1 Timoteo 3 - Táurinakene máechejiriruwa’i ema Viya tikaijare

¹ Étara eta juka yátupikene'i. Te natiari'inapuka nákani náwara'a tikawakureana eta matupara'a, tájina táichirawaina, taicha eta juka ewakureka, eta tiúrina tikaiju'ekare.

Eta náitaresira nákani tatupararuanayare eta ewakurekakare

² Takamunu'isera mákani tikawakureya, tájina matapirawainaya eta máitaresira'i, takuija nakuyunaka ena achaneana. Mákani ésunaichu'i esu mayena, mákani tikapika'u'i. Mákani tijaneakawa'i eta máitaresira, mákani achanesamure tijakapara'i naye'e nákani tichimarachanaya. Mákani máituka tímitureka;

³ mákani wa'i tawayuaruina eta térakare. Wá'isera makue'ara'i. Mákani wa'i takuwayuaka eta plata.

⁴ Tikaiyakareyare te mapena. Máitukayare eta makajurusirayare ena machichanaveana, tisuapajira'ianayare nákani machichanaveana, tipikaura'ianayare máicha;

⁵ wa'i tisiapaima'i mákani achane wa'i máituka'i tikawanairipi te mapena. Tavetijipapuka eta juka ewakureka, waipa náitukaima'i eta naechejirisiraina ena vichamuriana.

⁶ Wa'i tisiapaima'i mákani mapaemunawa'i máe'ika ema Viákenu, machu makasiñawawaika eta masiapira'i eta matupara'a'i. Eta taka'e eta mákipaisirawa'i ema Wínaraji.

⁷ Éneichuware takamunu'i mákani pastuleruyare'i tikapika'u naye'e ena apamuriana achaneana, apaesa wa'i nakuechejika eta maye'e, machu máituruka ema wínaraji.

Tiúrianayare'i ena tikawakureana eta tikaijare diácono

⁸ Éneichuware, nákani tikawakureya eta diáconokare, takamunu'i tikapika'uanayare eta náitaresira'i, wa'i apipiemanaima'i eta náechejirisirawana, wá'isera tikawa'arasianaima'i, wá'iware tijamurara'ianaima'i.

⁹ Takamunu'iware náimatiyare yátupi eta tisuapakareana'i maye'e ema Jesús, náitauchiraipa tamutu, tájinapa náichirawaima'i te mamira'u ema Viya.

¹⁰ Tatiwayare nakasamairunumaya te yátupi'ipuka tiuri, tájinapuka náichirawaima'i, té'esera tiúriana'i, énara tuparairukanayare'i eta ewakureka diáconokare.

¹¹ Énerichuware, ena esenana, takamunu'i tikapika'uanaya, wa'i nakuecheji'i, súkani tijaneakawa'i eta suítaresira, tájina náichirawaima'i, títaura'ianayare.

¹² Ema katupára'ayare, takamunu'i mákani ésunarichuware esu mayena, máitukayare eta máimitusirayare ena machichanaveana, tikaiyakareyare te mapena.

¹³ Taicha te náitaucha'i tamutu eta natupara'ana ena diáconuana, tikunachakareana'i tipíkauchakareana'iware, tási'a, éneichuware tétumesamurechawainapa eta nakametarairuira'i eta máimiturapiana ema Jesucristo.

Jé'eware eta juka té'ikakare

¹⁴ Puiti nukunewaya eta nítekapirawaneya eta ara piye'e, té'esera vuícha'apuka nukuitujikawa níteka, nukajurevi'isera juka

¹⁵ apaesa te wa'i nukuitujikawawane pítukapa eta táuriwaina eta pítaresiraya, taicha machichavi'i píti ema Viya, viti manerejiruana'i ema yátupikene'i Viya, viúnaka'i vímitureka'i yátupi eta máechajiriruwana.

¹⁶ Taicha eta juka vé'iru'i vimutu, tétavikawa'i eta táuriwa taechapewa'i: Ema Viakenu timerekawa'i eta máukupaisira'i makake'era'i eta juka viake'e'i viti achaneana, émaipa ema Machanewa Viya makametarapi'iware eta yátupira'i Machicha ema Viya. Náima'a'iware ena ángeleana eta máechepusira'i te máekari. Nakametarairpa tamutu awasareana, namutu achaneana nasuapa'i te juka apake'e. Ichapemuriana ena tijachapána eta majaraiwa te anuma.