1 Corintios 14 - Táurinakene máechejiriruwa’i ema Viya tikaijare

Tísapakare eta náechejisiraya eta apaechejiriruwana

¹ Yátupina eta émunaraiwaina. Nuwara'a'iware eyaseaka ema Machanewa Viya eta ítupajijiasirawaina, étaipa eta ítusiraina ekametarairu eta máechejiriruwa tási'akeneana'i maye'e ema Viya.

² Tájina táichawa, nákani téchejikana ema Viya eta apaechejiriruwa. Ema masama'i. Vítipasera viti apamuri waipa wákaikutiara'ini eta náechejiriruwa'i. Yátupi'ipuka máimitureana'i ema Machanewa Viya, wá'isera náimereuchawa'ini eta máimiturapi'i ema.

³ Wa'i tákuti nákani nakametarairu'i eta máechejiriruwana tási'akeneana'i maye'e ema Viya, tikaikutiarakare'i tamutu eta nametarapiana'i. Eta naetumechirawayare etapa eta naechejirisirayare, tási'a etapa eta nakurisamurechi'awaka'i te jákani napanereresirana.

⁴ Ema mákani téchejika'i ema Viya te apaechejiriruwa, maye'echirawaichu'i te máchanewa eta makajurusiraya eta masuapajiraiwaya. Émasera mákani tikametarairu'i eta máechejiriruwana tási'akeneana'i maye'e ema Viya, makajurusina'i eta nasuapajiraiwayare'i ena machamuriana.

⁵ Nuwara'a'inéni nuti ámutu'ini ítupajijiakawa'ini, échejika'ipukaini te apaechejiriruwana. Tiápajukawa'isera eta nuwaraira'i ekametarairu'ini eta máechejiriruwana tási'akeneana'i maye'e ema Viya, taicha étara tiúripana'i eta juka taye'e eta échejisiraina'ini te apaechejiriruwana. Tiúri'ineni échejika'ini, takamunu'isera natiari'ina'ini nákani tiapepirikana, nametakawakasarepaini ena apamuriana eta takayemakeneana'i apaesa tajurusi'apaini eta nasuapajiraiwaina'ini.

⁶ Núti'ipa, nuparapenaveana, nítekapaucha'epukaini néjirapana'e'ini, tási'a néchejikapa'ipukaini te apaechejiriruwa eta eye'e, eti wa'i ákaikutiaraima'i, wáipaware tímikataka'ema'i eta tajurusiraina'ini eta ekasiñawaira'i me Viya. Takamunu'i néchejika'ini te échejiriruwaichu eta nímitusira'ena'ini, eti ekaikutiarasarepaini tamutu eta numetakasiwana'i me Viya, étapa eta máimerechakenenu'i, étapapuka eta máimatikene'i, arairu eta viye'e.

⁷ Eta juka tímikutijirikawa'i te mapacharaji'i eta masiviviripi ema tikasivivi eta, waipa takaikutiarakare'ini tája'apuka eta masiviviripi. Émaipa ema violinista, wá'iware tikaikutiarakare'ini tája'apuka eta mapununerapi.

⁸ Éneichu takuti'i mákani tikachuja eta machuja naye'e ena suntaruana, te wá'iware tikaikutiarakare'i eta makachujaira'i, wáipaine'i tiúrujikawanaima'i ena suntaruana táichu'akeneana'i, taicha wa'i nákaikutiara'ini.

⁹ Ene eka'e'i eti, eta échejisira'i eta apaechejiriruwa, nájina nakaikutiara'ini. Tímikutijirikawaipa nakuija'ini nasamararaka'e'ini eta échejisira'i.

¹⁰ Yátupi tisimutu'i eta apaechejiriruwana'i te juka apake'e, naye'epachu'isera nákani tikaechejiriruwanapa'i.

¹¹ Víti'ipa te náechejika'avipuka ena apawasana te náechejiriruwa, wáipaine'i wákaikutiaraima'i énaipa wá'iware tikaikutiara'avianaima'i víti.

¹² Tiuri puiti, wa'i takumapuruji eta ewaraira'i ejákapa eta ítupajijiasirawanaya máijararu'eyare'i ema Machanewa Viya, tiúripana eyasesereka eta ítusiraina ímitukawaka ena echamuriana apaesa tajurukapaipa eta nasuapajiraiwaina ena apanawa.

