1 Tesalonicenses 3 - Táurinakene máechejiriruwa’i ema Viya tikaijare

Mawana'i ema Timoteo

¹ Eta tayerewaipa'i eta vimaimanasira'e'i, tétavikawa'i eta véñamirawa'i eta eye'e. Viwara'a'i vecha tája'apuka eta íchararakawa'i, vinasipa víti te Atenas

² tási'a vewatakapaini ema vichamuri Timoteo, máiteka máima'apana'e, émaichu'i mawanara ema Viya, émaichuware vikutikene'i eta vikaematanera'i eta máechejiriruwa ema Cristo. Nuwaneka'i tímikatapana'eyare témurakacha'eyare eta esuapajiraiwaina,

³ apaesa nakuija nakuchawakuejechawa taye'e eta ekatajiwairana naicha ena tikatianara'iana. Échaichu'i eti, eta vikatajiwairaya táichavene eta vé'isira'i ema Viakenu.

⁴ Wá'isera táramikare eta juka, taicha vimetaka'éwane'i te vinasikeneicha'a eta eye'e, eta vikatajiwairayare'i, jé'esareine'i títauchawa'i puíti'ipa, íma'aripa'i eti.

⁵ Eta taka'e, tétavikawa'i eta néñamirawa'i nuti eta eye'e, waipa núrisamure'ini íchavene'i eti, taka'e, nuwanekapa ema Timoteo máima'apaná'e te enasirichu'ipuka eta é'isira'i ema Jesús, taicha nímikauyaya'e'i mákipaika'e'ini ema wínaraji, támapuruji'ini eta vikaemataneasiráipa ema Viya.

⁶ Puítisera eta machaviraipa ema Timoteo, mási'aira'i eta ara eye'e, timetaka'avipa tájinaira'i íchirawaina'ini eta é'isira'i ema Viákenu Jesucristo, étapa eta émunasirakaka'i. Timetaka'aviware eta echarairisira'ávi'i émunasira'avi'i víti, ewaraira'i íja'uchawa'ini íma'a'avi, vikutikaka'i eta viwaraira'i víma'a'e víti.

⁷ Eta taka'e, nuparapenaveana, tamutu eta juka vichararakawa'i eta vikatajiwaira'i etapa eta vecharairisira'e'i, te vechapa eta ichararakawa'i, vécharara'aine'i taicha eta táuriwa'i eta é'isira'i ema Viákenu.

⁸ Eta visamairisira'e'i eti takamitiakaine eta véñamirawa'i, étumecha'avirine'i eta vikatajiwairana, tichawaine'i eta viúrisamurewa.

⁹ ¿Ichape eta vi'asulupayachira'i ema Viya táichavene'i eta iúriwa'i tájinaine tákuti'ini eta viúrisamurewa'i maye'e ema Viya, íchavene'i eti?

¹⁰ Tamutu sácheana, yátiana, viyujaraka'i maye'e ema Viya, viyaseaka'i vítujisirawaina'ini viápechawa víma'a'e, vímituka'e'ini eta apamuriana títukakareana taye'e eta juka vé'isira'i ema Jesús, támutu'ini ítuka.

Eta viyujarasira

¹¹ Eta taka'e, viyaseaka'i ema Tata Vikaiyakene émapa ema Viákenu Jesucristo náijaraka'avi'ini eta vítujisirawaina víteka véjirapana'e.

¹² Énerichuware makajuruka'ini ichape ema Viya eta émunaraiwaina naye'e ena echamuriana, énapa ena apamuriana achaneana, tákuti'ini eta vémunasira'e'i víti.

¹³ Máijaraka'éni táuriwaina eta esamureana takuija etapirawaina, máepachinacha'ini eta iáchanewana apaesa ekurisamurecha ema Tata Vikaiyakene te jena sácheyare machaviraya ema Viákenu Jesucristo, mási'airaya te anuma, mámirayarepa'i ena apamuriana manerejiruana'i.