1 Corintios 10 - Táurinakene máechejiriruwa’i ema Viya tikaijare

Visuapayare ema Viya mákarichu vijiraucha

¹ Nuparapenaveana, nuwara'a némecha'eyare eta maichararakawa'i akane ena viáchukanaveanaini máumuriwanaini ema Moiséini, eta náe'isira'i ema, tatiari'i eta úkaji timíkauchawakapa'i namutu ena, eta nánuesira'i eta Mar Rojo, namutu náima'a'i eta tájijiwa'i eta nánuesiraya.

² Taka'e namutu kaikachasiana'i taye'e eta ukaji etapa eta Mar Rojo, taka'e'i eta náitauchiraya eta náe'isiraya ema Moisés.

³ Énerichuware namutu tikutikakana'i eta nanisira'i eta tikutikakana'i tási'akene'i me Viya.

⁴ Namutu'iware térana eta une tási'akene'i me Viya. Eta juka une náeresaparaka'i ena, táuchure'i taye'e eta mari, maicha ema Cristo. Émaira'i ema tínapumirauchapa'i ena, máitatiwakapa'i eta napaisirapa'i.

⁵ Tamapuruji'isera eta majaneasirawaka'i ema Viya, wa'i émaina'ini ema náesenika'ini, tájinachucha wa'i nakaurisamurecha'ini ema, eta taka'e, maikuñakawakapa ema Viya. Namutuyareni tépenarakana taye'e eta máwapa'i apake'e, tiúchuku'ana'isera ena nachichanaveana.

⁶ Ena viáchukanaveanaini, taimikuñaka'i eta najamurachira'i eta tamaurikeneana. Étara eta juka tikauyayakare'i eta viye'e, enema'i'avina'ini víti apanaware wakuti'ini ena eta najamurachira'i eta tamaurikeneana.

⁷ Wá'iware ekuikutipa ena eta nakasiñarajirana, échawa eta Takapika'ukene Ajureka ani Taka'e'i: “Ena achaneana náichapa eta napiestachira'i eta nasiñaraji, tikaejakakanapa eta nanisiraya, téranapa, téchepukanapa tírimaikanapa te tamira'u eta nasiñaraji'i.”

⁸ Wá'ira vikuijararekawa taye'e eta tu'usikare, machu wákutiriana ena eta nakaikuñaira'i táichavene'i eta náichira'i eta juka tamaurikeneana, tépenarakanapa. 23,000 achane jena etanakene'i sache.

⁹ Wá'ira vikuyururujika taye'e eta mapanereruana'i ema Viákenu, ena nani tiyuruchawana'i, waipa nasuapa'ini ema Viya, tási'a, maikuñakawakapa ema, táechukawakapa eta kichare, tépenarakanapa.

¹⁰ Wá'ira takukarasakawa eta échejisirana maye'e ema Viya, wa'i ekukuti eta naejekapirawa'i ena viáchukanaveanaini, makapapajiruana'i ema ángele mawaneru'i ema Viya.

¹¹ Taka'e'ira eta juka náichawakenewa'i ena viáchukanaveanaini, puíticha tanasi'i te Ajureka téjaka'i tamutu maicha ema Viya, tamutu eta juka témecha'avi'i víti, tikatsimawakare'iware viye'e víti vinekapaekene'ana'i eta juka táitavirainapa puiti juka sácheana vikaiju'eyare.

¹² Eta taka'e, wa'i ekuimijachawa tájina tiákipaika'ema'i, tatuparaka'i ekauneuchawayare taye'e eta tamaurikeneana'i.

¹³ Puiti juka eta vítaresira, jarari'i eta tawara'a témejekapawacha'avi, wa'isera ekuarami'ini, taicha eta taka'e'i eta maichararakawa'i namutu ena achaneana te juka apake'e. Ekasiñawayaresera muraka maye'e ema Viya, taicha yátupi eta makasiñakarewa'i ema, waipa máisapaima'i táwayuchawa'ichaini eta tapamisira'e. Jé'esare ema, tíjaraka'enapa eta etumewayare, ekamichirayare tamutu.

Eta vinisirayare eta nikakare manakipairu'i ema Viya

¹⁴ Tási'a puiti, eti nuparapenaveana némunarukeneana, érajikawayare naye'e ena tikasiñarajiana.

¹⁵ Eti ímatiekene'a'i tamutu: Eta taka'e, numetaka'e apaesa táuri eta epanerekene'airaya.

¹⁶ Étaipa eta juka vérasa'i vimutu viyujaraureasa'i te vinikayare, étaichu'i táikutiara'i eta máitine máepusairu'i te crusu ema Viákenu Jesucristo, étaipa eta pan vinikakeneasa viyuvetu'ejirikaka'i, étaichu'iware táikutiara'i eta maeche ema Viákenu.

