Psalms 147 - Keley-i Bible (Antipolo Ifugao)

¹ Daydayaw tayu hi Apu Dios! Em, kayyaggud hedin man-a-appeh itsun penaydayaw tayun Dios tayu, tep humman dedan hu lebbengtun pehding tayu.

² Tuka pan-iyayyaggud hu Jerusalem niya tudda kapan-ibbangngad hu tutu-u tun neilaw ni balud di edum ni bebley.

³ Tuka ellubyaga nemnem idan nedismayah niya tuka peyaggud hu liput da.

⁴ Inamta tu ngu dedan hu bilang idan bittuwen et han tudda letua, niya nginedanan tuddan emin.

⁵ Eta-gey ni peteg niya et-eteng hu kabaelan ni Ap-Apu tayu. Eleg ni hekey melkud hu kalinaing tu.

⁶ Tuka baddangidda hu tuun daka pebabah annel da, nem tudda kapebabah ni peteg hu tutu-un lawah daka pehpehding.

⁷ Unnudi yun gitalah hu a-appeh yun yuka penaydayaw nan Apu Dios e Dios tayu.

⁸ Imbiklag tu hu kulput di kabunyan. Ey wineda tu hu udan ni menennum ni puyek, et kameteggudda hu helek di duduntug.

⁹ Wineda tu hu kennen idan emin ni kaman-ayyam di puyek niya anin ni ya kakennaddan impah ni gawwang et tuka iddawat hedin ida kamampikpik ni upa da.

¹⁰ Hi Apu Dios ey beken ni ya na-let ni kebayyu niya beken ni ya makabbunget ni sindalu hu kamengippeamleng ni hi-gatu.

¹¹ Tep ya kamengippeamleng ni hi-gatu ey yadda tutu-un kamekangngu-unnud ni hi-gatu niyadda kamengiddinnel ni eleg melullumman ni impeminhed tu.

¹² Emin itsun iJerusalem di Zion ey daydayaw tayu hi Apu Dios e Dios tayu.

¹³ Tep daitsu kapaka-ippaptek e heni naka-ihhammad tu eheb eyan bebley tayu ma-lat eleg daitsu hegepen idan buhul tayu. Ey binendisyonan daitsun tutu-u tu.

¹⁴ Tuka pelinggep eya bebley tayu niya tuka panyaggud hu hipan tayu kaittanem et dakel hu tayu kaennia.

¹⁵ Hedin wada in-olden tud kebebbebley eyad puyek, man anggegannu ni neu-unnud.

¹⁶ Tuka ibbiklag hu dallallu e heni wangal niya tuka iwwahit e heni dep-ul.

¹⁷ Ey tuka peelli hu dallallun heni pantal et endi tuun han-isipel tu hu ketel ni tuka peelli.

¹⁸ Ey hedin nanmandal, man kaum-ali hu dibdib et ida kamambalin ni danum humman idan dallallu et ida kaum-ayuh.

¹⁹ Emin hu tugun tu ey impeamta tuddan tutu-u tun helag Israel.

²⁰ Hi-gadan ebuh hu nengipeamtaan tu. Eleg ngu amtaddan edum ni tutu-u ida humman ni tugun tu. Daydayaw tayu hi Apu Dios!