1 Timoteo 2 - Táurinakene máechejiriruwa’i ema Viya tikaijare

Ema Pablo máimituka eta nayujarauchirawaya

¹ Tatiwayaresera nutuparaka'e, wa'i takuechuki'a eta eyujarasiraina, eyaseuchawa, tamutu e'asulupayachayare ema Viya, eyaseuchayarewa namutu ena achaneana.

² Énerichuware eyaseuchayare ena akenukana énapa ena apamuriana tuparairukana, apaesa táuri eta náechapajirisiraina eta awasareana, wá'ini vikuima'aini eta táiñe'ikeneana, víti vímiyanawa'ini viúri'ini te mamira'u ema Viya, vikapika'u'ini naye'e ena achaneana.

³ Taicha ema Viya Makatiura'ikene máurika'i eta víchira'i víti eta júkana.

⁴ Taicha mawara'a'i ema máimimatichayare namutu ena achaneana eta yátupikeneana máechejiriruwana apaesa náuchuku'a ena apanawa.

⁵ Taicha májina apanaina'ini, makarichu ema Tata Vikaiyakene, émanaichuware ema achane techejiucha'i mamira'u ema Viákenu, te namira'u ena achaneana: makarichu'i ema Viákenu Jesucristo.

⁶ Ema Viákenu Jesucristo tíjarakawa'i tépena taicha eta makuchukuira'aviya vimutu viti achaneana, puítisera mawara'a máimimatichayare namutu eta juka arairu'i vímiturapiana.

⁷ Eta taka'e'i, manerejirunuichu'i maye'enu'i apústule, nukametarairuyare tamutu awasareana, nímitukayare'i ena apawasana eta nasuapiraina ena eta yátupikeneana máechejiriruwana ema Viya, nutupiruwa'i nuti eta juka néchejisira'i, wa'i népiya'ira'iwaina'i.

Eta napanereru ena ajairana enapa ena esenana

⁸ Eta taka'e, nuwara'a ena achaneana nayujaraka'ini tamutu eta takiñakukujiana, nakanukecha'ini eta nawa'uana te anuke'e te mamira'u ema Viya tapachina'ini eta napanereruana, wa'iware nakúsemamaju'e wa'iware nakukapaemajirikaka.

⁹ Énaipa ena esenana, táuri'ini eta nakamuiri'airana, wa'i nakúye'e'eakaicha eta nakamuiri'aira, náetupirikawa'iseraini, wá'isera nakuwayuchaini eta nakatatasirana, wá'isera nakuwayuchaini nakúye'e'eakawa'ini eta uru, eta perla, eta tasiwachakeneana múiriareana.

¹⁰ Étaipa náurinawa'i yátupikene'i, eta náimeresirawaina eta yátupina náe'isira'i ema Viya, náichirainaware eta táurikeneanapa.

¹¹ Éneichuware, tiúriyare eta nasamararasira eta náimitukasiwana, wa'i nakuakapaemara'i nákani tímitukana'i.

¹² Énerichuware ena esenana, wa'i tatuparaka náimituka'íni te namira'u ena achaneana kamurikeneana te viúrujisirawana, tatuparaka naejakachucha nasamararakayarechucha eta náimitukasiwana.

¹³ Taicha te máepiyakainapa ema Viya ena viáchukanaveanaini, tínapuka máepiyaka'i ema Adán, tékene'apa esu Eva;

¹⁴ wá'isera émaina'ini ema Adán máinapuka'ini mákipaikawa'ini, ésu'i esu esena, tísapawa'i mawayuaka ema wínaraji, eta suísapirawa'i, namutupa tiákipaikawanapa taye'e eta pekatu.

¹⁵ Tási'a, tikatajiwainapa eta suínasirana, puíticha tanasi'i naye'e ena esenana, tiúchuku'anayaresera, te náimiyanawa náe'ika ema Jesús, étapa eta náemunasiraina ena vichamuriana, takuijaware natapirawaina te mamira'u ema Viya, táuri'ini eta napanereruana.