Psalms 135 - Keley-i Bible (Antipolo Ifugao)

^1-2 Daydayaw tayu hi Apu Dios! Emin kayun bega-en Apu Dios ni kamansilbid bawang ni baley tu niyad dallin tu ey daydayaw yu hu ngadan tu.

³ Daydayaw tayu hi Apu Dios tep ya kakinayyaggud tu niya iena-appeh tayu hu penaydayaw tayun ngadan tu tep ya binabbal tu.

⁴ Pinili tudda helag Israel ni tutu-u tu et henidda nebalol ni gamgam tu.

⁵ Inamtak e eta-gey ni peteg hi Apu Dios e Apu tayu nem yaddan emin hu edum ni dios.

⁶ Tuka pehding hu hipan pinhed tun pehding di kabunyan, yad puyek niyad baybay, niya anin di dallem ni baybay.

⁷ Tuka peelli etan kulput ni kamelpud gilig ni puyek ni kamengi-lin udan. Tuka unnudin kedyam hu udan niya tuka peelli hu na-let ni pewek ni kamelpud nambalyan tu.

⁸ Impampapetey tuddan emin hu pengulwan ni u-ungngaddan iEgypt, anin idan nemangulun impah ni animal da.

⁹ Impahding tudda kaketngain tuun pengastigu tun patul niyadda opisyal tu.

¹⁰ Binahbah tu hu dakel ni bebley niya pintey tudda patul ni et-eteng kabaelan da,

¹¹ henin nan Sihon e patul idan Amorite, hi Og e patul di Bashan, niyaddan emin hu patul di Kanaan.

¹² Et idwat tuddan tutu-u tun helag Israel hu nambebleyan idan nunman ni iKanaan e humman hu nebalol ni bineltan da.

¹³ Apu Dios, mandingngel alin ingganah hu ngadan mu, tep emin idalli hu manhuluhulul ni helag mi ey amtaen da hu kasina-gey mu.

¹⁴ Hi-gam e Apu Dios ey muka i-ehneng niya mudda kahehmeka hu tutu-um ni bega-en mu.

¹⁵ Yadda dios idan edum ni bebley ey kinapyan tuud silber niya balituk.

¹⁶ Wada kinapya dan bungut da niya mateda, nem eleg ida um-ehel niya eleg da han-ang-ang.

¹⁷ Wada tangila da, nem eleg da handengel niya endi yayyah da.

¹⁸ Yadda tutu-un kamengennapyaddan nunman niyadda kamandinnel idan nunman ni dios ey mambalin idallin heniddan hi-gada.

¹⁹ Hi-gatsun emin ni helag Israel niya hi-gayuddan papaddi ey hi Apu Dios hu daydayaw tayu.

²⁰ Hi-gayudda daman helag Levi niya emin kayun kamekangngu-unnud nan Apu Dios, ey hi-gatu hu daydayaw yu.

²¹ Daydayaw tayun emin hi Apu Dios di Zion di Jerusalem e bebley tu. Daydayaw tayu hi Apu Dios!