¹³ Tási'a, mákani téchejika'i te apaechejiriruwa, takamunu'i mayaseaka'ini ema Viya eta máitusiraina'ini mametakawaka eta takayemakene'i eta máechejiriruwa'i apaesa nakaikutiarasarepaini nákani tisamararakana'i.

¹⁴ Taicha eta viyujarasira'i víti te apaechejiriruwana, te vítapirikapa eta viyujarasira'i, wa'i tánasi'ini véchawa'ini eta vikayemakeneanapa'i, vémitisikawane'i tamutu.

¹⁵ ¿Taja'a nukayemaya puiti? Tiúripana'i viyujaraka te véchejiriruwaichu, tási'akeneana'i te visamure viachanewa, te vijirayarepuka, tiúripana'iware te véchejiriruwaichuware, tási'akenena'iware te visamure, vikaikutiarasarepaipa eta vikayemakeneanapa'i.

¹⁶ Té'esera apaechejiriruwa'i eta pi'asulupayachira ema Viya te piachanewa, taichavene eta ekunachira'i ema. Énasera ena tisamararaka'eana'i wa'i náe'ikaima'i eta e'asulupayachiraya, taicha wa'i nákaikutiarapa'íni eta ekayemakeneanapa'i.

¹⁷ Tiúri'ineni eta eyujarakasa'i eta e'asulupayachira'i ema Viya, énasera ena echamuriana waipa táimikatakawaka'ini eta eyujarakasa'i.

¹⁸ Jé'ewaresera nuti, ichape eta nu'asulupayachira'i ema Viya taicha eta nítusira'i néchejika eta apaechejiriruwana. Nukachuriaka'e'i emutu eti.

¹⁹ Étasera te nukametarairuyare te namuri ena vichamuriana, wa'i nuwara'a nákuti ena tiúpiemana eta náechejisira te apaechejiriruwana, nuti ánipichu te néchejika, tamutu'isera tikaikutiarakare'i naye'e ena nímitureana'i.

²⁰ Nuparapenaveana, eti waipa amaperu'éna'ini. Nuwara'a táuripaini eta epanereruana, eta íchirayare eta táurikeneana. Nuwara'asera ákuti'ini ena amaperuana eta ichiraya eta tamaurikeneana, étisera ákutipa ena achaneana chanaruanapa naitukapa tipanererekana.

²¹ Ema Takapika'ukene Ajureka ani maka'e'i: “Nutuparakayare ena apawasana apaechejiriruana náimitureka eta nuwanairipiana eta naye'e ena achaneana táwakuana'i eta awasare te'epa te naechejiriruwaichu, wá'ikenesera nasuapaima'i maka'epa ema Viya.”

²² Taka'e, nákani tikametarairuana te naechejiriruwaichu, táikutiara'i eta máijarasirawaka'i ema Viya náichavene'i ena máe'ikara'anaicha'a ema Viákenu. Jé'esare, tayuchusamurechawakayare eta nasamararasira'i, énasera nákani tikametarairuana'i te apaechejiriruwa eta máechejiriruwana ema Viya, tayuchusamurechawakayare ena té'ikana'i ema Jesús, taicha tikarawa'uanayare eta nasamararasira'i.

²³ Étasera te jákani iúrujisirawana, te eyujaraka'ipuka emutu te apaechejiriruwana, tási'a, te natiari'ipuka nákani masuapajiraira'anaicha'a, tikaeka'i'eanayare'i ena, náimijachayare'i máuris'i'e'i.

²⁴ Tiúripanayare eta ekametarairuiraya emutu eta máechejiriruwana ema Viya, te échejiriruwaichu. Tási'a, te natiari'ipuka te iúrujirisirawa'i ena masuapajiraira'anaricha'a, tikatisamurewanayare'i taicha eta nasamararasiraya. Tipanerekene'awanainapa eta nakapekaturaira'i.

²⁵ Taka'e, tímatiakawanainapa eta máimatira'i ema Viya tamutu eta napekaturana tayumururewanaini'i, tépuyukanainapa téñauchawanainapa maye'e ema Viya. Téchejisi'a'eanainapa, yátupikeneyapa máwa'akawaka'i ema Viya ena naniana naka'enapa.

