1 Corintios 13 - Táurinakene máechejiriruwa’i ema Viya tikaijare

Eta yátupikene vémunaraiwaya

¹ Víti'ipa, te takuija'ipukaini eta vémunaraiwaina'ini, waipa tisuapakaréma'i eta vimetarairuana, vémunasirikawapa tayanapane vítuka'ipuka véchejika tamutu eta apaechejiriruwana, wákutipukaini eta náechejisira ena ángeleana.

² Te takuija'ipukaini eta vémunaraiwaina'ini, tájinapa vikunachakaréma'i me Viya. Tayanapane vikametarairu'ipukaini eta vimetakasiwana'i te anuma, támutu'iwarepukaini víturuekene'aini, étaipa te máija'uchapukaini makayejeka'ini ema Viya eta ichapekene mari táichavenena'ini eta viyaseasiraina'ini eta vikasiñawairaina'ini eta maye'e.

³ Tási'a, te takuija'ipukaini eta vémunaraiwaina'ini, tájina vijakapakaréima'i me Viya. Tayanapane vikajirika'ipukaini tamutu eta víma'akeneana te vipena, té'eware vísapapukaini náijuchaini eta viáke'e táichavenena'ini eta namaurisira'i.

⁴ Té'esera yátupi'i vémunara'i, vikamichayare tamutu, vijapanura'iyare. Wa'i vikapinaruima'i nákani. Wá'iware pínkanilla'avima'i. Wá'iware vikasiñawawaikaima'i,

⁵ Wá'i vikawapajaima'i jákani táiñema'ikeneana. Wá'iware viverejimirauchaima'i ena apamuriana achaneana, wa'i énewanema'i eta visemira, wá'iware vikatianakaima'i;

⁶ wá'iware táurika'ini vikaeka'ira'i'ini te víma'a nákani tikaejeana'i. Viúrisamuresera te víma'a ena achaneana tiúri'i eta náitaresira.

⁷ Te yátupi'i vémunara'i, vikamichayare tamutu, enewane visuapayare tamutu, vikuchapa tamutu, wa'i víja'uchawaima'i vínajikawa.

⁸ Tájinapa títaima'i eta vémunaraiwayare, vímiyanawainapa eta vítaresiraya. Eta jena sacheanayare, vímatiekene'a tamutu. Waipa vikamunu eta vimetakasiwana eta metarapianayare tási'akeneanayare me Viya. Tájinapa viátajiwaima'i eta visamirayare eta apaechejiriruwana.

⁹ Taicha puiti te juka vítaresira'i, apaesachichaichu eta vímatiekene'aira'i, apaesachichaichu eta vítusira'i eta metarapiana tási'akeneana'i me Viya,

¹⁰ jarajapainapasera eta sacheyare, vímatiekene'ainapa yátupi eta mapanereruana ema Viya, eta vimáimatiekeneruana'i puiti.

¹¹ Nímikutichawa'i nuti eta viámaperuwa'i. Wicha'a vítuka'ini vipanerereka, vimapachichijirikawaicha'a. Té'esera te ajaira'avipa, títsiwachawapa eta vipanereruana. Vínajikapa eta viámaperuwaini'i.

¹² Puiti wicha'a támutu'ini vímatiekene'a'ini. Tikuti'icha'a te vímararakaicha eta vikuna te jákani ichasime espejo, wa'i takaechera'ini. Járajapainapasera eta sacheyare tikaecherainapa tamutu. Ema Viya wicha'a tímituka'avi'ini tamutu eta mapanereruana. Té'esera te apajara'inapa, tamutuya vikaikutiara máicha. Takuti'ichu eta máimaira'i puiti eta vipanereruana víti.

¹³ Jarari'i mapana eta juka vichakeneanaya: wakasiñawa me Viya, eta vikuchapira eta viúriwaya, tási'a etapa eta vemunasirakakaya; etasera eta tiuripana eta'i eta vemunaraiwa.