2 Corintios 10 - Táurinakene máechejiriruwa’i ema Viya tikaijare

Yátupi eta masuapakarewa'i ema Pablo

¹ Nuti Pablo, nuyaseaka'e eta ímatiranuína eta némunasira'e'i. Nukuti'i eta máemunaraiwa'i ema Cristo. Etiari'ipuka eti ímijacha'i népiyakawa'i nuri te emira'u; tási'a, te nuyere'i'eware, tétavikawa'iji eta nuwínarajiwa'i mapikauraira'anu'iji.

² Puiti nutuparaka'e, étupirisamurechawaipa'ini te tamira'u eta nítekapauchira'eya, apaesa wa'i takuitauchawa eta nukusemiraina. Ena nani náimijacha'i nukuti'i mákani achanetataji, étachucha nutanuka eta nuwara'akene'i. Nukamatinakawakayasera te nítekapaucha'epa.

³ Yátupi ekutikenenu'i achanenu'i. Wá'isera nákuti'ini ena apamuriana ajairana, náipikararekanuma eta náe'araiwana, nawaraira'i tisuapakareanayare'i.

⁴ Taicha nuti wa'i né'akakaima'i te nuwa'uana, tájinaware nakasiñaima'i. Marari'isera ema Viya ema tíjarakanu'i eta nítupajijiasirawaya nukamatinasi'ayare ena.

⁵ Eta taka'e'i eta nukaepa'aira'i eta semanereana, wa'i náwara'a'ini máimikatakawaka'ini ema Viya. Wá'isera náwara'a'ini náesenika'ini ema. Níturukayare'isera nákani murakapanereruana'i eta nasuapiraina yátupi ema Cristo,

⁶ vikuchapa'eyare eta yátupina esuapajiraiwaina. Tási'a, te nítekapa, nímirata'akawa eta nítsiwachirayare eta napanereruana ena masuapajiraira'ana'i. Te wá'ipuka náeñauchawa, némechawakayare.

⁷ Eti ímijachaipapuka tájinakenenu'i nítupajijiasirawaina'ini, eta ímairanu'i. Németeakaware natiari'i ena tikunachawana'i machanerana'i ema Cristo. Nuwara'asera náimatinu'ini eta machanerairanu'i nuti apanawa.

⁸ Náimijachaipapuka wa'i nétupikawa'i nuti eta nupamisira'e'i eta esuapiranu'i. Wá'isera nutsiri'a'ini, taicha yátupi'i nutupara'aichu'i eta náwakure. Taicha ema Cristo mawara'a'i nétumecha'eyare eta é'isira'i ema. Tájina wa'i nukamitiekene'a'ema'i.

⁹ Numetaka'e'i eta juka, wá'isera tákarichuima'i nípikarareka'e'ini eta te najure.

¹⁰ Ena naka'e'i eta náechejiriruwa'i. Wa'i ekusuapa eta majure. Tayanapane murakaina eta táechejiriruwana, émasera tájina mamúrakawa'ini. Éneichuware murakakaema eta máechejisira.

¹¹ Ena náimijacha'i takarichu'i muraka eta táechejiriruwa'i eta najure. Tíma'anuanayaresera te wá'ipuka nusuapakare'i te nítekapaucha'epa eta ara eye'e.

¹² Nuti wa'i nímikutichaima'i naye'e ena tímijachawana'i tikunachakareanapana'i. Ena nani énajirikawaichucha tikunachawana, tímijachawana'i nájina tikachurikanaina ena. Mapachichijikawana'i eta juka náichakene'i.

¹³ Nútisera wa'i nútijiwaima'i nukunachawa'ini. Émayare'i ema Viya tikunachanuyare'i, taicha ema tíjarakanu'i eta nusuapakarewa'i eta eye'e, tási'akene'i eta níjarasira'e'i eta táurinakeneana máechejiriruwana ema Cristo.

¹⁴ Wá'isera nétaviviriakawa'ini eta nusuapakarewa'i eta eye'e. Nuti'ineni nínapuka'i te nítekapaucha'enapa, te nimituka'epa eta Arairu máechejiriruwa maimiturapi ema Cristo.

¹⁵ Wá'isera nukunachawaima'i taye'e eta apaematane'i násapi'a'ipukaini. Nuwara'asera tápajukawa'ini eta esuapajiraiwaina maye'e ema Viya. Nuwara'aware nímituka'eyare eta apamuriana yátupikeneana, nítauchiraina eta nukatupara'aira'i. Tájina wa'i nétaviviriakawa'ini eta nusuapakarewa'i eta eye'e.

¹⁶ Éneichuware nujamuracha'i nukametarairu, eta Arairu maechejiriruwa ema Viya. Ánaki te tayere'ikeneana awasare. Wa'isera nimikasiapawaima'i te jákani awasare nakametarairukeneipa, taye'e eta táitaurewapaipa apaemataneana'i.

¹⁷ Nákani tímijachawana'i tikunachakareana, yátupina'iseraini eta nakunachakarewaina maye'e ema Viya.

¹⁸ Taicha mákani achane, te yátupi'i eta makunachakarewa'i, wa'i émajiwaima'i tikunachawa. Émayare'i ema Viya tikunachayare'i.