1 Corintios 1 - Táurinakene máechejiriruwa’i ema Viya tikaijare

¹ Nuti Pablo, maye'enu'i apústule ema Jesucristo, níchuarekasiwaichu'i maye'e, manerejirunuichu'i ema Tata Vikaiyakene, mawaraira'i nímitukaya eta náechejiriruwana ema. Puiti nukajure'e nuti émapa ema vichamuri Sóstenes,

² eta juka najure'i eye'e eti vichamuriana ekawasana'i taye'e eta awasare Corinto puiti eti iáwa'aruipa ema Viákenu Jesucristo, taicha etupiruwa'i esuapa eta máichuira'e'i eti ema Viya, tichu'a'e'i esiapayare'e te mawasa, ekutipa ena apamuriana vichamuriana tikawasana'i te tamutu awasareana, taicha ekasiñawa'i eta eyujarasirana eta maye'e ema Viákenu Jesucristo, ema visuapakene'i Vimutu.

³ Nuwara'a makatajika'e'ini ichape ema Tata Vikaiyakene, émapa ema Viákenu Jesucristo; náijaraka'e'ini táuriwaina eta epanereruana.

Viurikakarepa maicha ema Cristo

⁴ Nuti nu'asulupayachaparaka ema Viya táichavene eta majapanuira'eipa, eta iáwa'asira'i ema Jesucristo, ichapeine'i eta iúrikakarewa'i.

⁵ Tíjaraka'eipa ema Viya eta ítupajijiasirawa'i eta échejisirana, échema'aipa'i tamutu.

⁶ Écharipa eta numetaka'ekene'i eta máijarasira'eya ema Cristo eta iúriwaya, puítipa tíjaraka'eipa'i.

⁷ Tamutuipa tíjaraka'e'i ema Viya, tájinapa iátajiwaina'ini eta ítupajijiasirawaipa'i. Étanecha ekuchapayare eta jena sacheyare machavirayare ema Viákenu Jesucristo.

⁸ Puiti ema Viya tétumecha'eyare puiti juka vikaiju'eyare eta ítaresiraya apaesa takuija ekuawamira'u te jena sácheyare machaviraya ema Viákenu Jesucristo.

⁹ Ema Viya wa'i ma'apapikaima'i eta mapanereruana'i, yátupi eta máitauchirayare'i eta máichuira'e'i, mawara'a'i iúrujikawayare ekachanenapa ema Machicha Jesucristo ema Viákenu.

Wa'i táurika viputsimuriawa

¹⁰ Nuparapenaveana, nechejika'e te maijare ema Viákenu Jesucristo nuyaseaka'e emutu iúrujikawa'ini etanainaichu'ini eta epanereruana, wa'iware ekuiputsimuri'akaka taurina eta ítaresiraina émunakaka, tauruikawa eta epanereruana.

¹¹ Nuka'e eta nechejiriruwa, nuparapenaveana nemunarukeneana, taicha necha'i eta nametasiranu'i ena suchichanaveana esu vichamuri Cloe eta íputsikakaira wa'i tákutikaka'ini eta ekachanerakaka.

¹² Nuwara'a nimikaecheracha'e, natiari'ira'i eye'e eti ena tika'eana: “Víti viúripana'i viti vé'ikana'i ema Pablo”, ena apamuriana éneichuware naka'e'i: “Vítira viúripana'i viti vé'ikana'i ema Apolo”; ena apamuriana éneichuwareji naka'e'i: “Jé'ewaresera víti viúripana'i viti vé'ikana'i ema Cefas”, ena apamurianaware naka'ewa: “Vítira viápajupanawa'i viúripana'i viti vé'ikana'i ema Cristo.”

¹³ ¿Wá'ira tiuri enena'ini áka'e'ini, taicha ema Cristo wa'i apápipijina'ini eta máimiturapiana? ¿Nuti Pablo, wá'ira nútina'ini népena'ini te crusu ichavenena'ini eti? ¿Eta ekaikachasira'i, wá'iware étaina'ini te níjare?

¹⁴ ¡Tiúri'ichu'i wa'i nútina'ini níkachasika'e'ini eti, nájina tiyunakaima'i eta nútina'ini níkachasika'e'ini te níjare, yátupi níkachasikawaka'i ema Crispo émapa ema Gayo!

¹⁵ Taka'e najina naka'ema'i ema tikachasika'avi'i te maijare.

¹⁶ Néchawapasera eta níkachasisira'iware ema Estéfanas, énapa ena machichanaveana, wáipasera néchawa nája'apuka nákani níkachasiruana'i,

¹⁷ Ema Viákenu Jesucristo tituparakanu'i nukametarairuyare eta viúchukuirayare máicha, wá'ira étaina'ini mawanekanu'ini níkachasirika'ini, taka'e, tatupiruwa'i eta nukametarairuira'i, wá'isera nuwayuyujikaima'i nútinapapukaini nápajukawa'ini eta nusuapakarewa, tásapi'apapukaini wa'i takusuapakare'ini eta máepenira'i ema Cristo te crusu.

