1 Corintios 11 - Táurinakene máechejiriruwa’i ema Viya tikaijare

¹ Nuti puiti juka nítaresira'i, étapa nupana'i eta máitaresira'i ema Cristo. Nuwara'a ene áka'eni eti apanaware, epananuyare nuti eta juka nítaresira'i.

Esu esena témetserajikawaya naye'e ena suchamuriana

² Ichape eta nukunacha'e eti nuparapenaveana, taicha eta emaemitisisiranu'i. Ímiyanawa'iware é'ika eta ímitukasiwana'i nuye'e.

³ Nuwara'asera némecha'eyare eta juka apanaware téchakare'i, ema Tata Vikaiyakene, ema machutiri'a'icha ema Cristo. Ema Cristo, émapa vichutiri'a'i vimutu viti ajairana. Ene naka'e'i ena ajairana nakaparapekeneana, ena nachutiri'ana'iware ena esenana nayenana.

⁴ Eta taka'e, viti ajairana wa'i viúri'a'ini vikaepakasi'ini te viyujarauchawaya, étaipa te vikametarairuyare. Taicha te vikaepakasi'i, tímikutijirikawaipa vémepuru'i ema Cristo eta vichutiri'aira'i ema.

⁵ Ésusera esu esena tatuparaka'i tikaepakasiyare'i te tiyujarauchawayare, étaipa te tikametarairuyare. Taicha te wa'i tikaepakasi'i, tímikutijirikawaipa suémepuru'i ema suima eta suchutiri'aira'i ema. Te wa'i tikaepakasi'i esu, tímikutijirikawaipa sukachukasikenéna'ini ésu.

⁶ Esu súkani esena wa'i suáwara'a'ini tikaepakasi, esu tiwara'a sukutiyare ema mákani ajaira, tási'a, te suwara'apuka suákuti'avi viti ajairana, tiúripana'i sukachukasipaini. Té'esera te tímitsiriakawayare'ipuka eta suíta'isiraya, tiúripanaichu'i sukaepakasi'ini.

⁷ Taka'e ema ajaira wa'i taurika'ini makaepakasi'ini, taicha ema Viya manaka'i eta maima'i, taicha taimereka'i eta maichapewa ema Viya. Esusera esu esena taimereka'iwa eta maichapewa ema ajaira,

⁸ Taicha esu esena wa'i sutiwa'ini suinaka'ini ema ajaira, esu esena eta suchusine'i maye'e ema ajaira.

⁹ Ema achane wa'i makaepiya'ini suichavenena'ini esu esena, esu'i esu esena tikaepiya'i maichavene'i ema ajaira.

¹⁰ Énasera ena esenana, tatuparakawaka'i tikaepakasianayare eta nayujarauchirawana, naimeresirayare eta napikaurewa'i, etapa eta napikauchira'i ena ángeleana.

¹¹ Puítisera, eta juka vítaresira'i vé'isira'i ema Viákenu, ichapemuri eta véjiasira eta náitatira'avi ena esenana. Víti'ipa ichapemuri'iware eta náejiasira'avi'i ena eta vítatiraya viti ajairana.

¹² Esu esena, yátupi'i eta súchusira'i esu te maeche ema ajaira, puítisera viti ajairana étapa viúchusi'a'i te suju'e esu esena tikachicha'avi. Viási'akene'isera vimutu maye'e ema Viya.

¹³ Epanerekene'aya yátupina eta juka. Németeaka nájina eti ímijachawa'ini tiúri'i esu súkani esena, máepakasináve'i eta suyujarauchirawa'i me Viya.

¹⁴ Viti ajairana vécha'i eta tatsiri'akaréwa'i viújijiki'ini eta vichutimaka.

¹⁵ Suímiturewa'isera esu súkani esena súri'a'i tiújijikiyare'i eta suchutimaka. Étara tiúrinacha'i ena esenana. Náijaraichu'i ena eta nakaepakasiraya, taicha natupara'aichu'i ena.

¹⁶ Te natiari'inapuka nákani wa'i nawara'a nasama eta juka nímiturapi'i, takamunu'i napanerechinawayare tatiwaina. Tájina vímatiya'ini eta apaye'erepi. Énaipa namutu ena vichamuriana, tájina apanaina naye'erepina'ini.

Tinikanayare eta tinikakare táikutiara'i eta máepenina'avi'i ema Viákenu

¹⁷ Tiuri puiti, numetaka'eyare eta juka apana. Tájinapa ekunachakarewaina'ini nuye'e, taicha waipa táetupikawa'ini eta iúrujisirawana'i eyujarauchirawana.

