1 Juan 1 - Táurinakene máechejiriruwa’i ema Viya tikaijare

Eta viúrujiasira ema Jesucristo

¹ Vímiajureka'e eta eye'e. Viwara'a vimetaka'e eti, eta véchakene'i maye'e ema Jesucristo, ema tíjaraka'avi eta echéjirirukawa tikaitarekara'i. Ema, matiari'i'i akane te tépanawapa tamutu. Taka'e, tiúkupaika'i, tímerekawa'i eta viye'e. Visamapa eta máechejiriruwa. Kamuri eta sácheana eta vímararasira'i ema te viúki'a. Vémama'aka'i te viwa'u.

² Ema, matiari'i'i akane, manasikeneipa'i maye'e ema Maiya. Tiúkupaikapasera eta viye'e. Víti vímatipa eta achánekenera'i ema. Tási'a, puiti vimetaka'e eta juka víma'akene'i étapa eta visamakene'i.

³ Vimetaka'e taicha viwara'a iúrujikawa'ini eta viye'e. Taicha víti viúrujikawa'i maye'e ema Tata Vikaiyakene émapa ema Machicha Jesucristo.

⁴ Tási'a, vikajure'epa eta juka, taicha viwara'a yátupina eta iúrisamurewaina.

Eta majaraiwa'i ema Viya

⁵ Vimetaka'e eta máimitusira'avi ema Jesucristo. Eta juka eta makayemakene'i: jarari'i eta tijara'i maye'e ema Tata Vikaiyakene, tájina timapikuina maye'e.

⁶ Te vinasi'ichupuka víti te timapiku, tási'a te vika'e'ipuka, viúrujikawa maye'e ema Viya, tási'a víti vépiya'ira'ipa. Wa'i viúrujikawa'ini maye'e, wá'iware visuapa'ini eta mawanairipiana.

⁷ Té'esera yátupina eta visuapira eta mawanairipiana, vinasi'ichu'i eta te majaraiwa'i ema Viya, takuti'i eta manasiraichu'i ema eta te majaraiwa'i. Tási'a, eta vinasiraichu'i eta te majaraiwa'i, viúritarekayare'i eta viúrujiusirakaka naye'e ena vichamuriana. Éneichuware máepachinachayare tamutu eta vipekaturana, taicha te tépenapa ema Jesucristo Machicha ema Viya, máepusaika'i eta máitine eta máepachinachira'aviyare'i.

⁸ Te vika'e'ipuka tájina eta vipekaturaina, vítijiwapa viwayuarakawa'i, taka'e, wa'i wátupiema'ini eta vipanereru'i.

⁹ Té'esera vitupiruwa'i eta vimetauresirawa'i eta vikapekaturairana maye'e ema Viya, je'ewarepa vikasiñawainapa maye'e ema Viya, ema matapijraware, japanupavinapa eta vichira eta vipekaturana, tási'a tepachinacha'avinapa eta taiñema'ikeneana vipanereruana.

¹⁰ Té'esera vika'e'ipuka tájina vipekaturaina, vépiyaekene'a'i ema Viya, vímikutijirikapa ema maepiya'ira'ini, wa'i tátupiruwa'isni eta vijachapiraina'ini eta máechejiriruwa.