Psalms 4 - Keley-i Bible (Antipolo Ifugao)

Ya a-appeh David ni kameunnudin gitalah ni meidwat etan ni kamengipappangnguluddan kaman-a-appeh

¹ Dengel mu anhan hu dasal ku e Apu Dios kun kamengi-ehneng ni hi-gak. Binenaddangan muwak di hipan ligat ku, et nakka medinnel ni baddangan muwak mewan ni nunya.

² Hi-gayun katuutuu, kele anhan pinhed yun peteg ni pedngelan yuwak? Ey kaw eleg yu issiked ni mengippebehhul ni itek ni hi-gak?

³ Nemnem yu huyya: hi Apu Dios ey inappil tudda etan kamengu-unnud ni hi-gatu ma-lat hi-gada hu pantu-u tu. Ey tuka dedngela dasal ku.

⁴ Helipat-i yu ma-lat anin ni wada bungngetan yu, ey beken humman ni umhulun ni panliwwatan yu. Ey entan tu liwwan huyya ma-lat anin ni yan keuggipan yu ey nemnemnemen yu.

⁵ Pandinel kayun Apu Dios ey iappit yu hu lebbeng tun kamei-appit ni hi-gatu.

⁶ Wadadda hu edum ni tuun kanday “Hipalli na-mu memaddang ni hi-gatsu?” Et humman hu, peang-ang mu anhan hu binabbal mun hi-gami e Apu Dios.

⁷ Nem ya kakulugan tu ey et-eteng hu amleng kud panyaggudan kun indawat mu nem ya amleng idan tuun dakel inggaud da niya dakel hu meinnum ni kinapya da.

⁸ Nakka mekallinggep, et humman hu nakka maka-uggip ni hileng, tep inamtak e wada ka e Apu Dios ni kamengippaptek ni hi-gak.