1 Corintios 7 - Táurinakene máechejiriruwa’i ema Viya tikaijare

Ema Pablo maechejirikawaka ena nakaparapekeneana

¹ Tiuri puiti, nujikapa'eyare eta juka eyaseresiranu'i te iajure. Yátupi tiúri'ineni máyenarena'ini mákani achane;

² Táichavenesera eta tawayuaraiwa'i eta pekatu, tikamunukare'i ena ajairana nayenapachuina, éna-ipa ena esenana tikamunukare'iware náimapachuina.

³ Mákani achane te sutiari'ipapuka esu mayena, takamunu'i máitauchayare eta máitatiraya máemunasiraya esu mayena. Ésuipa esu esena te tikaimaipapuka, éneichuware suítauchayare eta suítatiraya suémunasiraya ema suima.

⁴ Taicha esu esena waipa ésuina'ini téchinawa eta suáke'e, émapa técha'i ema suima, ene maka'e'i ema ajaira, wáipaware émaina'ini téchinawa eta máke'e. Ésuipa'i técha'i esu mayena.

⁵ Eti ekaimakeneanaipa, wa'i ekuepurukaka taye'e eta iánesirakakairana. Té'esera tatiari'inapuka eta eyujarauchirawayare me Viya, ekutikaka'ipuka eta epanereru'i, tísapakare ínajika ánipina eta iánesirakakana. Te táekenenapa, táurikaware echáwauchakakaware, apaesa ema Wínaraji wa'i makuituruka'e eta máimijamurachira'e ena apanana.

⁶ Tiuri, eta juka numetasira'e'i, wa'i nútina nukawanairipi. Nísapasera eta énena áka'e.

⁷ Nuwara'a'inéni ákutinu'ini nuti eta mayénarenuira'i. Víjarakasipachusera me Viya eta vítaresiraya. Narari'i ena ajairana máyenareana eta náitaresira. Narari'iware ena esenana máimaruana eta náitaresira. Narari'iware ena apamuriana máijararuichu ema Viya tikaimana.

⁸ Énaipa ena nákara máyenareanacha'a, énapa ena máimaruanacha'a, énapa ena tépenaimana, tiúripana nánasi'ini máimaruanaina'ini; nákutinu'ini nuti.

⁹ Étasera te wa'i nárata'a'i tikaratakawana, takamunuichu'i tikaimanayare, apaesa wa'i nakuepujukichawa taye'e eta pekatu.

¹⁰ Tási'a puiti, nutuparakawakayare ena nakaimakeneanaipa. Ema ajaira wa'i makuinajika esu mayena. Esu esena wá'iware sukuinajika ema suima. Eta juka wanairipi tási'akene'i maye'e ema Viákenu, wa'i tási'akenena nuye'e nuti.

¹¹ Té'esera natiari'inapuka ena náinajikaka, wa'i táurika'ini nápechawa'ini nakaima'ini, nakakachane'ipukaini. Takamunu'i tichawauchakakanayare tive'akakana.

¹² Eta juka numetaru'eya, wa'i wanairipina me Viákenu. Níjaraka'esera eta juka nupanereru nuti. Te matiari'ipuka mákani vichamuri esu mayena wicha'a vichamurina'i, te tiúri'ipuka eta nakachanerakaka'i, wa'i táurika'ini máinajika'ini esu.

¹³ Éneichuware, te sutiari'ipuka súkani esena vichamuri ema suima wicha'aware vichamurina'i, te tiúri'ipuka eta nakachanerakaka'i, wá'iware táurika'ini suínajika'ini ema.

¹⁴ Taicha ema suima, ichape eta majapanukarewa me Viya, táichavene'i eta sukaimaira'i esu mayena. Éneichuware esu esena mayena'i ema vichamuri, ichape eta sujapanukarewa me Viya, táichavene'i eta mayenaira'i ema achane vichamuri. Énaipa ena nachichanaveana majapanu'iware ema Viya náichavene'i ena tikachichana, waipa náepurukare'ini me Viya.

