1 Corintios 12 - Táurinakene máechejiriruwa’i ema Viya tikaijare

Vimutu viti vítupajijiakawapachu'i maicha ema Machanewa Viya

¹ Nuparapenaveana, nuwara'a numetaka'eyare eta apana téchakareana, apaesa yátupina ákaikutiara. Jukari'i apánapaneneji'i eta vítupajijiasirawayare maicha ema Machanewa Viya.

² Échaichu'i eti, te wicha'a émaina'ini é'ika ema Viákenu Jesucristo, ísapajirikawaicha'a é'ika eta nasiñarajiana tájinakene'i eta tajíkaparaiwaina'ini.

³ Eta taka'e puiti némecha'eyare eta juka naye'e nákani wa'i máwa'aruanaima'i ema Machanewa Viya. Te naka'epuka: “Másajitatajipukaini ema iákenu eti”, te naka'epuka eta juka, ímatiwakaya ena. Taicha ena máwa'aruana'i ema Machanewa Viya, nakarichu ena tatuparaka'i náimatiyare eta akenukaira'i ema Jesús. Énasera ena wa'i máwa'aruanaina'ini ema Machanewa Viya, wa'i tatuparaka'ini náka'epukaini: “Ema Jesús émara Viya Viákenu'i.”

⁴ Víti máwa'aruana'i ema Machanewa Viya, apánapaneneji'i eta vítupajijiasirawana máijararu'aviana'i. Émanarichu'isera ema.

⁵ Éneichuware apánapaneneji'i eta vémataneana máijararuana'i ema Viákenu. Émanaichu'isera ema.

⁶ Te tamutu eta vikaemataneasira, ema Viya émaichu'i ema técha'avi'i, tíjaraka'avi'i eta vitumewa'i, virata'airaya vimutu.

⁷ Éneichuware ema Machanewa Viya, víjarakasipachu'i eta vítupajijiasirawayare máicha, vímitusi'ayare'i eta tasimutukeneana'i namutu ena vichamuriana.

⁸ Narari'i ena máimikatakawaka ema Machanewa Viya eta náitusiraya téchejikana, náimituresiraya. Ena apamuriana máijarakawakaware máejerareyare eta nakaikutiarairaya eta mapanereruana. Émanaichu'isera ema Machanewa Viya tíjaraka'i eta juka.

⁹ Narari'iware ena máijararuana'i eta nakuchapirayare muraka eta nayasearuana'i ema Viya táichavene eta nakasiñawaira'i eta maye'e. Narari'iware ena máijararuana'i eta nakanarasirayare ena nakajumakeneana.

¹⁰ Narari'iware ena máijararuana'i eta nakuchusiraya eta tiáramikareana. Ena apamuriana náijarakasipachu eta nakametarairuiraya maye'e ema Machanewa Viya, eta máechejiriruwana'i ema Viya. Ena apamuriana máijarakaware eta náimatiasirawaneya ena achaneana nája'apuka nákani máwa'aruana'i ema Machanewa Viya, nája'awarepuka ena máwa'eruana'i ena éreanana. Ena apamuriana máijarakaware eta tiúri'ichuya eta náechejisiraya eta apaechejiriruwana. Ena apamuriana máijarakaware eta naitusirayare, nápepika náechejisi'a eta apaechejiriruwa.

¹¹ Tamutu eta juka máichakeneana'i ema Machanewa Viya. Makarichu'i ema máitapara'a'i máijarakawaka eta náitukakenepachuyare namutu ena mawara'akeneana'i máijaraka.

¹² Eta make'e ema achaneana, apanapanenéji eta táijareana eta viáke'e. Tisimutu'i eta táitupajijiasirawana. Etanaichu'isera eta táuchusi'a'i te viáke'e. Ene Taka'e'i eta vé'isira'i ema Viákenu Jesucristo.

¹³ Taka'e, wa'i étaparakaina te israelita'avipuka, te apawasajueku'avipuka, étaipa te mákenure'avipuka. Té'esera te vikaikachasipa eta vé'isirapa ema Viákenu, étanainepa eta víma'i maicha ema Machanewa Viya.

¹⁴ Eta viáke'e wa'i étanainaichu'ini eta táima'iana'i, étapa eta táitupajijiasirawana'i.

¹⁵ Étaipa eta víwape taka'epapukaini: “Wa'i táwasi'ini eta viwa'u, wá'iware takutikaka'ini eta táitupajijiasirawa'i taye'e eta viake'e.” Etaichu'isera táunawa'i eta viáke'e.