Ema Viya máijaraka'i ema Machicha Jesús eta máitupajijiasirawa'i

¹⁸ Natiari'i ena achaneana náimijacha'i súnsurupiana eta máepenina'avi'i te crusu ema Viákenu Jesucristo. Ena nani masuapajiraira'ana'i, énara táiturewanayare eta ekuñaraki. Vítisera viti makuchukureanayare, tiúri'i visama eta yátupikeneana tási'akene'i me Viya.

¹⁹ Taicha taka'e'i eta maechejiriruwa ema Viya te Takapika'ukene Ajureka: “Tamapuruji'i eta náitukakeneanaini ena títupajiji'anaini'i, nukamitiakayarewa eta náechemaraiwana'i ena techemara'ianaini.”

²⁰ Tájina takunachakarewaina me Viya eta máitukakene'i ema achane títupajijiakawa'i, mákani timiturekara'ipuka, tayanapane makarichu'i naye'e ena apamuriana tímatiekene'ana'iware eta taye'eana eta juka apake'e. ¡Ema Viya maipichasikapa eta maitupaijiasirawaini ema achane eta te juka apake'e!

²¹ Tamutusera eta mapanereruana'i ema Viya, tétavikawa'i eta tapachinawawaka'i. Narari'i ena tisuapanapa'i eta maechejiriruwa. Tayanapane ena apamuriana náimijacha'i súnsurupiana'i eta maechejiriruwa. Ena nani achaneana, tamapuruji eta náechemaraiwana'i, taicha wa'i táimimatichawaka'ini me Viya.

²² Ena israelítana, nawara'a náima'a eta tiáramikareana tiási'ana me Viya. Ena griegoana natanuka'i eta tápajusirawaya eta náechemaraiwaya.

²³ Eta taka'e, wa'i tasuapakare'ini naye'e eta vimetasira'i eta viúchukuirayare táichavene eta máepenira'i te crusu ema Cristo. Ena israelitana titsiri'ana'i eta juka, tási'a náepuru náe'ika ema. Ena apamuriana apawasana náimijachaichucha súnsurupiana eta juka;

²⁴ Natiari'isera ena tisuapanapa'i eta máichuira'i ema Viya, ena israelítana énapa ena apawasanana'i, náimatipa ema Cristo, eta wanairukaira'i maye'e ema Maiya taicha ema tíjaraka'i ema Machicha eta máitupajijiasirawa'i étapa eta matumewa.

²⁵ Tayanapaneinesera te súnsurupi'ipuka nasama ena achaneana eta vimetarairuana, étasera tiápajukawa'i tiúripana'i taye'e eta náitukakeneana'i ena. Tayanapaneware náimijacha'i mamarata'airaina'i ema Viya, éma'isera túmepana'i naye'e namutu ena.

Eta taima'i eta awasarechicha Corinto

²⁶ Ímatiwaichu'i, eti nuparapenaveana, te tíchu'a'epa ema Viya, wa'i ámutu'ini ímati'ini eta táichararakawa'i eta ítaresira'i te juka apake'e. Wá'iware ámutu'ini tuparairuka'ewakaina'ini, wá'iware ámutu'ini ekaima'akenewaka'ini.

²⁷ Tayanapane ena achaneana náimijacha'epuka súnsu'ena eti, manerejiru'e'isera ema Viya, taicha mawara'a'i máimikatsiriakawakayare'i ena tímijachawana'i títupajijiakawana. Tinerejika'eipa eti wá'ichu túmejiku'ena'ini, mawaraira'i máimikatsiriakawakayare'i ena tímijachawana'i túmejikuana.

²⁸ Ema Viya manerejika'i ena achaneana naepurukeneana'i namaesachakeneana taye'e te juka apake'e, mawaraira'i makaepa'a ena timijachawana títupajijiakawana.

²⁹ Eta juka mapanereru'i ema Viya, mamawaraira'i nakuija nakukasiñawawaika te mamira'u ema.

³⁰ Puítisera eti, majakapakeneanaripa ema Viya. Máwa'aru'ewarepa ema Jesucristo maicha ema Maiya. Taka'e, ichapeipa eta échemaraiwa'i máicha, santu'eipa máicha, ekutipaipa eta masantuwa'i ema. Iuchukurepaipa'i taye'e eta tikaviurekarewana.

³¹ Tawara'a vítaucha eta táechejiriruwana'i eta Takapika'ukene Ajureka, ani taka'e: “Wa'i vítijiwaima'i vikasiñawawika taicha eta vítupajijiasirawana, ema vikunachayare ema Viákenu taicha ema tiúricha'avi'i.”