¹⁵ Té'esera mákani wicha'a vichamurina suíma'i esu vichamuri'i mawara'apuka máinajika esu mayena, suísapaine máinajika. Ema Viya wa'i makawanairipi eta suíchejirika'ini ema, mayanaine. Taicha ema Viya mawara'a'i tauri eta vipanereruana. Éneichuware súkani esena wicha'a vichamurina'i mayena'i mákani vichamuri, te suwara'apuka suínajika ema suima, éneichuware máisapaineware suyana.

¹⁶ Taicha piti esena, wa'i pecha te pimaitakayarepuka pikajayayasamurecha ema pima eta máe'isiraina ema Viya. Píti'ipa piti achane, wá'iware pecha te pimaitakayarepuka pikajayayasamurecha esu piyena eta sué'isiraina ema Viya.

¹⁷ Ema Viákenu tíjaraka'e'i eta ématanerepiana'i te tíchu'a'enapa. Etupara'apachu'i eta ématanerepiya. Wa'isera ínajikaima'i, ímiyanaware ítauchaya eta etupara'ana'i. Étara eta juka nuwanairipi naye'e ena vichamuriana tikawasana'i te tamutu awasareana.

¹⁸ Te natiari'ipuka nákani timikutiarachawanaipa'i te namaimatiraicha'a ema Jesucristo, wa'isera ekuyumurukawa eta ekaye'eraipa eta ikutiara, nakanisera wicha'a naicha'ini eta naikutiara, waipaware nakukamesawa naicha eta naikutiara.

¹⁹ Tájina wa'i étaparakaina eta vimikutiarachawa, te wa'ipuka vimikutiarachawa étasera tiwara'akare'i vikaemataneakayare eta mawara'akeneana'i ema Viya.

²⁰ Namutu nákani máichu'akeneana ema Viya, wa'i náitsiwachaima'i eta náematanerepiana'i te máichu'ainapa ema Viya.

²¹ Te ekakenu'ipuka eti te tíchu'a'enapa ema Viya, wa'i ekueñamawa eta ekakenuira'i. Té'esera íma'a eta iuchukuiraina, tájinachucha táichawa.

²² Taicha mákani achane músu'i eta máitaresira, tayanapaneine matiari'ina'i ema mákenuina'i, té'esera te maichu'apa ema Viya, waipa musuina'ini, mákanisera achane nájina mákenuina'ini eta máitaresira, puiti ema mawanaranaipa'i ema Jesucristo.

²³ Taicha mawachareru'e'i ema Viya. Ichapemuri'i eta makatajiwaira'i íchavene'i eti. Puiti machanera'eipa ema, eta taka'e, te nawara'apuka nayuruka'e ena achaneana, wa'i ekuisapawa na'apapika'e eta ekaemataneasirayare ema Viya.

²⁴ Eta taka'e, nuparapenaveana, ímiyanawayare ekaematane maye'e ema Viya. Ítauchayare eta ématanerepipachu íjarakasi'i me Viya te ekaichu'akasipa.

²⁵ Tiuri puiti, tájina wanairipina tási'akenena me Viákenu naye'e ena amaperuana máyenareanaicha'a énapa ena máimaruanacha'a. Nútisera numetaka'eya eta nupanereru'i, nuwara'asera esuapanu taicha nuti nukaimitukasikene'i maye'e ema Viákenu, táichavene'i eta majapanuiranu'i.

²⁶ Puiti juka vítaresira'i, tétavikawa'i eta vikatajiwaira'i, eta taka'e, németeaka nuti tiúri'ichu nánasi ena ajairana naye'e ena nayenana nákani nakaparapekeneanapa, énaipa ena máyenareanaicha'a, wa'i nakutanuka ena nayenaina.

²⁷ Te sutiari'puka esu mayene ema achane, waipa makunakika. Te najinaicha'apuka mayenaina wa'iware makutanuka.

