Psalms 91 - Keley-i Bible (Antipolo Ifugao)

¹ Ya tuun tuka iddinel hi Apu Dios e Kabaelan tun emin ni keihhikkugan tun mengippaptek ni hi-gatu

² ey dammutun kantuy “Apu e Dios ku, ngenamung kan mengippaptek niya mengihwang ni hi-gak di lawah, tep hi-gam ni ebuh hu nakka iddinel.”

³ Em, tep makulug ni hi Apu Dios hu kamengippaptek niya hi-gatu kamengihwang ni hi-gam di hipan anggetakkut niyad linggeman ni degeh ni kaikkatey.

⁴ Tep heni daka hennian ni payak tu. Ey ya tuka pemaptek hu heni happiyaw mu.

⁵ Et humman hu, endi mu tekkutan ni meippahding ni hi-gam ni hileng niyan kawwalwal.

⁶ Niya endi mu tekkutan ni hipan degeh ni um-alin hi-gam winu hipan memettey ni hi-gam hedin hi Apu Dios hu iddinel mud biyag mu.

⁷ Anin ni linibu hu mangkettey ni sinakdul mu, et endi hu lawah ni an meippahding ni hi-gam.

⁸ Tep ang-ang-angen mullin ebuh hu pengastiguan Apu Dios idan tuun nambahul.

⁹ Et humman hu, gapu tep hi Apu Dios e Keta-ta-geyyan hu muka keihhikkugi niya hi-gatu muka iddinel ni mengippaptek ni hi-gam

¹⁰ ey makulug ni meihwang ka niyadda pamilyah mud hipan lawah ni kamekapkapya.

¹¹ Tep beggaen tudda anghel tun mengippaptek ni hi-gam di attun lawwan mu

¹² et a-allukuden daka ma-lat eleg liputan ni batu hu helim.

¹³ Ey anin ni wada ha-kupam ni layon winu anggetakkut ni uleg di pandellanan mu, et dammutun petteyen mudda.

¹⁴ Tep inhel Apu Dios e kantuy “Hi-gak hu mengihwang idan tuun neminhed ni hi-gak niya hi-gak hu mengippaptek idan kamengiddinnel ni hi-gak.

¹⁵ Ey hedin wada ligat da, et mambeggaddan hi-gak ni baddang ku ey gagannuen kun memaddang ni hi-gada. Baddangan kudda et meihwang idad ligat da et meidaydayaw hu ngadan da.

¹⁶ Em, ihhehwang kudda niya iddawtan kuddan andukkey ni biyag da.”