Psalms 138 - Keley-i Bible (Antipolo Ifugao)

Ya a-appeh nan David

¹ Apu Dios, nakka mansalamat ni hi-gam di puhuk niyad nemnem ku. Ey ia-appeh ku hu penaydayaw kun hi-gam di hinanggaddan edum ni dios.

² Nakka ihhanggad appit ni Tempol mu ni nanyuungngak ni menaydayaw ni hi-gam, tep eleg melullumman hu impeminhed mu niya kamannananeng hu muka pemaptek ni tutu-um. Ey impeang-ang mu e hi-gam hu keta-ta-geyyan niya kakkayyagud ni peteg hu tugun mu.

³ Nandasallak ey hinumang mu et petuled muwak.

⁴ Emin idalli hu papatul di puyek ey daydayawen daka, tep dedngelen dallin emin hu tugun mu.

⁵ Em, i-ena-appeh dalli hu meippanggep ni impahpahding mu niya et-eteng ni dayaw mu.

⁶ Anin ni eta-gey kan peteg e Apu Dios et muka ipapaptek ida hu tutu-un daka pebabah hu annel da. Nem eleg mudda hengnguda hu tutu-un kamampahhiyya.

⁷ Niya anin ni liktuben da-ak idan buhul ku et wada kan umbaddang et nakka meihwang di hipan lawah ni pinhed dan pehding ni hi-gak, tep hi-gam hu kamekihhanggaddan nunman ni mangkabunget ni buhul ku et mudda kaapputa tep et-eteng kabaelan mu.

⁸ Apu Dios, hi-gam hu kamengippeamnun emin ni pinhed mun meippahding ni hi-gak, tep kamannananeng hu impeminhed mu. Et humman hu, entan anhan tuwak iwalleng, tep hi-gam hu nanletun hi-gak.