¹⁶ Étaipa eta vichaka, taka'epapukaini: “Wa'i táwasi'ini eta viúki'a. Taunawa'isera eta viake'e.”

¹⁷ Wáipaine'i táurikaima'i amairi'aina'ini eta viáke'e takauki'a'ini. Tási'a, takuijapukaini vikiñaina'ini, takuijapaini visamakenéna'ini. Wá'iware táurikaima'i amairi'aina'ini eta viáke'e takakiña'ini. Tási'a, takuijapukaini visirina'ini, takuijapaini vijiurena'ini.

¹⁸ Ema Viya manaka'i eta táematanerepianayarepachu'i eta juka táunawana'i eta viáke'e. Taicha taka'e'i eta mapanereru'i ema Viya te tépiyaka'avinapa.

¹⁹ Wa'i máwara'a'ini étanainaichu'ini eta táitupajijiasirawaina'ini eta viáke'e, amairiki'a'avina'ipukaini.

²⁰ Yátupi tisimutu'i eta táitupajijiasirawana'i eta viáke'e, etanaichu'isera eta távi'a'i.

²¹ Tamutu eta juka viáke'e tikamunujirikaka'i: “Étaipa eta viúki'a takamunu'i eta viwa'uana. Étaipa eta vichuti takamunu'iware eta víwapeana, vipaisi'ayare.”

²² Étaipa eta tiávi'ana'i te viake'e ánichichapanana, eta vímaira'i viti, takutima'i najina taichakenerepina, éta'isera tiápajukawa'i tikamunukarepana'i.

²³ Jukari'i eta viáke'e tikutima'i wa'i múnaina'i eta vímaira'i, éta'isera tiápajukawapana'i vimuiriacha'i. Jukari'iware eta viáke'e waipa táurika'ini vímereka'ini. Tási'a, tiápajukawapana'i vépakukure'i, vikatiucha'iware.

²⁴ Jukari'iware eta apana táunawa'i eta viáke'e tikutima'i waipa vikamunu'i vépakucha'ini. Tímererekawa'i naye'e ena achaneana. Tamutu eta juka máepiyaruana'i ema Viya, máikucha'i eta táima'ianapachu'i, mawara'a'i tákutikaka'i eta vémunasiraya tamutu eta táunawana'i eta viáke'e.

²⁵ Eta taka'e, te vikaematane, tamutu eta viáke'e tiyamurika'i, tímikatajirikaka'i, ichape'i eta táejiasirakaka'i, wa'i táiputsiakaka'ini.

²⁶ Étaipa te tatiari'ipuka eta táichawakenewa'i eta táunawa'i eta viáke'e, támairiaka'i tikati eta viáke'e. Té'esera tatiari'ipuka eta táurisamurewa'i taicha eta táitupajijiasirawana'i, tamutuyare'i eta viáke'e tiúrisamure.

²⁷ Ene eka'e'i eti eta é'isira'i ema Viákenu Jesucristo, eta iúrujisirawa'i maye'e, ekutikaka'i eta táunawana'i eta máke'e.

²⁸ Énerichuware, ema Viya tituparaka'avipachu eta viáwakurepachu'i, mawaraira'i vijaneaka'eyare eti vichamuriana, machanerana'i. Énapa ena profetana, énapa ena tímiturekara'iana'i eta máechajiriruwana ema Viya, énapa ena títuruekene'ana'i nakuchuka eta tiáramikareana, énapa ena tikanararekana'i ena nakajumakeneana, énapa ena tímikatara'iana'i naye'e ena nakamunukenéwana, énapa ena tiúriana'i eta nakawanairipirana, énapa ena tiúri'ichu eta náechejisi'a eta apaechejiriruwana, énapa ena títukana'i nápepika eta apaechejiriruwana.

²⁹ Wa'i wámutu'ini apústule'avina'ini, wa'i wámutu'ini profeta'avina'ini. Wa'i wámutu'ini ímitureka'ini, wa'i wámutu'ini vikuchuka eta tiáramikareana,

³⁰ wa'i wámutu'ini vítupajijiakawa'ini vikanarareka'ini ena nakajumakeneana. Wa'i wámutu'ini véchejikana'ini te apaechejiriruwana, wá'iware wámutu'ini vituka'ini viapepirikaíni eta apaechejiriruwa.

³¹ Tiuri puiti, étipa takamunu eyaseaka ema Viya máijaraka'e eta ítupajijiasirawaina eta tikamunukarepana, jé'esare, nuwara'a nímituka'eyare eta apana táurinakenepana.