¹⁸ Jukari'isera eta juka tikati'i nuye'e. Nusamairika'i te iúrujisirawana íchirana eta culto, waipa takutikaka'ini eta epanereruana, íputsimuriawawakapa. Németeaka nuti kañari'i'i eta íchawakenewa'i.

¹⁹ Páure'esami eta íputsimuriawairakaka'i. Étainapasera ekaecheraiyaya eti yátupikeneana'i machanerana'i ema Viya, énapa ena wa'i machaneranaina'ini.

²⁰ Eta juka tiviucha'e'i eta íputsimurikakaira'i, etavene waipa táetupikawa'ini te ekurujikaka eta enisirana, eta tinikakare táikutiara eta máepenina'avi'i ema Viákenu te crusu.

²¹ Taicha te títekapa eta ura, waipa ekuchapakaka'ini. Narari'i tikainapupuirikawanapa tinikana, nayé'echirawawakapa. Tina'akawanapa térana tékawa'achawanapa. Narari'isera ena apamuriana téku'anaicha'a.

²² Tájinapa táuriwaina'ini eta juka íchakene'i. Takutipa takuijakenéna'ini epenaina'ini, étainapaini enisi'a'ini éri'a'ini. Tímikutijirikawaipa épuruwaka'i ena apamuriana machanerana'i ema Viya. Ímikatsiriakaware nákani tájinakene'i naviyawa'ini. Étupikawaipapuka eta juka eka'e'i. Tájinakenepasera ekunachakarewaina eta nuye'e.

Eta vinisira'i eta tinikakare táemecha'avi'i eta máepenina'avi'i ema Viákenu

²³ Taicha nuti tatupiruwa'i eta nukaimitukasira'i maye'e ema Viákenu, tási'a nuti étaichu'iware eta nímiturapi'i eye'e: Te jena yátikene'i te tikaijararekasiyarepa ema Viákenu Jesús, mave'apa te mawa'uana eta pan

²⁴ tási'a te taekenepa ma'asulupayachapa ema Viya, mayuvetukapa eta pan, tási'a maka'epa: “Eta juka eta náke'e, étivene'i níjararekawa'i eta népeniraya. Eta juka íchayare apajara'iyare, eta témecha'eyare eta nuye'e.”

²⁵ Te tamutupa te títanesianapa, mave'awarepa eta náerirare wasu, máichawakapa: “Eta juka wasu eta nítine, eta táepusairuwayare eta taitauchirawaya eta arairu vitratune. Eta íchiraparakayare te eriraya, eta témecha'eya eta nuye'e.”

²⁶ Taka'e te vénikaka eta pan étapa eta vésichakaka eta wasu, vémecha'i eta maepenira ema Viákenu. Tiámainukawa te mápechawaware máiteka.

Takamunu eta vipikauchirayare'i te vinikaya

²⁷ Eta taka'e namutu nákani tinikana'i eta pan, térana'i eta juka wasu maye'e ema Viákenu, nákaini tikaemuñawana'i tikapekaturanaipa taye'e eta make'e, tási'a étapa eta maitine ema Viákenu.

²⁸ Eta taka'e, émanapachu tipanereakawanayare eta manisirayare eta pan, tási'a étapa eta maerirayare eta wasu.

²⁹ Taicha te tiníka'ipuka, tási'a téra'ipuka, wá'isera mapanerecha'ini eta étaira'i eta make'e ema Viákenu, étapa tiviucha'i eta nanisira'i, étapa eta náerira'i.

³⁰ Étara tícha'e'i eta juka táitusiawa esimutupa eti ekajumana'i, tájinapa tatumewaina'ini eta iáke'eana. Ena apamuriana tépenanapaipa táicha.

³¹ Té'esera vítijiwa'i vétupirika eta vítaresira'i, ema Viákenu wa'i tíkuñaka'avima'i.

³² Taicha mawara'a'i vétupirikayare'i. Waipa vikaikuñaima'i taye'e eta nakaikuñairayare ena apamuriana achaneana máimatira'ana'i ema Viya.

³³ Eta taka'e, eti nuparapenaveana, te ekurujikakayare eta enisirayare, ekuchapakakayare apaesa ínuna eta enisirayare.

³⁴ Té'esera matiari'ipuka mákani téku'asamureipaicha, tiúripana manikanuma te mapena, apaesa waipa makuemechareka'e ema Viya, eta tamaetupisirawa'i eta iúrujisirawa'i. Étasera eta juka apamuriana téchakareana'i viye'e, níma'ainepa nuti netupirikaya te níteka eta ara eye'e.