Eta nímaira'i nuti eta nawapinawaira'i eta nakajirisiraya, nupanerecha'i nuwanekaya ema Tito machawa máiteka eta ara eye'e apaesa táitauchawapaini eta enakiruwana'i eti apanawa, kape juka épanirawainapa, puiti ítauchawanepaini.

⁷ Taicha namutu achaneana naecha eta iúriwa'i eti: Ichapemuri eta ekasiñawaira'i me Viya, tétavikawa'iware eta échemaraiwa'i, kamuri'eware eti ímitura'iana, ewapinawa'iware eta ekaemataneasira'i ema Viya, tétavikawa'iware eta émunaraiwa'i eta viye'e. Eta taka'e, táurika tápajukawa'iwareni eta enakiruwana ekajirisiraya.

⁸ Wá'isera nupamika'e eta nuwanesira'éna'ini. Nuwara'a'isera ímatiekene'a'i eta nawapinaraiwa'i ena apamuriana vichamuriana apaesa ímereka'ini eti apanawa eta yátupikenera'i émunaraiwa'i.

⁹ Ímatirichu'i eti eta máemunasira'avi'i ema Viákenu Jesucristo, ema, tamutu tiúrikakare'i te mávi'a'i te anuma, tájina'ineni mákamunu'ini, étivene'isera tiúkupaikapa te juka apake'e, páurepa ema eta máitaresira'i apaesa eti ejakapa'ini eta iúrikakarewa maicha ema eta maemepaurechirawa'i.

¹⁰ Numetaka'e eta iuriwayare eti, nijaraka'eyare eta juka nechejiriruwa taye'e eta juka vechakene'i. Kapaeipa añu étiwa'i eti enakikawa'i, ewapinawa'isera eta enakisirawa'i.

¹¹ Puitisera itauchapa icha eta enakure'i, takutisera icha eta te épanawainapa enakikawa, ewapinawa'i, najina napamika'e'ini, etijiwa'i enakika eta erata'akeneana.

¹² Te yatupina ewara'a enakikawa, ema Viya majakapayare eta enakiruwayare, taicha ema, wa'i tipamika'ema'i enakika'ini eta kamuri taicha tajina eviyaima'i.

¹³ Wa'i nuyaseaka'e échuri'a'ini eti táichavenena'ini eta ímikatasirayare ena apamuriana.

¹⁴ Nuwara'a'isera ímikatawakayare ena vichamuriana'i. Puiti ekaima'akenewaka'i, erata'a'i ekajirika ena náechuriaruana'i. Tijurikati te apa'ena, étipawainapapuka échuriaka. Ena títsirijikawanainapa eta eye'e, énapawainapa tinakikawanayare. Ene taka'eyare eta ítaresirayare, ekutikakayare.

¹⁵ Taka'e'i eta Takapika'ukene Ajureka: “Nájina nákatajiwa'ini, nájinaware náechuriaka'ini, wá'iware náemepururereka'ini.”

Ema Tito énapa ena apinana wanairukana'i maye'e ema Pablo

¹⁶ Nu'asulupayacha'i ema Viya eta manakasamurechira'i ema Tito máeñamirawa'i eta eye'e, takuti'i eta nusamure néñamirawa'i eta eye'e.

¹⁷ Ema, matupiruwa'i tijikapanu'i eta nutuparasira'i téchapajirika'eyare. Ichape eta mawaraira'i téjirapana'eyare, taicha tétavikawa'i eta máemunasira'e'i.

¹⁸ Eta mayanirayare ema Tito eta ara eye'e, véwatakayare makachaneyarepa'i ema apana vichamuri'iware. Tímatikare'i ema eta makunachakarewa'i te jákani máimituresirapa'i naye'e ena vichamuriana taye'e eta vé'iru'i.

¹⁹ Ema maka neréji'i naye'e ena vichamuriana eta máimikatasiranuyare eta vipaisirayare, víjarasirayare ena vichamuriana eta enakiruwana'i. Wícha'i eta juka, viwaraira'i vikurisamurechaya ema Viákenu. Vímereucha'eyarewa eta ekajiraiwa'i eti.

²⁰ Taicha nuti eta viámirayare eta ichapekene enakiruwana, nuwara'a nímerekayare eta táuriwa eta víchira, apaesa wa'i nakuechejisianu nákani achaneana.

²¹ Ema Viya tímararakanu'i eta táuriwa eta nupanereruana. Nuwara'aware tiuri eta náimaira'i ena vichamuriana.

²² Éneichuware véwatakayarewa ema apanaware vichamuri. Ema, ichapemuri'i tímereuchawa eta mawapinaira'i eta makaemataneasira'i ema Viákenu. Puiti ema, tiwapinawawarepa eta máitekapauchira'eya, taicha tikasiñawa'i eta máimatirainapa eta ewapinawa'i eta ekajiraiwa'i eti.

²³ Nuti nuwara'a'i náimatiyare'i namutu ema Tito, eta émaira'i nujupa'a taye'e eta juka vématanerepi, vikutikaka'i eta vikaemataneasira'i, véchapajirisira'e'i eti. Étaipa te nakayasesererupuka naye'e ena apinana vichamuriana makachanekeneanayare'i ema Tito, énerichuware emetakayare eta neréjiana'i ena apamuriana vichamuriana, táichavene'i eta táuriwa'i eta nakaemataneasira'i ema Cristo.

²⁴ Nuwara'a'i ímerekawayare eta naye'e ena nani apinana vichamuriana eta yátupira'i eta émunaraiwa'i, apaesa ekurisamurecha namutu ena vichamuriana te nasamairikapa, náimatirayare wa'i támapuruji eta nukunachira'e'i.