²⁸ Mákanisera makaparapekenepa, tájinachucha pekatuina eta mavira'i esu esena. Ésuipa súkani amaperu esena, te tatupiruwa'i eta sukaimaira, tájinachuchaware pekatuina eta sukaimaira'i, táitsiwasera ichapeyare eta nakatajiwairaya eta náitátirakakaya, tavetijipa te natiari'inapa ena nachichanaveanaya, eta taka'e, nuwara'a numetaka'e apaesa wa'i ekukatajiwa'ini.

²⁹ Tiuri, nuparapenaveana, nuwara'a numetaka'e: Tikutima'i ánipine eta juka vítaresiraya puiti juka vikaiju'eyare. Eta taka'e, ena nakaparapekeneanapa wa'i etainayare ta'apapirikawaka eta ekaemataneasira ema Viákenu, wa'i takukarichu eta ekaeñamasirawa naye'e ena eyenana,

³⁰ te ekatisamurewa'ipuka, wa'i ekuisapa ta'apapika'e'ini eta ekaemataneasira ema Viákenu. Te jarari'ipapuka eta takaurisamurechira'e, wá'iware ekuisapawa ta'apapika'e'ini. Te ekaima'akene'ipuka, wá'iware ekuisapa ta'apapika'e eta ekaemataneasira'i ema Viákenu,

³¹ Wa'isera ekukañamarakawa eta ekaye'eirayare eta íma'akeneana te juka apake'e. Taicha tamutuyare'i témitiaka te táitekapapa eta táitaviraya eta juka apake'e.

³² Eta taka'e, wa'i nuwara'a ekañamarakawa taye'e eta júkana, taicha mákani achane máyenare'i, tájina ta'apapirika'ini eta makaemataneasira'i ema Viákenu;

³³ mákanisera achane te sutiari'ipa esu mayena, tikañamarakawainapa taicha eta máitatirayare esu mayena, mawaraira'i makurisamurechaya esu,

³⁴ ene naka'e'i ena esenana. Wa'i tákutikaka eta napanereruana suye'e esu esena sukaimakene ésupa esu esena máimarucha'a. Taicha súkani máimaru'i ta'apasamurecha'i eta suítatiraya ema Viákenu, suwaraira'i suítauchaya eta mawara'akeneana, suíjarakayare'i eta suáchanewa étapa eta suáke'e. Ésusera esu esena sukaimakenepa ta'apasamurechapa eta suítatiraya ema suima.

³⁵ Eta júkana numetarapiana'i eye'e, nuwara'a eta táuriwaina eta ícharakawaya. Wa'i nuwara'a nupamika'e taye'e eta takajerakeneana. Nuwara'asera takuija'ini eta ti'apapika'e eta ítatirayare ema Viákenu.

³⁶ Mákani achane te sutiari'ipuka esu machicha esena máimarucha'a. Maimachayare esu machicha, táichavene'i eta suítana'asiraipa. Tatupiruwayaresera eta sukaparaperayare. Tájinachucha táimanena; wá'iware pekatuina.

³⁷ Mákanisera achane, te tájina máichirawaina'ini, nájinaware tipamikaima'i; te mawara'apapuka suánasi máimaruina esu machicha, tiúri'i maicha.

³⁸ Taka'e, tiuriware máicha mákani achane máimachayare'i, tatuparaka'i tikaparapeyare esu machicha. Mákanisera wa'i máimacha'ini esu machicha, ema tiúripana maicha.

³⁹ Esu esena tikaima tatuparaka'i suítauchayare eta suíjarasirawa'i tikaima. Tiámainukawa te táitekapapa eta máitaviraya ema suima, tiúchuku'apa esu. Ésupa téchinawa eta suítaresirayare. Tísapakarepa eta suápechawa sukaima. Takamunu'isera mákani vikutikene'i tisuapajira'i me Viya.

⁴⁰ Tiápajukawasera tiúripana te suánasipa máimaruina. Eta juka tási'akenepa te nupanereru. Németeaka'i nuti tétupikawapa'i eta numetarapiana'i, taicha máwa'arunu'i ema Machanewa Viya.