Psalms 20 - Keley-i Bible (Antipolo Ifugao)

Ya dasal David ni meidwat etan ni kamengipappangngulun a-appeh

¹ Hi-gam e gayyum ku ey hummangen et anhan Apu Dios e Dios nan hi Jacob hu dasal mu ey baddangan daka. Ey ippaptek daka ma-lat endi maipahding ni lawah ni hi-gam.

² Em, hi Apu Dios e wadad Tempol tud Zion hu memaddang niya mengippa-let ni hi-gam.

³ Ey ebbuluten tu et anhan ey pan-am-amlengan tudda hu muka i-appit ni hi-gatu.

⁴ Ey iddawat tu et anhan emin hu ibbagam ni hi-gatu niya peamnu tu emin hu hipan muka nemnemneman pehding.

⁵ Em, iddawat tu et anhan emin hu hipan ibbagam ni hi-gatu. Et hedin peamnun Ap-Apu e Dios tayudda huyya ey ittetkuk milli hu an-anla mi niya man-am-amleng kamillin menaydayaw ni hi-gatu tep ya pengapputan mu.

⁶ Inamtak law e hi Apu Dios ey tuka pengapput hu pinutuk tun mampatul tep ya et-eteng ni kabaelan tu. Huyya keang-angan tu e tuka dedngelad kad-an tud kabunyan hu dasal nunman ni patul.

⁷ Dakel ida etan tuun ya almas da niya kebayyu da hu daka ididdinel ni pengapputan dad gubat. Nem hedin ngun hi-gatsu, man ya kabaelan Apu Dios e Dios tayu, hu tayu kaiddinel di pengapputan tayu.

⁸ Humman idan tuun eleg mengiddinnel ni hi-gatu ey hedin neapput ida, man humman hu pappeg tun hi-gada. Nem hedin hi-gatsu, man mengapput itsu tep ya baddang tu.

⁹ Ap-Apu mi, pengapput mu etan patul mi niya dengel mu anhan hu hipan mika ibbagan hi-gam di dasal mi.