2 Corintios 7 - Táurinakene máechejiriruwa’i ema Viya tikaijare

¹ Taka'e, némunarukeneana nuparapenaveana, wa'i táwara'a'ini vínajikawa'ini taye'e eta juka vikuchapakene'i puiti. Taka'e, vépachinachayare'i tamutu eta viáke'e étapa eta viáchanewa. Víjarakawayare'i tamutu te visamureana me Viya taicha eta vipikauchira'i ema.

Nakurisamurecha ema Pablo ena tikawasana te Corintios

² ¡Viparapenaveana, viwara'a ímiyanawa'ini esuapa'avi'ni! Taicha nájina'i te etaraku eti nakatajiwa'ini náinajikawa'ini vichavenéna'ini viti. Nájinaware vikaetemakenéna'ini, vimipananájikawaka'ipukaini.

³ Wá'isera nuwara'a nukajacha'e puiti, nutupiruwa'i eta numetasira'e'i kape juka, tétavikawa'i eta nukasamurera'e'i, tájina tikamitisikanuima'i, tayanapanepuka népena.

⁴ Ichape eta nukasiñawaira'i eta eye'e, nukunacha'e'i eta ekurisamurechiranu'i. Tayanapane'inéni ichape eta nukatajiwaira'i, tétavikawa'isera eta étumechiranu'i ekurisamurechiranu'i.

⁵ Étaipa te nítekapapa taye'e eta Macedonia, tájina nunarasiraina'ini, ichape eta nukatajiwaira'i naicha ena tikatianakanuana'i, ichapeine'iware eta néñamirawa'i eta eye'e.

⁶ Émasera ema Viya, tétavikawa'i eta máetumeraiwa'i naye'e nákani tikainajiruwanaipa'i, nútiipa nétumechawaine'i maicha ema, eta nímairapa máitekapauchiranu'i ema Tito;

⁷ tavetijipa eta mametasiranupa ema eta ekurisamurechira'i ema. Timetakanuware ichape eta éñamirawa'i eta nuye'e; ewarairaipaicha íma'anu, tási'a timetaka'avipa ichararakawa'i epanereresira'i ichape etapa eta echarairisiranu'i; tamutu eta juka nechira'i, tétavikawaine'i eta ekurisamurechiranu'i.

⁸ Ichape'inéni eta táimipanereresira'e'i eta nukajure'era'i, nútiipa, ichaperine'iware eta táimipanereresiranu'i nukatisamurewa'i te nukajurepa. Némitisikapasera puiti, taicha ánipi eta táimipanereresira'e'i.

⁹ Puítisera, tétavikawaine'i eta núrisamurewa'i ícha, eta táetaviasira'eipa'i eta ekatisamurewa'i. Eta núrisamurewa'i, wa'i étaina'ini taicha eta ekatisamurewa'i, nuti eta núrisamurewa'i taicha títsiwachawaipa'i eta táuriwaipa'i eta epanereruana, ewaraira'i ekurisamurecha ema Viya. Eta taka'e, víti tájinapa wákayema'ini eta eye'e;

¹⁰ taicha tatiari'i'i eta jákani máijararu'i ema Viya, táimipanereresira'e'i, mawaraira'i eta éñauchirawaya taye'e eta éjekapirawa'i apaesa makuchuku'a'e, eta ekatisamurewa'i tiáma'i eta iúrikakarewaya. Énasera ena apamuriana achaneana taye'e eta juka apake'e, yátupi tikatisamurewana'i, wá'isera náeñauchawa'ini eta me Viya. Étapa, tiámaya eta náepenira.

¹¹ Eta ekatisamurerawa'i maicha ema Viya, ¡íma'apa eta taichararakawa'i! Taka'e puiti ímatiekene'apa, taicha nuti tajina nuyurewaina'ini, taka'e puiti katiuchanuanapa, tisemanaine'i, tási'a tipikanaine'i eta naichararakawaina'ini.

¹² Taka'e te nukajure'enapa eta táinapure najure'i, wa'i émaina'ini máimipanererekanu'ini ema téjekapawa'i, wá'iware émaina'ini máimipanererekanu'ini ema maiya, émaipa'i ema majarareru'i. Íchavene'i eti eta ímipanereresiranu'i te nukajure'enapa, nuwaraira'i ímereuchawayare'i eta yátupipapuka eta esuapiranuina'ini te mawa'uana ema Viya.

¹³ Eta taka'e, tétavikawaine'i eta étumechiranu'i nuti eta nusamairisira'e'i eta esuapiranuipa. Tavetijipa eta núrisamurewapa eta táuriwa'i eta ejakapira'i ema Tito. Tétavikawa'i eta máurisamurewapa'i ícha eti eta ésamirisirawaipa.

¹⁴ Wá'ichu támapuruji'ini eta nukunachira'e'i maye'e ema Tito, eta núrisamurewa'i ícha eti. Puítipa, ímereuchawapa yátupi'i eta ekunachakarewa'i.

¹⁵ Ema, tiápajukawapaipa eta máemunasira'e'i eti. Máecharairika'i eta táuriwa'i eta ejakapira'i ema, esuapaine'iware, táichavene'i eta emansuirawa'i étapa eta epikauchira'i ichape ema Viákenu.

¹⁶ ¡Nuti apanaware, tétavikawa'iware eta núrisamurewa'i ícha eti eta esuapira'i!