Psalms 77 - Keley-i Bible (Antipolo Ifugao)

Ya a-appeh Asap ni meidwat nan Jeduthun e kamengipappangnguluddan kaman-a-appeh

¹ Nakka mampehemmehemmek nan Apu Dios ma-lat dengelen tu anhan hu dasal ku.

² Hi-gatu hu nakka kahwaan pampebaddangan ni emin di ligat ku. Nakka umdasadasal ni kahilehileng nan hi Apu Dios niya eleggak meettun mengitata-gey ni ngamay kun mandasal, nem kapyatun endi amleng ku.

³ Hedin ninemnem ku hi Apu Dios, man nakka medismayah, tep kameendi hu namnamah ku.

⁴ Eleg um-ali ugip ku tep nemahhig ni kamemunnumunnu hu nemnem ku et eleg meibbehwang hu pinhed kun iddasal nan Apu Dios.

⁵ Hedin ninemnem ku eman nelabalabah ni kakkayyaggud ni tsimpuh

⁶ e nakka um-ena-appeh ni hileng tep ya amleng ku, man kangkud nemnem kuy

⁷ “Kaw inwalleng da-ak law nan Apu Dios ni ingganah et eleg da-ak law hehmeka?

⁸ Kaw endi law hu impeminhed tun hi-gami niya kaw eleg tu peamnu etan impakulug tun panyaggudan min tuu tu?

⁹ Kaw hinullulan tun bunget hu binabbal tu niya hemek tun hi-gami?”

¹⁰ Ya nemahhig ni makaggeh di nemnem ku ey heni etan ni endi law hu kabaelan Apu Dios e Keta-ta-geyyan, et eleg tuwak law baddangi. Huyyadda hu kaum-alid nemnem ku,

¹¹ nem nanengtun eleggak lilliwwanadda etan kaketngain tuun impahpahding mun nunman e Apu Dios.

¹² Eleg ni hekey me-me-kal di nemnem kudda humman, tep humman ida hu nakka pannenemnem ni kenayun.

¹³ Emin hu impahpahding mu ey kayyaggud ni peteg niya endi edum ni Dios ni henin hi-gam.

¹⁴ Ebuh kan kamengippahding idan kaketngain tuu niya impaenang-ang mud kebebbebley hu et-eteng ni kabaelan mu.

¹⁵ Ey inhewang mudda tutu-um ni helag di Jacob nan Joseph, tep ya et-eteng ni kabaelan mu.

¹⁶ Apu Dios, yan eman ni nampeang-angan mud Madlang ni Baybay ey nemahhig hu dalluyun diman et anin ni yad dalinat tu et heni kamanggegeygey ni takut tu.

¹⁷ Nemahhig hu udan niya kamangkikidul. Niya kamangkekedyam e henidda panam ni kamantayyatayyab.

¹⁸ Hedin kimmidul et kamangkekedyam, man kamebnangi hu puyek niya kabunyan niya kamanyegyeg di puyek.

¹⁹ Nandalan kad ta-pew ni dalluyun et agwatem etan edallem ni baybay, nem endi an neang-ang ni gassin mu.

²⁰ Impangulum ida tutu-um e henidda kalneroh ni kaipappattul di Moses nan hi Aaron.