Psalms 47 - Keley-i Bible (Antipolo Ifugao)

Ya a-appeh idan helag Korah ni meidwat etan ni kamengipappangngulun a-appeh

¹ Hi-gayun katuutuu, pelakpak kayun anla yu niya elet yun mengia-appeh ni pandaydayaw yun Apu Dios.

² Hi Apu Dios e Keta-ta-geyyan hu Ap-apud emin eyad puyek, et humman hu, hi-gatu lebbengtun tekkutan.

³ Indawat tun hi-gatsu hu kabaelan tayun mengapput idan emin ni buhul tayud kebebbebley, et hi-gatsu law hu man-ap-apud bebley da.

⁴ Ey hi-gatu nemilin bebley tayun tayu kaigaggayan helag Israel e nakappinhed tun tuu tu.

⁵ Yan kapenglawwin Apu Dios di kabunyan e tuka pan-ap-apui ey katkatnulan tu hu tangguyup niya katkuk ida tuun amleng dan hi-gatu.

⁶ Imay, pan-a-appeh itsun pandaydayaw tayun hi-gatu. Pan-a-appeh itsun pandaydayaw tayun hi-gatu e Patul tayu.

⁷ Humman ni Dios hu Patul ni emin eyad puyek. Pan-a-appeh itsun pandaydayaw tayun hi-gatu.

⁸ Hi Apu Dios ey wadad yuddungngan tun kaman-ap-apud emin ni bebley.

⁹ Neamung idan emin hu aap-apud kebebbebley et mei-dum idan mengidaydayaw ni Dios nan Abraham. Tep hi-gatu hu Ap-apuddan emin ni patul di puyek ni daydayawen ni tutu-u, tep hi-gatu Keta-ta-geyyan.