1 Pedro 2 - Táurinakene máechejiriruwa’i ema Viya tikaijare

Eta arairu mawasa Viya

¹ Eta taka'e, támutupa ínajika eta ewainararajiwanaini'i, tamutu eta ekaetemaraiwaini'i, eta apipiemaira'eni'i, eta ekapinaruraiwaini'i, étapa eta écheji'iwanaini'i.

² Ákuti ena amuyana nauchusirawana ichape eta nawaraira eta terana eta leche tipachiama tiurinama, apaesa eta tikajurukayare'i tauri eta najurusira nauchuku'a.

³ Taicha eti échaipa'i imatipa'i eta mauriwa'i majapanuraiwa'i ema Tata Viakenu.

⁴ Yátupina eta ekasiñawaira me Viákenu, taicha tétavikawa'i eta makasiñakarewa'i, makuti eta mari máepenakaka'i ema, náepurukene'i ena achaneana, manerejiru'isera ema Viya taicha tétavikawa'i eta makunachakarewa'i maye'e.

⁵ Éneipa eka'e'i eti, ekutiripa eta márija'iana máepenakaka'i, taka'e puiti, táuripa eta ekachanerakakainapa, makarichu ema Viya ema ekaemataneakaya, tiwayuaka'eya eta esuapajiraiwaya eta máijarasira'eyare'i eta ématanepachuyare, énerichuware ekatupara'aipa santu'enapa, ekutiyare ena tiyujarakara'iana eta te templo, eta maye'e ema Viákenu Jesucristo imereka'ini eta iamawa'uana te mamira'u eta mawara'keneana yatupi ema Viya.

⁶ Eta Takapika'ukene Ajureka, ani taka'e: “Nuti nunakayare te Jesusalén eta etana mari eta juka mari tetavikawa'i eta tatumewa'i, takanerejikene'i tetavikawa eta tasiwachwa'i; ena tikasiñanayare taye'e eta juka mari, waipaine'i titsiri'akareanaima'i.”

⁷ Eti, esuapana ema Viya, eta juka mari tetavikawa'i eta tasiwachawa'i eye'e eti; enasera ena masuapajiraira'ana titauchawainapa eta takayemakene eta Takapika'ukene Ajureka: “Eta juka mari naepurukene'i ena tepiyarekara'iana eta templo, Eta juka mari etapa tikunachakare'i tetavikawa'i eta tatumewa'i tasiwachawa'i.”

⁸ Enaipa enanakana apamuriana: “Etajuka ichape wama'i tási'a etapa eta mari, etainapa eta tiakipaikayare ena masuapajiraira'ana'i.” Ena nakana masuapajiraira'ana enainapa tiakipaikawanayare taichavene wa'i nasuapa'ini eta maechejiriruwa ema Viya: etapa temecharekayare.

⁹ Étisera manerejiru'eipa ema Viya, machicha'eipa. Tachicha'eipaware eta máwasa. Tituparaka'eipaware ema eyaseuchinawakayare ena achaneana eta maye'e. Majupa'a'e'iware ema Rey. Puiti émapa makarichu'i técha'e'i, taicha maveku'akene'eipa taye'e eta timapiku, tímisiapa'eipa taye'e eta táurikakarekene majaraiwa ema.

¹⁰ Kape juka ítaresira'i eti, wa'i ímati'ini ema Viya. Wícha'aware écha'ini eta majapanuira'e'i ema. Puítisera ewapinawa'i eta ímatira'i yátupi eta majapanuira'e'i, taicha machanera'eipa.

Yátupina eta ekaemataneasira ema Viya

¹¹ Némunarukeneana nuparapenaveana, puiti tímikutijirikawa'i apawasa'e'ini, taicha iávi'aicha'a te juka apake'e. Eta taka'e, waipa táurika'ini ícha'ini eta tajamurachakeneana eta iáke'eana. Taicha eta, tawara'a'i tákamitiekene'a eta iáchanewana.

