1 Corintios 6 - Táurinakene máechejiriruwa’i ema Viya tikaijare

Wa'i táurika vimetauchakaka'ini te namira'u ena máe'ikara'ana'i ema Viya

¹ Te natiari'inapuka ena echamuriana'i nawara'a timetauchakakana, wa'i táwara'a nayana'ini naye'e ena tuparairukana máe'ikara'ana'i ema Viya. Étaichu nakamira'ukakaiyayare te emira'u eti nachamuriana.

² Étijiwayare'i étupirikaka eta íchawakenewana'i. Wa'i étinayare etanuka ena masuapajiraira'ana'i, taicha járajapayare eta sácheyare tikayasesere'ianaya te emira'u eti ena masuapajiraira'ana'i. Puítisera eta íchawakenewana'i ánichichakeneana'i, eti tatuparaka étupirikaya.

³ Échaichu eti tituparaka'aviyarewa tikayasesere'ianayarewa ena ángeleana te vimira'u. Takumapurujichapukaini eta taye'eana'i te juka vítaresira'i, wa'i vikuituruekene'a'ini.

⁴ Puiti eti, te tatiari'ipuka eta íchawakenewa'i taye'e eta juka vítaresira, wá'ikenesera etanukaima'i ena emetauresi'a'ini nákani wa'i énaparakaima'i naye'e ena echamuriana'i.

⁵ Némecha'e eta juka, níma'a te etsiri'apuka: ¿Kúverarekapa nakuija'ini te etaraku mákani émanaina'ini wa'i makuituruekene'a'ini mayasesereka jákani téchakareana'i naye'e ena vichamuriana?

⁶ ¡Wa'i takarichu'ini e'ajirikaka'ini, eti eparapekaka, ekamesaicha'a'i emetauchakakayare'i naye'e ena tuparairukana taye'e eta awasare, maimatira'ana ema Viya!

⁷ Wa'i táurika'ini ícha'ini eta juka, étijikaka'ini eta echamurikaka'i ewara'apa ejararekaka. ¿Wa'ipuka tiuripana ekamicha eta naichira'e ekatajiwaira naicha ena? ¿Tayanapaneine nameyecha'e naimikatajiwacha'e?

⁸ ¡Étisera étiwawaikapa ícha'i eta juka émekatajiwachakakapa, iámeyechapa ena echamuriana eparapenaveanakene!

⁹ ¿Wá'ipuka écha'i eti eta namaitujisirawaya tisiapana te máwasa ema Viya? Wa'i ekuisapawa eta nawayuaka'e naye'e ena tíchana'i eta tamaurikeneana, taicha yátupi'i eta namaitujisirawayare tisiapana ena ajairana esenamareana, énapa ena ajairakakana tive'akakana, énapa ena tikasiñarajiana ena achanemirana,

¹⁰ énapa ena tiamera'iana, yawa'iana, kawa'arasiana, énapa ena tewajiriara'iana, énapa ena wayuarerekana, namutu ena waipaine'i tisiapanaima'i te mawasa ema Viya.

¹¹ Eneni'i eka'e eti te wicha'a imati'ini ema Viya. Puitisera ejachapaipa eta iuriwayare epáchi'aipa eta epeketurana, puitisera santu'eripa'i maicha ema Viákenunu Jesucristo émapa ema Machanewa Viya.

Eta iuchukuiraipa waipa ekuapechawa icha eta pekatu

¹² Natiari'i ena enananajiwaka te etaraku tika'eana: “Nuti néchinawa eta nítaresira'i.” Yatupi ene taka'e, wa'isera tamutu eta viwara'akeneana vicha, tauri'ini. Te nuti nechinawa eta nuwara'akene nicha, wa'isera vikuwayuchawa machu tawayuaka'avi eta tamaurikeneana.

¹³ Eta taka'e eneichuware: “Eta nikakare taye'eichu'i eta viju'e, eta viju'e taikuchichu'i eta nikakare.” Yatupi ene taka'e, emasera ema Viya makaepa'ayare tamutu eta juka apinakene. Etasera eta viake'e wa'i etaina'ini taikuchina'ini vicha eta tamaurikeneana, vechipejika'ini eta viake'e vianeka'ini esu esena apayena, apaimapuka.

¹⁴ Ema Viya makaechepuka'i ema Viákenu Jesús te máekari, ene vika'eyare víti eta makaechepusira'aviyare víti apanawa, taicha tétavikawa'i eta máitupajijiasirawa'i.

¹⁵ ¿Échaichu'i emutu eti, eta iáke'eana maye'eipa'i ema Cristo? ¿Émaipa'i técha'e'i, etiari'iserapuka eti ímijacha táurika'ini vímikachanecha'ini eta viáke'e taye'e eta suáke'e esu esena tú'usi, wáipaine'i táurikaima'i? ¡Wa'i jakaini!

¹⁶ ¿Nuwara'aware némecha'e, te mave'a'i ema achane súkani esena tú'usi, tiánekaka'i eta náke'eana eta nakamujichirakaka'i? Tási'a, eta Takapika'ukene Ajureka, ani taka'e: “Te tive'akakapa, tímikutijirikawapa étanaine'i eta náke'eana.”

¹⁷ Ene Taka'e'i eta vítaresira maye'e ema Viya, eta máwa'asira'avi ema Viákenu, eta viáchanewa takachaneipa ema.

¹⁸ Eta taka'e, ejaneakawa yátupina, machu iákipaikawa taye'e eta tú'usikare. Tamutu eta pekatuana náichakeneana'i nákani achaneana, tajarareka'i eta náchanewana. Tavetijipa, mákani achane tive'a'i esu esena wa'i mayenakenena'ini máimijararekapa ichape eta máke'e. Émajiwapa tijararekawa.

¹⁹ ¿Échaichu'iware eti eta máwa'asira'eipa ema Machanewa Viya eta te iáke'eana, taicha mawaneruichu'i ema Viya eta máwa'asira'eyare'i ema Machanewa Viya? Waipa étina'ini echa eta iáke'eana.

²⁰ Taicha mawachareru'e'i ema Viya. Ichapemuri'i eta makatajiwaira'i íchavene'i eti. Taka'e puiti, ejaneakawapa eta ítaresirana'i te namira'u ena achaneana, apaesa namutu nakunachaya ema Viya.