Psalms 54 - Keley-i Bible (Antipolo Ifugao)

Ya a-appeh David ni meippanggep ni nengidaddattengan idan tuud Sip nan hi Saul ni tuka pantattallui. Huyyan a-appeh ey meidwat etan ni kamengipappangnguluddan kaman-a-appeh ey kameunnudin gitalah.

¹ Apu Dios, ihwang muwak ey iehneng muwak anhan tep et-eteng hu kabaelan mu.

² Dengel mu anhan hu dasal ku tep mahapul ku baddang mu.

³ Immen idalli etan kamampahhiyya niya mangkabunget ni tutu-un memettey ni hi-gak. Humman ida etan tutu-un eleg daka ibbilang.

⁴ Hi-gam e Apu Dios, hu kaumbaddang ni hi-gak niya hi-gam hu Apuk ni kamengi-ehneng ni hi-gak.

⁵ Panhewim, et ya pinhed idan buhul kun pehding dan hi-gak hu pengastigum ni hi-gada, et pappegen mu hu biyag da, tep humman dedan hu inhel mun pehding mu.

⁶ Nakka um-amleng ni mengi-lin pinhed kun i-appit ni hi-gam e Apu niya nakka mansalamat ni hi-gam tep kakkayyaggud ka.

⁷ Binenaddangan muwak di hipan ligat ku ey inenapput mudda buhul ku.