¹² Iúri'isera eta ekachaneraicha'a ena achaneana te juka apake'e máimatira'ana'i ema Viya. Tayanapane nakatianaka'e, naechejika eta eye'e, ekuti'i ena máuritaresirana náicha'e. Ímerekayaresera eta iúriwa'i apaesa ena nakunachayare ema Viya, nawara'ainapa náe'ika ema, taicha náima'a'i eta táuriwa'i eta ítaresirana'i.

Vipikauchayare ena akenukara'ana

¹³ Táichavenena'i eta é'isira'i ema Viákenu, ímerekayare eta esuapajiraiwa naye'e ena akenukara'ana te juka apake'e: kuti ema Emperador, énapa ena tuparairukana, taicha ena anuke'e'i eta nawakureana'i,

¹⁴ ena, tikatupara'ana'i náikuñakawakayare ena achaneana wínarajikeneana, téjekapawana'i. Énasera ena achaneana tiúriana títaura'iana'i, tikaemunakasianayare'i.

¹⁵ Taicha ema Viya, mawara'a'i íchayare eta táurikeneana, apaesa ekamatinakaya ena máecheraireana nákani téchejikana'i eta eye'e.

¹⁶ Yátupi'i waipa tapamiru'ena'i eti eta esuapira'i eta wanairipianaini. Wá'isera ekuyunaka eta wa'i tapamisira'ena'ini, táetseraruina icha eta tamaurikeneana. Esapi'asera ímerekawayare yátupi'i eta mawanara'era'i ema Viya.

¹⁷ Epikaura'iyare naye'e namutu ena achaneana. Émunajirikakayare naye'e ena vichamuriana. Ímereka eta epikauchira'i ema Viya. Epikauchayare'iware ema rey.

Naichakeneasa ena wanairukana

¹⁸ Eti, te ekaematanerekapuka, esuapajira'iyare, epikauchayarewa nákani iákenuana'i. Wa'i nakukarichu esuapa nákani tiúriana. Tákutikaka eta epikauchiraina nákani wínarajiana'i.

¹⁹ Te ekatajiwa náicha, tétavikawa'i eta ekunachakarewaya me Viya te ekamicha'i tamutu, taicha ewara'a'i ítaucha eta mawara'akene'i ema Viya.

²⁰ Té'esera náikuñaka'e táichavenena'i eta íchira'i eta tamaurikeneana, tájina ekunachakarewaima'i eta ekamichira'i, taicha tatupiruwa'i eta ekaikuñaira'i. Té'esera táimikuñaka'e eta íchira'i eta táurikeneana, ekamichira'i eta náichira'e'i, tétavikawa eta ekunachakarewaya te mamira'u ema Viya.

²¹ Taicha ema Viya, eta máichuira'e'i, mawara'a'i ekutiyare'i ema Cristo eta makamichira'i tamutu eta mátajiwana'i íchavene'i eti, mawaraira'i ekarawa'u eta máuriwa'i, ekutiyare'i ema.

²² Ema Cristo, tájina'ineni maviurewaina'ini, mapekaturaina'ini. Nájinaware makaetemakenena'ini.

²³ Te napanararauchapa, ema, wa'i makapaemachawaka'ini, makatitiema'ipukaini eta náemekatajiwachira'i. Máechejika'isera ema Maiya, máima'aine'i ema. Taicha yátupi'i eta máikuñasirawakaya ena témekatajiwachana'i.

²⁴ Ema Cristo tikaikuña'i víchavene'i víti eta vipekaturana. Tétavikawa'i eta mátajiwana te máke'e eta vemetatasira'i te crusu. Makamicha'i tamutu, mawara'a'i waipa takuwayuaka'avi, tatupiruwayare'i eta vítaresiraina. Eta majarana, eta tikanaraka'eyare.

²⁵ Eta ítaresiraini'i akane eti, ekuti'i eta uvesa táemitiaru. Puítisera iáwa'akaipa ema Cristo, émapa tijaneaka'e'i, tikatiucha'e'iware eta iáchanewana.