¹⁷ Yátupi apánapaneneji'avi'i víti, visimutuwakeneana'i, émanarichu'isera ema viáwa'aru'i, eta vinisira'i eta pan, étaichu'i te máijare eta viyujarauchira'i.

¹⁸ Eta juka viúrujiasirakaka'i, vikutiwakaipa ena nujaneanana israelítana, ena, tiúrujiakakana'i eta nanisiraya eta takayujara'ukene'i me Viya eta tikutikakana'i, nawaraira'i máwa'akawakaini ema Viya táichavene'i eta nanisira.

¹⁹ Tiuri puiti, vímatiekene'a'i tájinachucha táimanena eta waka nayujaraure'i náijarakasiru'i eta nasiñaraji ena achaneana, takutirichu eta waka mayujaraure'i, taicha eta nasiñaraji, tájinachucha tasamakarewaina'ini.

²⁰ Nuwara'asera némecha'e, eta naye'erepiana ena nani máimatira'ana'i ema Viya, énachucha náijarakasicha'i ena éreanana eta tikutikakana'i. Wa'i émaina'ini ema Viya náijarakasicha'ini. Eta taka'e, wa'i nuwara'a ímikasiapawa eti eta naye'e, machu náimive'a'e naye'e ena éreanana.

²¹ Wa'i táurika'ini apikere'a'avina'ini, eta vé'isira'i ema Viákenu, tási'a vé'ika'iwarepukaini ena éreanana. Te enikayare eta tikutikakana'i, te erayarepuka, tatupiruwa eta ekurujisirakakaina maye'e ema Viya. Mákaichu émaina ekasiña.

²² Machu ímiyusemaka ema Viákenu, taicha wa'i árata'aima'i ekanara ema.

Vímerekaya eta vémunaraiwanaya naye'e ena vichamuriana

²³ Natiari'i ena tika'eana'i: “Yátupineni víti véchinawa'i, viye'erepipachuyare'i.” Wá'isera tákutikaka'ini táetupikawa'ini maye'e ema Viya, wá'iware tákutikaka'ini táimikataka'avi'ini eta vipauchiraya ema Viya.

²⁴ Wa'i ákarichuima'i eti iúrichawayare'i; éneichuware etánukayare'i eta táurichirawakayare'i ena apamuriana.

²⁵ Te enikayarepuka eti eta waka tiási'a te mercado, wa'i ekuawamira'u eta enisirayare, wá'iware ekukamesa ekuecha te tikayujara'u'ipuka eta waka, apaesa takuija ta'apasamurecha'e.

²⁶ Taicha ema Viákenu, ema tépiyaka'i eta apake'e, étapa tamutu eta táwapa'iana'i. Vitupara'aichu'i eta vinisiraya máicha.

²⁷ Títekapaya jákani sache, tichu'aenaya enika nákani wa'i vichamurianaina'ini, te ísapawayarepuka tiáma'eana, tiúrichucha enika eta náijararu'eyare. Wa'isera ekuyasereka te tikayujara'u'ipuka.

²⁸ Té'esera natiari'inapuka nákani tinekapaekene'ana'i, te nametaka'epuka: “Eta nayujarauchira'i te tamira'u eta nasiñaraji”, tiúripana wa'i ekunika, apaesa takuija ta'apasamurecha eta mapanereru ema timetaka'e'i.

²⁹ Eti, émitisikapuka eta epikauchira'i eta nasiñarajiana. Émasera ema echamuri, wicha'a máemitisika'ini. Tási'a, nuwara'a takuija ta'apapika'ini eta mapanereruana icha eti.

³⁰ Te nuti nu'asulupayacha ema Viya eta nunikakeneana'i, ¿taja'asika takayema eta tipanararauchanuanayare eta nunisira'i?

³¹ Tamutu eta enisirana étapa eta erirana, étapa eta ekaematanerana, tiúriyare tamutu eta íchirayare te mamira'u ema Viya.

³² Jé'esare, nájinapa émejekapawaruima'i, énaipa ena israelítana, énaipa ena apawasana, navetijipa ena vichamuriana'i, taicha vikutikaka'i eta machichaira'avi'i ema Viya.

³³ Nuti, ichapemuri'i eta nuwaraira'i nukurisamurechawaka namutu. Wa'i nákarichu'ini nuti nutanuka'ini eta núrichirawayare. Éneichuware nutanuka'i eta núrichirawakaya ena apamuriana, taicha nuwara'a'i tauri eta, náuchukuiraina ena apanaware.