Psalms 88 - Keley-i Bible (Antipolo Ifugao)

Ya a-appeh idan helag Korah ni meidwat etan ni kamengipappangngulun a-appeh. Huyyan a-appeh ey meia-appeh ni meiu-unnud etan di kapenga-appeh ni “Panligligatan.” Hi Heman e iEzrah hu nengitudek nunyan a-appeh.

¹ Ap-Apu e Dios kun kamenellaknib ni hi-gak, kewa-wa-wa niya kahilehileng ey nakka umdasadasal ni pemmekan mun hi-gak.

² Dengel mu anhan hu dasal ku et baddangan muwak,

³ tep iyyadyan kamemunnumunnu hu nemnem ku niya ngannganih law hu ketteyyan ku.

⁴ Endi elet ku e heni-ak idan kamangkatkatey.

⁵ Ey heni-ak nei-dum di nangketey et heni-ak nekikulung ni hi-gada, tep inway muwak et eleg muwak law baddangi.

⁶ Heni muwak linhey di engeenget niya edallem ni neku-kuan.

⁷ Nakka henelheltapa hu nemahhig ni bunget mun hi-gak e heni anggetakkut ni dalluyun di baybay ni um-ienud. Et humman hu, endi law namnamah ku.

⁸ Hi-gam hu himmulun et pan-inhihi-yanan da-ak idan gagayyum ku et eleg dan hekey pinhed ni meihnup ni hi-gak. Ey heni-ak nakna et eleggak pakabsik.

⁹ Apu Dios, limmetuk hu matak ni lewalewak et eleggak law um-aang-ang. Ey kewa-wa-wa ni nakka mandasal niya nakka itata-gey hu ngamay kun bagak ni hemek mu.

¹⁰ Kaw yadda nangketey hu pengippahdingan idan miracles mu? Kaw ida kaum-inah humman ni nangketey ma-lat daydayawen daka?

¹¹ Ey kaw dammutun an ene-ehhelen idan nangkeikulung hu eleg melumman ni impeminhed mu niya eleg mepappeg ni muka pemaptek ni tuu?

¹² Niya kaw han-ang-ang idan wadad engeenget e bebley idan nangketey ida hu miracle mu? Winu kaw hannemnem dadda hu kayyaggud ni muka pehpehding?

¹³ Nakka umdasadasal ni kewa-wa-wan pemaddangan mun hi-gak e Apu,

¹⁴ nem ay kele muwak inwalleng et eleg mu hengnguda hu nakka ibbagad dasal ku?

¹⁵ Neipalpu eman ni keu-ungngak ingganah ni nunya ey e-eggel ni ekket hu ketteyyan ku. Nemahhig ni impeinglay ku law hu nakka panlelehhanin muka pengastigun hi-gak.

¹⁶ Eggak law han-isipel hu nemahhig ni bunget mu et iyyadyan ikkatey ku hu muka pehpehding ni hi-gak.

¹⁷ Heni-ak kamangkelneng di danum niya heni-ak nehukum, tep nemahhig hu bunget mun hi-gak.

¹⁸ Nan-inhihi-yanan da-ak idan edum ku niyadda gagayyum kun peteg tep ya muka pehpehding ni hi-gak, et heni-ak wadad engeenget.