1 Pedro 3 - Táurinakene máechejiriruwa’i ema Viya tikaijare

Natuparakasiwa'i náitaresirayare ena nakaparapekeneanapa

¹ Takutikene eti esenana ekaimakeneana, epikauchayarewa ena ímanaveana, apaesa mákani wa'i masuapa'ini eta máechejiriruwana ema Viákenu, ekajimuyaka eta nasamureana táichavenena'i eta iúriwa'i naye'e,

² Waipa tákamesaima'i échejirika, taicha náima'ayare eta esuapajiraiwa'i naye'e, epikauchira'iware.

³ Wa'i etainayare te aneka taimerekaya eta iurinawayare eta eye'e'eana te iake'eana, eta uru etapa eta ewayuyujisira eta ekatatasirana, etapa eta ekamuiri'ara eta janunumekana tasiwachakeneana muriare,

⁴ taimereka eta iurinawaya ímerekayarewa eta iúriwa yátupikene'i, tási'akenena te esamureana, maitawakakaina'ini eta iurinawaina, taurikakare'ini eta iachanewana. Eta juka iurinawayare tiuripana'i taye'e eta te mamira'u ema Viya.

⁵ Taicha akane ena vénara'ana esenana náinapureana'i té'ikana'i ema Viya, taka'e'i eta náurinachirawa'i eta náitaresirana, taicha yátupi'i eta nakasiñawaira'i maye'e ema Viya, tási'a, tétavikawa'i eta napikauchira'i ena náimanaveana.

⁶ Ekutiyare esu vénara'a Sara, suímereka'i eta susuapajiraiwa maye'e ema suima Abraham, taicha ani suka'e'i maye'e “eñi nákenu.” Te takuija ekupika eta ichira eta taurikeneana, eti suchicha'eyare esu Sara.

⁷ Étipa ajairana ekaparapekeneanapa, ejapanuyare ena eyenana. Ejaneakaware, écha'i ena eta wa'i túmena'ini, yátupina'isera eta émunasira'i ena, taicha ekutikakayare eta ejakapirayare eta íkuchi'i eta ítaresiraya maye'e ema Viya te jena sacheyare, te iuri naye'e, esamakareya te eyujaraka.

Ekamichira'i eta íchira'i eta táurikeneana

⁸ Ámutu eti, ákutikaka'i eta epanereruana, ejapanukaka, émunakakaware naye'e namutu ena echamuriana, ekajira'i, mánsu'ena'i.

⁹ Tijurikati natupiaka'epuka, náume'a'e, wá'isera ekujikapa, eyaseakachucha ema Viya eta náurikakarewaina, taicha mawara'a ema Viya vijapanura'iyare'i víti, vikutiyare ema eta majapanuraiwa'i, tatiari'iyare táitsiwayare viye'e máicha.

¹⁰ Taicha: “Mákani mawara'a'i tiúritaresira te apake'e, tamutuyare sacheana tiúriya, wa'i tikaetemarekaima'i wa'iware tépiya'ira'ima'i, wa'i téchejijikaima'i, wa'iware tiwayuarekaima'i,

¹¹ érajikawa taye'e eta tamaurikeneana, ichayare eta táurikene, etanuka eta iuriwaina, tási'a e'ika eta.

¹² Taicha ema Viya majaneaka ena náurikeneana tisamakareana'i eta nayujarasirana, énasera ena tíchana'i eta tamaurikeneana, ena makatianaruana'i ema.”

¹³ Nájina tíjarakawaima'i titupiaka'eana te náima'a'i icha eta táurikeneana.

¹⁴ Tijurikati natiari'ipuka ena tikatianaka'eana'i táichavene'i eta táuriwa'i eta ítaresira'i, tási'a, tétavikawaya eta iúrikakarewa. Wá'isera ekupika jákani náichira'epuka, wá'iware iáwamira'uima'i naye'e,

¹⁵ íjarakawasera yátupi eta é'isira ema Viákenu. Te nayasereka'epuka eta takayema'ipuka eta é'isira'i ema Cristo, táuri eta ejikapirawaka taye'e eta ekuchapakene.

¹⁶ Tátupiruwa táuriware tamutu eta íchakeneana, eta náimaira'ena namutu ena achaneana, apaesa ekamatinaka nákani téchejisiaraka'eana'i eta táuriwa'i eta é'isira'i ema Cristo, nátsiri'apaini eta náechejijisira.

¹⁷ Te máisapa ema Viya eta náemekatajiwachira'e táichavene'i eta iúriwa'i, tikunachakareyare maye'e. Tájinasera ekunachakarewaima'i te ekaviurewa'i.

¹⁸ Taicha ema Cristo, éta'eichu'i vímikapaka'i, táichavene'i eta vipekaturana. Ema, tétavikawa eta máuriwa, matapiraware'iware. Tíjarakawa'isera tikatajiwaya víchavene'i víti wínarajikeneana, mawaraira'i tiáma'avi me Viya. Tépena'i eta máke'e, étasera eta máchanewa tímiyanawaichucha títareka.

¹⁹ Tiyanawarepa máejirapanawaka'i eta náchanewana ena náepenakeneanaini nakaeratakeneana'i.

²⁰ Ena nakana antivuanaini masuapajiraira'anaini'i, machamurianaini ema Noé. Ichape'inéni eta makamichira'i ema Viya eta makuchapirawaka'i eta nasuapiraina'ini, wa'isera náeñamawa'ini eta náimaira'i ema Noé máepiyasira'i eta ichape pakure. Taka'e, te témirikapa eta ichapekene tikiwa, úchuanaichu'i ena tiúchuku'ana'i taye'e eta ichapekene une.

²¹ Puiti, eta une, nímikuticha'e'i eta víkachasi. Eta vikaikachasira'i, wa'i étaparakaina táepachiaka'avi'ini eta viáke'e. Étasera eta vikaikachasira'i, étapa tímereucha'avi eta majapanuira'avi'ipa ema Viya, tamutu eta vipekaturana. Yátupina eta viúchukuirayare táichavene'i eta máechepusira'i te máekari ema Jesucristo.

²² Puiti ema, tiyanaipa'i te anuma; téjakaipa te mawaure ema Maiya. Tétavikawa'i eta masuapakarewa'i naye'e namutu ena maye'eana ángeleana. Énapa ena wínarajiana, nasuapa'iware.