Takapika'u tamutu eta iúrujisirawana

²⁶ Nuparapenaveana, ani taka'eyare eta iúrujisirawanayare. Enerejikawa eti íputsiakawayare eta ejirairaya. Éneichuware tinerejikawayare mákani tíjarakawayare ema tímiturekayare. Éneichuware te matiari'inapuka mákani mawara'a'i tikametarairuyare eta mametakasiwana'i me Viya, tájinachucha táichawa'i. Tísapakare'iware eta échejisirayare te apaechejiriruwana. Takamunu'isera matiari'iyare ema tiapepirikaya. Tamutu eta júkana, étara tikajurukayare eta nasuapajiraiwaiya ena echamuriana.

²⁷ Té'esera te natiari'inapuka apinana, mapananapuka ena tiwara'ana'i téchejikana te apaechejiriruwa, tájinachucha táichawa, tísapakarechucha, téwachajirikakanayare'isera te jákani náechejisirayare, wá'iware téjiakawaima'i ema tituruekene'a eta apaechejiriruwa.

²⁸ Té'esera nájinapuka naviyawa'i ema maye'eyare trépete, tiúripana'i wa'i nakuechejika te apaechejiriruwa te namuri ena echamuriana náurujiruwana'i. Tiúri, te nawara'a'ipuka naechejika ema Viya.

²⁹ Nákani tikametarairuanayare eta máechejiriruwana tási'akeneana'i maye'e ema Viya, te apinana'ipuka, mapanana'ipuka, tájinachucha táichawa. Tikamunukare'isera ena náurujiruwana'i napanerékene'ayare'i tamutu eta nakayemakeneanapa'i.

³⁰ Té'eserapuka matiari'i mákani máejaru'i, tikametakasi'ikene'i me Viya. Makuchapawayaresera máitapirikanuma mákani máinapuiru'i téchejika.

³¹ Emutu eti ekametakasikeneana'i eta máechejiriruwana ema Viya. Émanainapachu mákani téchejikayare, apaesa ena ímitureana'i namutu nakarawa'u, náetumechawa apanawa.

³² Ena tikametarairuana tatuparaka'i tikuchapawanayare. Wa'i tikainapupuikawanaima'i.

³³ Taicha ema Viya wa'i máwara'a mapacharajina'ini nákani tikametarairuanayare. Tási'a eti ekaejarusinawayare apaesa ekurisamurecha ema Viya. Táepiyaichu'i eta juka viye'erepi víti te viúrujisirawana.

³⁴ Ena vichamuriana esenana timatinanayare'i, wa'i téchejikanaima'i. Nasamarasinawaichucha. Taicha suíjaraichu'i me Viya esu esena susamararasirayareichu'i.

³⁵ Te tatiari'ipuka eta suwara'akene'i suecha esu esena, tiúripana'i te náitekapapa te napena suyaserekapa ema suima. Taicha wa'i súri'a'ini esu esena sukayasesereru'ini eta suwara'akene'i suecha te namuri ena echamuriana.

³⁶ ¿Tája'a takayema eta ekasiñawawaisira'i? Wa'i étina'ini ínapuka'ini mametaka'e'ini ema Viya eta máechejiriruwa.

³⁷ Te Natiari'ipuka nákani tímijachawanaipa náimatiekene'aipa tamutu eta máechejiriruwa ema Viya, náimijachaipapuka máwa'akawakaipa ema Machanewa Viya, tatuparaka'i ena napánerechinawanumayare eta juka nájure'i eye'e, tási'akene'i me Viákenu, mawanairipichu'i ema.

³⁸ Té'esera matiari'i'ipuka mákani tépuruyare eta juka numetarapiana'i, émaina máepurukare, waipa tisamakarema'i eta eye'e.

³⁹ Tiuri, nuparapenaveana, epamikawachucha ekametarairu eta máechejiriruwa ema Viya. Tási'a, táurikachucha ísapa nákani téchejikanaparaka'i te apaechejiriruwa.

⁴⁰ Takapika'u'isera támutu eta iúrujisirawana, ekaejarusinawapa'i tamutu eta íchakeneanayare te iúrujisirawana'i.