Psalms 92 - Keley-i Bible (Antipolo Ifugao)

Ya a-appeh ni penaydayaw nan Apu Dios ni aggew ni pan-iyyatuan

¹ Kayyaggud ni mansalamat niya man-a-appeh ni penaydayaw ni hi-gam, Apu e Keta-ta-geyyan.

² Ey kayyaggud hedin an peennamtan kewa-wa-wa niyan kahilehileng hu eleg melullumman ni impeminhed mu niya muka pemaptek.

³ Niya kayyaggud hedin unnudan ni gitalah niya ayyuding hu a-appeh ni penaydayaw ni hi-gam.

⁴ Apu Dios, nakka man-am-amleng niya nakka man-a-appeh tep yadda impahding mu.

⁵ Apu Dios, kamengippetnga hu muka pehpehding niya nekalligat ni meewwatan hu wadad nemnem mu.

^6-7 Ya tuun endi nemnem tu ey eleg tu han-awat e ma-nu tep kayyaggud ni emin hu kameippahding idan lawah ni tuu ey ida kaumkedangyan, nem heniddan mateban helek e meendiddallin ingganah.

⁸ Nem hi-gam e Apu Dios, ey mannananeng kan man-ap-apu.

⁹ Yadda etan kamekibbuhhul ni hi-gam, e lawah daka pehpehding, ey mangkewehhit idalli niya mangkettey ida.

¹⁰ Nem hedin hi-gak, man impambalin muwak ni na-let e henin bakad muyung, niya indawtan muwak ni panyaggudan ku et man-am-amlengngak.

¹¹ Inang-ang ku hu neapputan idan buhul ku niya dingngel ku hu tekuk da, tep ya takut da.

¹² Nem hedin yadda kamengu-unnud ni hi-gam e Apu Dios ey umyaggud hu biyag da e heniddan eta-gey ni neyug winu sedar di Lebanon.

¹³ Em, umyaggud ida, tep henidda neitnem di Tempol Apu Dios e Dios tayu

¹⁴ e nanengtun matebadda niya nanengtun mangkalemeh ida, anin ni nea-ammadda.

¹⁵ Et kandalliy “Limpiyuh numan hi Apu Dios! Hi-gatu hu heni batun tayu kakeihhikkugi. Ey neiptek ni emin hu tuka pehding.”